Amasa in Gammial Aw simtute tengteng i Toupa leh Hondampa Jesu Khrist min in chibai! Toupa a i sepgimna thawnlou a, gah kipahhuaitak muzel i hihdan anuai a bang in enkhawm nawn leng i chi hi.

A. NEPAL MISSION FIELD:
Toupa’n semtute tungtawn in Gingthak 10, Baptisma tangthak 06, Sawm a khat pethak 27, Ginna Thuchiam bawlthak 16, leh Dansiangthou a koppih nei thak 03 leh Naulat ding 01 hon piaknawnte ziak in a min i phat ahi.

1. YOUTH WITH A MISSIONS TEAM IN PRACTICAL MINISTRY FIELD AH NEI: Youth With A Missions, Dehradun base, Discipleship Training School apan student 6 in February kha sung Field station tuamtuam; Birtamode, Budhabare, Pathari, Kirtipur, Chisang, Phidim, Gopetar, Faklung, Bungrung, Angepa leh Angkhop Saptuam vehna leh practical ministry lohchingtak in nei uhi. A kallak a vehtu ding Toupa’n hon piakte ziak in A min i phat hi. Saptuamten phattuampih mahmah uh chih thu kiza hi.

2. MIZORAM DIVISION IN NEPAL FIELD VEHNA NEI
Divisional Superintendent, Mizoram Division makaih in Division Missions Committee mi 12 in Nepal Missions Field vehna nei uhi. Amaute February ni 23, zinglam dak 9:00 AM in Field Office, Birtamode tung ua, Field Working Committee in kipaktak in ana vaidawn hi. Hiai hun lemtang a la in, EBC HQ tungtawn a kileithak, Bolero SLX Field nasepna a manpha tak a zat ahihna ding in Pathian khut a kepsakna leh latna Rev N Thawndoulian, DS, Mizoram Division in nei hi. Amauten field a a omsung un, NEBC Shantinagar, Budhabare, Dharampur, Padajungi, Damak, Pathari, Kirtipur, Chisang leh mipi biakna kikhop NEBC Birtamode ah manpha leh lohchingtak in zang khawm uhi. February 26, 2017 zingkal in Buttabari station zuan ua, Buttabari ah kikhopna hun 2, Nepali pau a kikhopna leh Paite pau a kikhopna zing leh nitaklam in zang uhi.

Mizoram Division apan a vehtute’n saptuam a phakna teng uah thilpiak manphatak a piak ban uah, Saptuamte adia thumsakna nei zel uhi. Semtute innluahna teng leng siik in, amaute a dia thumsakna leng nei uhi. Nitak chiang in, Field Centre ah kithuahkhawmna nuamtak – sun hun zatna apan a sharing omte ngaihkhiakna leh thumkhawmna hun zang zel uhi. Saptuam vehkhak a omte’ kipak thei mahmah uh ahihdan leh Field a semtute leng tha guan mahmah uh ahihdan Field Superintendent apan report kimu hi.

3. KIPAHTHU GENNA & THUMNA DINGTE:
1) February kha sung in Pathian in Gingthak mi 10 leh Baptisma tang mi 6 a hon piakte ziak in A kiang ah kipahthu gen in, Khalam a ahong khanlet zel theihna ding un thum zom lai ni.
2) Taplejung station ah nungtolh mi 4, Pathian in i semtute zang in tungding thaknawn. Amaute Virendra Limbu, Dilam aya Limbu, Samuel Limbu leh Barsha Limbu te ahi uhi. Kipahthu gen in, a hong hat zomzelna ding un thumpih ni.
3) Solfa Training leh Choir practice May 3-9, 2017 chiang in field in neih sawm uhi. Teacher ding leh a sintu dingte ban ah, Field ading a masawnna thupitak hong hihtheihna ding in thum ni.
4) Short course Bible Training, June-July kha in neih sawm uh, lohching leh manphatak a zoh ahihna ding in thumpih ni.
5) Haldibari Fellowship in biakna mun ding poimoh mahmah ua, Field in temporary building khat bawlna ding sanction. Biakin kilawm tak ahon bawl pah theihna ding un thumpih ni.
6) Bungrung Fellowship ading gingtu innkuan khat in gam honpia, register bawlzoh hita. Pathian kiang ah kipahthu gen in Biakin tung dingpah ahihna ding in thum ni.
7) Basbare Saptuam ading gam lei ding FWC in thukim a, mun 2 saikak lel uh. Pathian in mun kichian tak a hon piakna ding in thum ni.

