Amasa in Gammial Aw simtute tengteng i Toupa leh Hondampa Jesu Khrist min in chibai! Missions Field a semtute tungtawn a Pathian nasep thupite a nuai a bang in enkhawm nawn leng i chi hi.

A. NEPAL MISSION FIELD:
Toupa’n semtute tungtawn in Gingthak – 15, Baptisma tangthak – 26, Sawm-a-khat pethak – 18, Ginna Thuchiam bawlthak – 05, leh Dansiangthou a koppih nei thak – 01, Inn thak lat zah – 03 leh Naulat ding 1 hon piaknawnte ziak in A min i phat ahi.

1. DORCAS ONE-DAY SEMINAR ZATNA OM:
Dorcas Coordinator, Miss Liankhoman makaihna in April 29, 2017 in field in phaizanga Saptuam omte samkhawm in Birtamode NEBC Biakin ah One Day Seminar zatna nei uhi. Hiai hun in “Innkuan sung nopna dia Numeite mohpuakna chih leh Saptuam chidam leh masawn neihna dia Numeite mohpuakna” chih thupi tungtawn in kisinsakna hun nuamtak nei thei uhi. Hiai program zatna ah Dorcas member 150 val kihelthei uhi.

2. PALM SUNDAY ZATNA: Nepal a saptuam omna teng ah Palm Sunday lohchingtak in zang uhi. Birtamode Saptuam ah Palm Sunday biakna program zoh in mipin kholai a lampi zuihna leh Hossana chi a kikouna hun zang uhi. Ginglou miten lamdang sa in, a ziak dong zel ua, amaute ading in Pathian thu genna hun lemtang mahmah suak hi.

3. NEWS BULLETIN HAWMKHIAK HITA: Field sung thu kizaktuahna ding leh khalam ann a kivakna ding a field in a gel “Nepal EBC Sandesh” Issue masa pen hawmkhiak in omta. Hiai pen FWC Chairman, Elder Jonah Rai in May 3, 2017 sunnung dak 3:00 in Field Office, Birtamode ah honna nei a, a latna Field Superintendent in nei hi.

6. PROJECTS PROGRESS UPDATES: 2016 Field Annual Conference a Local Saptuamte a kipan sepding a project a neihte uleh Headquarters in septheihna ding sanction a bawl uh bohzuina in, anuai a bang in nasep kipanta hi :-
1. DAMAK Saptuam Biakin ceiling, gate leh kongtual zutmaam na ding field office in huhna Rs. 50,000.00 a piak ban ah amau local in tamlou a behlap uh toh, tuin bawlkhit in omta hi.
2. SHANTINAGAR Saptuam inleng toilet leh kitchen Biakin mun ah, room 3 kilawm tak in lamzouta uhi.
3. ANGEPPA Saptuam leng biakin lam kipanta. Leingawi nawn zouta ua, tuin sing-at lellel uhi. Area Pastor, PL Ropiang in April 19, 2017 in biakin bawlna ding mun ah suangphumna hun va nei hi. Gingtu Mr. Harkaraj Rai leh a innkuante’n Biakin mun ding a thoh uh ahi. Headquarters huhna toh hiai biakinn lam hi ding hi.
4. KATHMANDU Biakin bawlna paizom zel. NEBC saptuam om akipan a Pastor Tikaram inn a kikhop a na pat uh tuni tan sunzom lai uhi. Bawlzoh pah a hihtheihna ding in thumpih ni.
5. HALDIBARI Fellowship in a kipatchil apat gingtu khat inn a kochiktak a kikhawm, tuin temporary a kikhop theihna bawlna ding field office in huhna a piak tungtawn a bawl in om hi.

7. KIPAHTHU GENNA LEH THUMNA DINGTE:
1. April kha sung in Pathian in Gingthak mi 15 leh Baptisma tang mi 26 a hon piakte ziak in Pathian kiang ah kipahthu genni. Khalam a a hong khanlet zel theihna ding un thum zom lai ni.
2. Nepal Missions Field a missionary ding a lut thak Evangelist Marina Manngaihlian in join ta. Tuin Chisang station ah sem lel hi. Thumna ah phawk ni.
3. Field in building project tuamtuam a neihte thumna ah lan ni. Pastor/ Staff quarter i stationte ah poimoh mahmah. Semtu quarter kibawl lelte leh bawl dia gel a omte lamzang tak a bawl a hong hihtheihna ding in thumni.
4. Field sung a nasepte kithuzakna ding leh khalam a phattuampih theih ding article simtheihna ding newsletter Field Khawmpi 2016 in bawlkhiak ding a thupuk uh, “Nepal NEBC Sandesh” issue masapen tu May 2017 kha bul in suahkhiak in omta. Kipahthu Pathian kiang a gen in, hoihtak a bawlzom ahih a, phatuam tak a zat ahihna ding in thumni.

