Amasa in Gammial Aw simtute, i Toupa leh Hondampa Jesu Khrist min in chibai! Mission fieldte a Toupa’n thil thupi hon hihsakte anuai a bang in i enkhawm nawn ding.

A. NEPAL MISSION FIELD:
Toupa’n semtute tungtawn in Gingthak – 12, Baptisma tangthak – 11, Sawm-a-khat pethak – 19, Ginna Thuchiam bawlthak – 3, leh Dansiangthou a koppih nei thak – 4 leh Naulat ding – 1 a hon piaknawnte ziak in a min i phat hi.

1. TONIC SOLFA TRAINING
La lam a masawnna ding ngimna in, field in Tonic Solfa sinna May 15-22, 2017 sung heutupa N. Ginzakham makaih in lohching tak in nei uhi. Pathian piina in lamzang tak leh lohchingtak in zang zou thei uhi. Sintute tamkhop paikhawmte lak ah Junior Course zou thei mi 19 om uhi. A zoute lak ah mi 6 in First in zou ua, mi 5 ten second in zou ua, mi 8 ten Third in zou uhi. Sinsaktu, N Ginzakham leh a sawltu HQ tung ah Field kipak mahmah uhi.

2. TANGLEPA DORCAS SEMINAR
Field Dorcas Fellowship makaih in singtang dawn a numeite a din May 9 & 10, 2017 in Seminar nei thei uhi. Hiai hun ah seminar a tel numei 80 val pha ua, Resource persons 4 apan in Seminar paper 4 sinkhawmna nei uhi. Devotion hun 2 te ah Mrs. Thuami, Gopetar leh Evan. Geeta Subba ten makaih uhi. Mrs. Kalpana Rai, Gopetar in “Christian Innkuan”, Mrs. Chingsiam, Birtamode in “Numeite leh Damtheihna”, Evan. Siampi Paite in “Christian Thilpiak” leh Mrs. Suman Khadka in “Khalam Pichinna” chihte pansan in seminar paper sinkhawmna nei uhi. Program honna leh khakna Pastor Rankumar in nei in, manphatak in zou uhi.

3. MISSIONARY BOX
Nepal Missions Field in Pathian hatna muang in, thilpiak dongtu apan a a pekhetu hihsawm in naktak in panla uhi. Hiai sepsuahna masa ding in, Silver Jubilee Khawmpi a thupukna bang in Field Missions Committee kiphuan uhi. Committee thupukna bang in, Nepal EBC Saptuam inn teng a Missionary Box koih ding chih ahi. Sik a kibawl box 500 leikhe ta ua, Saptuam inn chih a hawmna leng nei panta uhi.

4. KIPAHTHU GENNA
Nepal Missions Field nna sepna pailelte a sum le pai a huhtu: 1) TBMC, Langgol EBCC (2) Shillong EBCC (3) TBMC Guwahati (4) Pa K Liankhozam leh innkuante, Vengnuam EBCC leh (5) Teikhang EBCC te tung ah fieldte kipak mahmah uhi.
Missionary Day Hanthotna laithon: EBCC Vengnuam, EBCC Hebron, BCD leh EBCC Chennai ten Missionary teng ading hanthotna thu, laidal leh card, khut a bawl khak ua, hiaiten semtute kipaksak in tha guan mahmah a hih dan Field Superintendent apan report kimu hi.