B. KARBI ANGLONG MISSION FIELD:
Toupa’n semtute tungtawn in Dan siangthou a koppih nei thak 05 leh Nau lat ding khat hon piak nawn ziak in A min i phat hi.
1. SCHOOL HONNA LEH LATNA:
School tungtawn a Pathian Lalgam kekletna ding in, EBCC New Langrik in sum tamlou a neih uh zang in, koimah a huhna ngenlou a theihtawp a tha le zung tampi seng a a lamkhiak uh, School building thak honna February 12, 2017 in Field Superintendent in nei hi. Programme zoh in Saptuamte’n kipahna singpi dawn khawmna nei uhi. EBCC New Langrikte nektawm zong ngen hinapi in, a kipiak zohna uh thupi leh phathuai mahmah hi. Tuni’n hiai School ah naupang 42 vel in admission bawl uhi. A hong lohchin zelna ding in Pathian kiang ah thumpih ni.

2. SAPTUAM SILVER JUBILEE:
EBCC Paklongkam in February 22, 2017 in, Pathian pina leh hoihna a tante phawk in Silver Jubilee lawpna thupitak in zang uhi. Hiai Jubilee hun ah a kim leh kiang a Saptuam dangte ban ah Field sung a Saptuam makaite Pastorte, Upate, Missionaryte a hi thei bangbang vakihel uhi. Huan Biakna leh phatna te Field Choirte’n siamtak in makaih uhi.

Hiai Silver Jubilee hun in Field Superintendent leh Asst.Field Superintendent te’n “Khrist Nungjui Gingtute Khovel Mite muh leh Theihtheih a Hinna” chih thupi pansan in thutak genna hun khatvei tuak nei ua, mipi paikhawmte’n nuamsa mahmah uhi. Saptuam leh School din kum kibang ahihman in, Biakin leh School ah Jubilee suang phut tuak ua, FS & AFS ten khat tuak in a honna leh latna nei uhi.

3. TONIC SOLFA CERTIFICATE HOLDER CAMP:
Field sung Laa lam a makai ding sekkhiakna ding ngimna in February 8-11,2017 sung EBCC Rongchingri mun ah “Tonic Solfa Certificate Holders Camp” nei uhi. Hiai hun ah Resource Person/Sinsaktu in Evan. H Jamkhanmang leh Mr Daniel Rongpi pang uhi. Hiai Camp ah Tuailai Field Saptuam mun tuamtuam akipan Tonic Solfa Certificate neisa mi 14 kihel thei ua, phattuampih mahmah ua, La kaih bawlthei leh harmony bawlthei pawl leng omta ahihdan report sinsaktute akipan in kiza hi.

4. FIELD DEVELOPEMENT WORK PAITOU ZEL:
Field sung a Quarter omlouhna munte; Rongali, Bithilangso, Disama, Dengaon, Mijung Area, Manja leh Tari Adong munte ah Field Central Working Committee malakna toh quarters ngaihtuahna pailel hi. Inn luah ding lemtang omlouhna munte ah inn bawlna nasep paitou lellel hi. Mijung Area kichi Station thak hi a, tukum a kipan Semtu 2(nih) koih sawm hi a, a omna inn (Quarter) ding uh bawlna mun ding in Mijung area a Terang Arong, Hausapan (amah gingthak) a gam Pathian min in hon pia hi. FS, AFS, Evangelist-te ban ah Office Staffte’n Inn bawlna ding mun etna leh inn gelna mun ding a sukfel nung un, Field Superintendent in Pathian kiang a latna nei in inn bawl kipan ngal hi.