B. KARBI ANGLONG MISSION FIELD:
Toupa’n semtute tungtawn in Baptisma tangthak – 5, Dan siangthou a koppih nei – 1, Naulat ding – 4, leh Missionary vakna pethak – 17 hon piak nawn ziak in a min i phat hi.

1. QUARTER LATNA HUN ZAT IN OM:
Field leh Headquarters pangkhawm a kibawl Bithilangso Pastor Quarters zoh in omta a, April 26, 2017 (Wednesday) zingkal in FCWC leh EBCC Bithilangso saptuam pumpi tel in Honna, Kipahthu genna leh Latna Field Superintendent, Karbi Anglong Missions Field in nei hi. Karbi Anglong Mission Field ading a thil om masapen ahihna toh field in kipahhuai leh thupi sa mahmah uhi. Hiai hun ah hasotna thugenna leh Local Saptuam kiang a piak khiakna chairman, FWC in nei hi. Tuin Pastor Joel Hanse leh a inkuanten luah uhi.

Nasepna navak zawk lametna toh Tanchinhoih gen a lutna khua khenkhat ah Native Evangelistte omsak sawm in FWC in Field sung mun bangzah hiam ah Inn bawl hi. Tuate lak ah Dengaon a pen luah theih ding in zoh hita a, April 30, 2017 in Field superintendent in Latna leh Saptuamte toh kithuahna hun zang hi. Hiai hun ah, Bial Dorcas in a kaihkhawm uh van bag 4 vel piakkhiakna nei uhi.

2. GINGTU KIBEHLAP:
i) Diphu a pan gamlalou Lumding Road 5KM ah semtu khat i koih thak a, Fellowship leng ki puahthak hi. Hiai mun ah Honghari inkuan 2 (nih) a vek un member 13 vel Khristian ah hong lut uhi. Bialtu Pastor leh Evangelistte’n Counselling theihtawp in neihpih ua, April 8, 2017 in a piching teng in Pastor Joel Hanse khut ah Baptistma tang uhi. Halleluiah !!!
ii) April 23, 2017 in Jitleplong ah Patradisha Fellowship member ding a Pathian in hon piakte laklutna leh thumsakna hun Assistant Field superintendent in nei hi. Member kibehlap zel a om theihna ding in Pathian kiang ah thumna toh delhzui ni.