5. BUILDING PROJECTS PROGRESS REPORT:
i) FIELD Office gutter leh fencing April 25, 2017 in kilam pan a, tuin a siikte rong nuh di kia in samta a, bawl zou ding kihita hi. Kipahthu gen ni.
ii) KATHMANDU Biakin bawlna paizom zel. Headquarters in huhna a piak tungtawn in hunkhop zoh hita. Sep ding tampi om lai. Mohpuakna piak a omte’n chitaktak leh awlmoh tak a a hon sep ua, biakin kilawmtak i tunkhiat zohna ding un thum lailai ni.
iii) TANGLEPA Pastor Quarters: Kum khat sung vingveng Area pastor omna ginalou tak a a om nung in, Local-te lunglutna leh kipiak zohna toh hiai project field in a pat hi a, kipahhuai mahmah hi.
iv) KIRTIPUR Biakin Kitchen ding leh a tung Staff Quarters ding bawlna leng pai lellel hi. May 23, 2017 in Field Superintendent in building suangphumna leh latna nei a, hiai building bawl pat ahi.
v) PADAJUNGI staff Quarter ding project leng pat in omta hi. Quarter lamzoh a hih chiang in i semtute teng lut thei pah ding uhi. Pathian ompihna toh lamzoh pah ahihna ding in thum ni.
vi) DHARAMPUR Pastor Quarter leng luah theih a kibawl himahleh a lang khat zoh louh in bangtan hiam om a, tuin inn pum suah in omta hi. Amau local in nna a na pan ua, Field in leng huhna kipia hi. Tuin Area Pastor T Ginkhozam in luah lel hi.
vii) HALDIBARI Fellowship a kipatchil apat i gingtu khat inn a kochik tak a kikhawm a hih man un, temporary a kikhop theihna bawlna ding field office in awlmohhuai sa in huhna pia a, amau leng bawl pah ngal in tuin zoh hita hi.

B. KARBI ANGLONG MISSION FIELD:
Toupa’n semtute tungtawn in Baptisma tangthak – 7, Gingthak – 5, Dansiangthou a koppih nei – 6, leh Sawm-a-khat pethak – 4 hon piak nawn ziak in a min i phat hi.
1. TONIC SOLFA SINNA: Field Dorcas Fellowship vaisaina in, EBCC RongAli ah, May 3 & 4, 2017 sung Basic Tonic Solfa Training neih in om hi. Hiai hun ah kho tuamtuam apan Dorcas makai mi 33 vel paikhawm thei ua, Evan. H. Jamkhanmang leh Mr. Daniel Rongpi in kipezou tak in sinsak ua, phatuam ngei dia lamet ahi.
2. TONIC SOLFA EXAMNA: Field BYF lak a Tonic Solfa sinna bangzah vei hiam neih a hih nung in, May 26, 2017 in Plot II Office, Rongchingri, Diphu mun ah Elementary leh Junior Examna neih in om a, i Field in la lam ah masawn a hih dan hiai exam tuailaite tungtawn a muh theih a hih man in khamuanhuai tuam mahmah hi.
3. EVANGELISTIC WEEK: Convention English School Paklongkam in May 29-31, 2017 sung Evangelistic Week nei uhi. Hiai hun ah thugenna Evan. Jacob Rongpi in zang a, Pathian kha polhna toh lohching mahmah chih report zak ahi. Naupangte lak ah Jesu Khrist hondampa a sang leh kilanthak leng hun khop om ua, amaute tunung a gingtu muanhuai a hong hihna ding un thumpih ni.

4. AN NGAWL THUMNA: EBCC TariAdong in a kim leh kiang ua khamangthangte itna leh veina liantak toh May 21, 2017 in nikhat pumlum anngawl thumna nei ua, Pathian kha polhna tang in manpha leh nuamsa chiat uhi. Huai toh kizui mah in, EBCC TariAdong leh 5Km Fellowship in leng bialtu Pastor Joel Hanse makaih in, gingloute awlmohna ban ah Field nasepna hatzawk semna ding ngimna toh 5Km Fellowship intekna in anngawl thumna leh kithuahkhawmna hun nuamtak nei uhi.

5. WORK CAMP: 5Km a member Mr. Sem Terang, genthei mahmah tenna inn ding leng neilou a om, lainatna toh May 9, 2017 in EBCC TariAdong leh 5KM Fellowship pangkhawm in work-camp nei ua, a inn ding bawlsak uhi. Gingtute ki-itna leh ki-awlmohnate muh a theih a hih chiang in tha hon guan mahmah hi.