3. SAPTUAM VEHNA:
i) Assistant Field superintendent makaih in Field Working Committee memberte’n Fellowship thak Rongchingri (5KM) Lumding Road vehna April 2, 2017 in nei uhi. Hiai vehna hun ah Asistatnt FS in memberte hasotna leh thumsakna hun zang a Pathian thutak genna Upa Dr. Lipson Rongpi in nei hi. Hiai Fellowship ading vanzat poimoh Table 1, Chair 4, Plastic phek (mat) 4 FWC in piakna leng nei uhi.
ii) April 19 & 20, 2017 in Field Baptist Dorcas fellowship in Assistant Field Superintendent leh bialtu Pastor Joel Hanse makaih in EBCC Koilamati vehna nei uhi. Hiai vehna hun in inn chih a lut in insung mite a ding thumsakna va nei uhi. Hiai hun mah ah Biakna pai dingdan, Dorcas Antangpham ding dan, Thilpiak hih dingdan leh a dangdang leng sinsakna va nei ngal uhi.
iii) April 23, 2017 in Bial BDF in Field Superintendent makaih in EBCC Tari Adong vehna nei uhi.
Hiai vehna hun ah Pathian thu leh la a hasot kia hilou in, taksa adia poimoh puansilh bag 12 leh folding Table khat pia uhi. BBDF in saptuamte a awlmohna leh veina uh thupi leh phathuai i sa hi.
4. KIPAH THUGENNA LEH THUMNA DINGTE:
1. Pathian in a hunhun a gingthak, Baptisma piak theih ding a hon piakte ziak in kipah thugen in, khalam a hong pichinna ding un thumpih ni.
2. TBMC, Shillong in KEBC Rongali Sound System leina ding Rs. 30,000.00 a piak uh TBYF KEBC Rongali in Rs. 10,000.00 behlap in Amplifier khat leh Sound Box nih hoihtak leikhia uhi. Pathian kiang a kipahthu gen kawm in, manphatak a zat a hong hihna ding in thumpih ni.
3. Khristian hih lunglut Dengaon a om – Gopal Prasad Chauhan, Longnit Area a om – Budha Rongpi Khoya Rongpi, Lob hasnu, Babusa Hasnu leh Dhonsing Teron-te a lunglutna uh mit mailou a Jesu Khrist Hondampa a sang thei ding a muhchetna a hon neihna ding un thum ni.
4. Karbi Anglong Mission Field sung a Mission school i neih 7 te’n April 2017 kaltawp lam a First Quarterly Exam a neih uh bangmah buaina omlou a a zohtheih ziak un kipahthu gen in, kumtawp tan a lohchingtak a a pai zom theihna ding un thumpih ni.
5. Nidang a Pathian thu toh kilut theih ngeilouhna Mijung Kania Terang khua ah a masapen ding in April 20, 2017 in Pathian thu gen theihna ding kong hong kihong a, chi kituhta ahihman in, i chituh uh a hong pouna ding leh a gahsuah nading in thum ni.
6. Tulai kholum kipan nawnta, Field Saptuamte leh semtute lak ah nat-le-sat thu zak aom nawn ahihman in, Damna neipa Pathian kiang ah taksa hatna leh damna ngen in thumna toh pang ni.
7. Mrs. Nemnu, Evangelist Jangkhohau Guite tanu Damlouhna ziak a Referal Hospital Dimapur a ki-enkolsak, dam lam nawt a omta ahihman in kipahthu gen in, a hong damsiang na ding in thumpih ni.
8. Pastor T. Pauzalian damlouhna ziak a Imphal a kienkolsak hoihlam a om in Sepna mun join nawn thei, kipahthu gen in, a hong hatzom zel na ding in thumpih ni.
9. Pastor Jameson Bey, Assistant FS/KA leng taksa hatlouh jiak in April 5-8, 2017 sung Guwahati ah ki-ensak in hoh a, tuin damdawi ne lel hi. Hoihtak a hong dam na ding in thumpih ni.
10. Mr. Rai leh a inkuante 5KM Lumding Road a Fellowship ah hong kipia uh, a tapa Bikas Rai damlou a om, Pathian in hihdam ding a kilamen mahmah ahihman un Salam leh Khalam a damna hoihtak a hon neih theihna ding un thumpih ni.
11. Mrs. Lalzarlian, wife of Rev. M. Zalian Guite, Field Superintendent, Sugar sang ziak a taksa chau leh hatlou tak a om, hoihtak a hong hat nawn theih na ding in thumpih ni.
12. Field Working Committee in Year Plan khat a neih uh Fellowship omna khuate teng a Chialpina neih ding chih lohchingtak a zoh ahih theihna ding in Pathian ompihna leh makaihna ngen in thumsak ni.

C. DHEMAJI MISSION FIELD:
Dhemaji Missions Field a Toupa’n semtute tungtawn a Gingthak – 4, Baptisma tangthak – 4, leh Biakinn thak – 1 hon piaknawnte ziak in kipahthu i gen hi.

1. NAMGHARIA LEH DIGOLGORAH AH BAPTISMA PROGRAM: April 14, 2017 in Namgharia khua ah mi-3 te’n FS khut ah Baptisma tang uhi. Hiai baptisma program zoh in semtute makaih in EBCC Namgharia biakin ah program zatna om a, annkuang umkhawmna leng nei ngal uhi. Toupa’n gah hon piak zelte ziak a kipahthu gen kawm in, khalam a hong pichinna ding un thumna ah delhzui chiat ni.