6. SAPTUAM VEHNA:
(a) EBCC RongAli BDF in May 20&21, 2017 in BCC New Langrik Saptuam vehna nei uhi. Hiai hun ah Pastor T. Pauzalian leh Upa Lokpo Hanse in thu gen ua, kikhop top in member damloute vehna leh thumsakna hun nei uhi. Vehtute leh veh a om saptuamte kipak mahmah uh chih thu kiza hi.
(b) Hiai hun toh kituak mah in EBCC Bithilangso BDF makaih mi 20 vel in Pastor Joel Hanse makaih in EBCC TariAdong vehna nei ua, hiai hun ah BDF Bithilangso in Puansilh bag 2 itna thilpiak in EBCC TariAdong kiang ah pia uhi. Neihman hilou a itna a suak a kikhen geigei a hih man un thupi mahmah hi.

7. FIELD HUHNA THILPIAK:
(a) Evan. Munsongte nupa, Dimapur leh G. Vungkhumte nupa, Central Lamka ten cycle nih tuak Missionarite zat ding in thoh uhi. Hiai thilpiakte Gari lut mengmeng theihlouhna
mun a om semtute kiang ah manpha leh phatuam tak a a zat ding un pia uhi. Amau niteng a 3-4 Km pai gige a hih man un nuamtuam mahmah ding a lamet ahi.
(b) Upa T. Khupkholal-te nupa, Central Lamka in leng Field a vanzat poimoh mahmah, Khuang hoih mahmah khat leh Damdawi tamkhop pia uhi.
(c) TBMC, EBCC Dimapur in, New Langrik a semtute Quarter bawlna ding in huhna pia a, huai sumte pansan in khomite phatuamngaihna toh Field leh Head Quarter inleng behlap in Quarter hoih leh kilawm mahmah khat kilamkhia hi.
(d) Headquarter leh FWC pangkhawm a KEBC Bithilangso Pastor Quarters kibawl, zoh a hih toh kiton in, May 11, 2017 in honna leh latna FS/KA in nei hi. RongAli ah leng Pastor Quarter bawlna kipan a, Pathian huhna toh nasepna in masawn mahmah hi.
(e) Dengaon a Saptuam gam puahna pai lellel. Retaining Wall 100ft a sau kibawl, zoh a hih chiang in Earth Filling in zui ngal ding hi. Toupan Khalam kia hilou a, salam a kikepna dia poimoh leng a hunhun a hon piak ziak in kipahthu gen ni. KIPAHTHU GENNA LEH THUMNA DINGTE:
1. Field sung mite lak a sawm-a-khat leh thilpiak petu kibehlap tou zel hia theih a hih man in kipahthu gen in thilpiak petute a hong hatsemna ding un thumpih ni.
2. Rongnogor khua a om Mr. Rakesh Teron leh a inkuante ading in thum ni. Nidang a amau Khristian hisa Honghari (Karbi sahkhua) a kik, Khristian hih lunggulh nawn himahleh a khomite uh lauhna ziak a kipekhe ngamlou, awlmohhuai mahmah uh.
3. Miss Jirka Phangchopi, 5Km Fellowship a gingthak i neih, a nu-le-pa ta neihsun khophawklou a pukthei zel, Pathian in hihdam dia kilamen mahmah ahihna toh lamdang tak a Toupa min thupina dia a hong damna ding in thum ni.
4. Disama area a om; Mr. Mongol Teron leh a inkuante, Mr. Hondro Ingti leh a inkuante Khristian suah ut mahmah himahleh a khote lauh ziak a hong kipekhe ngamlou, hiai lauhna kha hawlmang a omna ding in thum ni.
5. Dengaon Rongkhelan a om Mr. Pong Rongpi leh a zi Mrs Basapi Timungpi leh a inkuante uh Khristian a hong kipe dek bangmah buaina daltu omlou a Khrist nungzui a hong hih theihna ding un thumpih ni.
6. Evan. Jacob Rongpi, hunsawt tak a pan kawng naa, doctor kiang a leng ki-ensak a investigation leng kibawlbawl napi damsiang theilou a om, Pathian thilhihtheihna toh a hong damna ding in thum ni.

C. DHEMAJI MISSION FIELD:
Dhemaji Missions Field a Toupa’n semtute tungtawn in Gingthak – 6 leh Baptisma tangthak – 3 hon piaknawnte ziak in kipahthu i gen hi.
1. BAPTISMA TANG UH: May 19, 2017 in Dunaguri khua ah gingthak mi-3 ten FS khut ah baptisma tang uhi, hiai hun ah mi-4 in tang ding chih himahleh setan in naktak a panla in mi-1 piak theihlouh in om hi.
2. BIAKIN DIN NUNG KUM-1 NA LOP IN OM: May 17, 2017 in EBCC Kapurdwa saptuam in biakin din nung a kum-1 chinna kipahthu genna nei uhi. Semtu tamzawten a uap theih ban uah Native Evangelist Ranuj Pegu, Lileswar Pegu, Jugeswar Charah-ten testimony, gingtute hanthawnna dan a a genkhiakte uh manpha mahmah a theih ahi. Huan Digolgorah leh Amguri a kipan leng gingtuten a uap ban uah, Mipi’n ankuang umkhawmna leng nei uhi.
3. FIELD IN SEMTU THAK NEI: Evan. V Ginsonthang in Ni 24-05-2017 in FS khut ah joining report bawl hi. Staff-ten reception program bawl in amah leh a inkuante Gamosa a oh-sak ban uah, semtuten Mising namte lak a sepna toh kisai a theihtuak omte genna nei chiat uhi. Huan ah, Evan. V. Ginsonthang ading in FS in thumsakna hun zang hi.
4. Mr TARUN DOLEY THUMPIH TUAK MAHMAH: Evan. Haukhosiam-te sepna mun Dunaguri khua a om Mr Tarun Doley in, May 29, 2017 in Baptisma tang hi. Amah hun sawttak a kipan TB natna ziak in chau mahmah in om a, TB damdawi a nek chiang in a taksa in zoulou zel hi. A hong damsiangna ding in thumna ah phawk chiat ni.
5. FS QUARTER-CUM-OFFICE BAWLNA PAITOU ZEL: Dhemaji town sung a FS quarter leh office kithuah bawlna paizom tou thei zel hi. Zohsiang pah tak lam-et ahi.
6. DIGOLGORAH AH SEMTU QUARTER DING BAWL AHI: Mr Khamson leh a lawmte mi-6 Lamka apan kuan in Digolgorah a semtu quarter ding bawlna va nei uhi. Amaute’n tha-it tak in va sem ua, tua kilam lel zoh a hih chiang in Pityangchapori a bawlzom ding uhi.
7. GBC STUDENT TEN PRACTICAL MINISTRY NEI: Grace Bible College a sinlai naupang 11 leh heutu Dr Suankhanhau leh Sir H Pauthianmuang-ten June 2-8, 2017 sung Dhemaji field ah Practical Ministry nei uhi. Amaute group-3 a kikhen in Dakwakhana, Silapathar leh Dhemaji area ah ministry nei ua, Ni-2 zoh in area exchange in vuahzu-daikai leh nisapi nuai ah ministry nei in kuankhe zel uhi. Semtu missionary ten amau area chiat ah makaih in nasepna manpha tak zoh ahi. Hichibang veina leh awlmohna liantak toh va kalsuante field in kipahpih petmah in Gamosa khat chiat ok-sak uhi. Toupan thupina tengteng tangta hen.
8. KIPAH THUGENNA LEH THUMNA DINGTE:
i) Pu Vungkhum Guite & Family in Pityangchapori mun a biakin bawlna ding a huhna a piak ziak un field a semtute kipak mahmah uhi. Amah leh a inkuante ziak a kipahthu gen kawm in Pathian vualzawlna ngetpih ni.
ii) Mr Khamson (H/Mistry) leh a lawmte mi-6 in Digolgorah mun a semtu quarter ding bawl uhi. Amau Pityangchapori mun a biakin bawl zom nawn ding in kisa uhi. Amaute ziak a kipahthu gen in thumna ah phawk ni.
iii) Field a gingtu taksa lam damlouhna neite – Mrs Pormai Kutum, Mr Herbeswar Ngate, Mrs Niskiti Narah, Mrs Lengsegya Padun leh Tarun Doley-te hong damsiangna ding un thumna ah phawk chiat ni
iv) Field a gingtu khenkhat a neu ua pan zu ne mi a hih ziak un, ngolh siang vilvel ding haksa sa, khat leh nih kinei hi. Amaute’n Khrist hatna ziak a hon ngolhzohna ding un thumna in phawk ni. (Tua bang kal ah i gingtu Mrs Anjona in kom-kuva a na haikhak ziak in, a pasal in a na bengkha zek hi- Siangthouna lam a etton tak sak ziak a taklat ahi).