2. DIRECTOR IN FOUNDATION SUANGPHUM: April 25-26, 2017 sung Director of Missions ban ah Missions Coordinator leh Chairman CMSC, Upa Joel G Hangzo-te’n Dhemaji Mission Field vehna nei uhi. Field office-cum- Field Superintendent Quarter
Gammial Aw
ding bawlna nasep pai lellel etkhiakna nei in, Digolgorah leh Pityangchapori mun a semtu quarter bawlna ding suangphumna Director in nei hi.
3. KIPAH THUGENNA LEH THUMNA DINGTE:
i) Amguri mun a om Mr Kamesh Kuli-te nupa in tanu melhoih tak nei ua, Evan. Gounemlian min phuaksak ua, aman nau min ding in “Nem Rubi” chih min hoihtak phuak hi. Naungek chidam tak a hong khan nading in thumpih ni.
ii) April 11, 2017 in Lachangaon aom i gingtu Mr Basker Pangin puk (BP stroke hidia gintak) a, Ambulance zang in Dakwakhana a puak in om hi. Pathian hoihna ziak in tuin hong dam nawnta hi. Kipahthu gen ni.
iii) Mrs Niskiti Narah w/o Mr Gonokanto Narah, Digoli khua a om hun sawttak apan TB ziak a zawngkhal den, a buaisiat ziak in Dhemaji Civil Hospital ah admit in om hi, a na serious sim ziak in Dibrugarh ading in doctor in refer mahleh sum leh pai haksat ziak in pai zoulou in om uhi. Amah hihdam thei Pathian kiang ah hong damna ding in thumna in delhzui chiat ni.
D. MANIPUR MISSION FIELD:
Toupa’n semtute tungtawn in Gingthak – 14, Baptisma tang thak – 17, Fellowship thak – 1, Sawm-a-khat pethak – 6, Missionary vakna pethak – 03, Naulat ding – 01 hon piaknawnte ziak in kipahthu gen ni.
KIPAHTHU GENNA LEH THUMNA DINGTE :
1. April 2, 2017 ni a Jiribam a mi 8 baptisma tangte lak ah Ma Ph Robindro leh a zi tel uhi. Amah a kawng nuailam zeng hi a, Wheel chair in bel pai thei zel hi. A Upa’n inkuan apan nohkhia in mi inn pang khat bel in khosa uhi. A zi leng damtheilou tak ahih ban ah tanu 2 te school fee piak ding leng nei zoulou hi. Hun tamzaw ah i semtu Seitamjit in sum leh antang in huh zel hi. Amaute thumna toh delhzui ni.
2. April 16, 2017 ni a Nachou baptisma tang 8te lak ah N. Prakash leh a zi tel uhi. Amah mitdel hi a, Yaosang camp a kitheihchetna nei ahi. A zi kalna, alangkhat paih in omta hi. Tapa khat nei ua kum 7mi, zeng hilai hi. Baptisma a tan ni un a nu-le-pa’n auto khat a nungdelh in baptisma tanna lui ah va pai ua, pumpeng chiang in a tapa va zep zialzial uhi. Nitak chiang in inn ah giak lou in innkong a toilet gei ah giaksak ua, Maibate bang phuisam khum sak uhi. Hiai bang dinmun haksatak ah om ua, phone a houpih ding a kham ban uah biakinn kai ding leh pawt ding phallou uhi. Thumna in phawk ni.
3. Field sung a semtute’n counselling a neihpih lellelte uh biakinn kai thakte leh dawimatte’n Jesu a hon theihchet ua, hondampa ding a hon saan theihna ding un, thumsak ni.
4. June 2017 last week in Manipur Field a semtute ading in Hiangtam Lamka in Camp neihpih sawm uhi. Hiai hun in General Secretary leh Suresh Singh in thu gen ding. Pathian kha vehna tang a, khalam kilatthakna, halhthakna leh nasepna a khalam kipiakthakna a hon tut theihna ding in thumna ah phawk ni.
5. Field a gingtu tuailai nungak leh tangvalte a nu-le-pate’n ginglou toh kitensak di’n phutluihna neisek ua, haksatna tuak uhi. Tua bang in nungtolh a mangthang tampi omta ahihman un thumpih ni.
6. Field in sum saina a ginom leh chihtakna poimoh ahihziak a kisinsakna a neih uh semtute’n a theihsiam ua, a zuih ua, dangka deihtakna leh ginomlouhna apan saptuam a hong chidamna ding in thumpih ni.
7. April 18, 2017 in Heisnam ah open air ministry neihna ah piching mi 25 val bang va tel ua, lunglut mahmah uh ahihman un maban a semtute tungtawn a Khalam pianthakna a hon neih theihna ding un thumsak ni.
8. N. Tomba, Khordak a om Jaundice ziak in damlouhna nei a, Gobardhon, Naranseina a om inleng zunthakna lam a buaina nei hi. Amaute’n damna hoihtak hon neih theihna ding un thumpih ni. 