D. MANIPUR MISSION FIELD:
Toupa’n semtute tungtawn in Gingthak – 22, Fellowship thak – 2, Sawm-a-khat pethak – 7 leh Missionary vakna pethak – 1 hon piaknawnte ziak in kipahthu gen ni.

THU TUAMTUAMTE:
1. Thiyam konjin a IES buaina omlou in pai thei zel hi. Room extend poimoh ua, Devotion a neih chiang ua zat ding sound system poimoh mahmah uhi. Thumna ah phawk ni.
2. Evan. Salam Johnson in May 17, 2017 in dansiangthou in koppih nei a, huan ah Evan. Ashok in leng May 29, 2017 in dan siangthou in koppih nei hi. Amaute nupa lohching a hih theih na’ng un thumsak zel ni.
3. Nambol Quarters nasep pat a hih tak toh kiton in tuin nasep pai lellel hi. Tunung chiang a sub-office bang leng hithei dia ngim leh lamet ahi.
4. Thamnapokpi ah leng Quarter cum Conference Hall neih ding poimoh sa in nasep pat sawm ahi. Tunung a, field Division Headquarters khat a hong hih theih ngimna leh lametna neih in om hi. Pathian pina toh a hong pichinna din thum ni.

KIPAHTHU GENNA LEH THUMNA DINGTE:
1. Missionary day May 7, EBCC Vengnuam ah FS in thugenna hun zang hi. Pathian apan saptuamte deihsakna tang in itna thilpiak puan bag ngou dim khat leh sum 1000/- in field a haksatna tuak Robindro leh Prakash min in dong uhi.
2. May 13, 2017 ni in EBCC Lamphelpat in Thoubal khunou saptuam veh ua, hiai hun ah mi 4 in testimony genna nei thei uhi. Hiai testimony gente lak ah Indian Boxer Sarita Devi leh a pasal Thoiba inleng gen uhi. Sarita in May 18, 2017 in Jesu Khrist a hondampa dia sang in Baptistma tang hi. Huan, Sarita nu Khomdombi, cancer in damlou a, amah upata a hih man in operation ngamlou uhi. Amah leng gingtu a hih ban ah thumna ngaina mahmah mi a hih ziak in saptuamten thumna in phawk ni.
3. Field a gingloute lak a counselling neih a om zelte’n gah kipahhuai tak hon tut a, amaute’n hotdamna kichiantak a hon neih theihna ding un thumsak ni.
4. Gingtute lak ah damlouhna nei tamtak om hi. Gorbhadon of Naranseina, zun tha theilou in RIMS ah operation bawl ahi. Aman tapa neilou, rickshaw hek a nektawm zong ahi. Hong damsiang pah theihna ding in thumpih ni. Mr N. Tomba Khordak leng Jaundice natna nei hi, semtute lak ah damlouhna nei om zekzek ua, thumpih ni.
5. Khristiante douna leh soisakna hong uang semsem ding in kilang hi. Gingtu tamzawte tuailai ahi ua, nu leh pa, khotang in doudan tuamtuam in dou uhi. Ginna muanhuai tak nei a ze-etnate a hon thuak zohna ding un thumpih ni.
6. Langol in Mass Counselling program a neih uh lohching a, mi 12 in Jesu Khrist, hondampa ding in sang thei uh. Kipahthu gen ni. Toupan khamangthang tamsem hon piakna di’n thum ni. 