Tari Adong a Saptuam in gam lianpi i neihsa mun puah sawm in naktak in panla lellel uhi. Tu kum sung ngei a School leh Biakin tungkhe ding in field in ma lakpih hi. February 17,2017 in School mun ding, Biakin mun ding leh Ringwell omna mun ding site selection bawl felta ua, huai ni mah in, Ringwell bawlna mun ding FS in Pathian kiang latna nei hi. Huchi bang in, Field sung mun tuamtuam ah Development Work paitou zel hi. Thumna in delhzui ni.

5. ONE DAY CEREMONIAL PERFORMANCE SEMINAR:
Field Working Committee (FWC) saina in field in February 28, 2017 (Tuesday) in EBCC Rongchingri, Diphu mun ah Ordained Pastor leh Upate ading biik, Saptuam in Ceremony a neihte sai/hih dan kisinsakna hun zatna nei uhi. Hiai Seminar hun in Field Saptuam mun tuamtuam a kipan Pastor 4 leh Upa 12 omte kihelkim theivek uhi. Hiai hun ah sinsaktu in Rev M Zalian Guite, FS leh Pastor T. Thanggoulian, Dimapur te kizang uhi.

6. KIPAHTHU GENNA & THUMNA DINGTE:
1. Disama area ah Evan Binalson Teron (NCE) kisawllut, awiloute toh khua khat a omkhawm, Karbi Honghari (Awilouten) Christian Evangelist ahi chih a theih tak un, huchibang mi kho sung a omtheilou ding chi ua, a kigen zoh keileh om mun suan ngai ding; naktak in Saptuam misiangthoute’n thumna toh Pathian buan ni.
2. 5KM Lumding Road mun a Mr. Giten Phangchote nupa in a tanu neihsun uh Ms. Jirka Phangchopi (11yrs) damlouhna (phungjol natna) toh kisai damna lunggulh in Christian a hong kipiak sawm Salam kia hilou khalam damna leng poimoh mahmah; Hihdamthei Pathian in A thupina a muhsakna ding in thumpih ni.
3. Pastor T. Pauzalian Taksa lam hatlouhna ziak in, March 2017 sung sick leave la a Imphal ah ki-enkolsak hi. Hoihtak a hong dam a, a sepna maban a hon sepnawn theih pahna ding in thumpih ni.
4. Dengaon Bazar area a om Mr. Hon Teron leh a innkuante Khristian lunglut mahmah uh, a lunglut bang ua Khrist khebul a a hong kipiak theihna ding un thumpih ni.
5. Dengaon a Unau Mr. Sikari Ingti leh a zi Mrs. Mekri Beypi damlou a omden, i na thumpihzel uh, himahleh a veng ua awilouten ‘na dam zou nawn kei ding uh’ chia a lungkiakna ding uh genpih sek uh, lungketak leh kingaisetak a om, thumna dawng pa’n mihing lametna bei nung in damlam manoh sakta hi. Pathian kiang a kipahthu gen in, a hong damsiangna ding un thumpih lai ni.
6. Manja Area a Jari Teron Khua a om Mr Sonjoy Kro leh Beyte innkuan Christian lunglut, himahleh kipekhe ngam chiah nailou, a hong kipiak ngam pahna ding un thumpih ni.
7. Native Casual Evangelist sem ding mi 12 Pathian in a hon piakte ziak in kipahthu gen ni. Amaute khenkhat mi thak ahihman un thumpihna poimoh mahmah uhi.
8. Pinkhat Rongpi Khua a om Mr Deuri Timung ban ah Mrs Basapi Rongpharpi of Phuloni ten taksa lam damlouhna ziak in, damna lungulh in EBCC Dengaon naih uhi. Saptuam nei pa Pathian in a lamet uh damna nei ahihman in, salam kia hilou khalam tan a damna a hon neihtheihna ding un thumpih ni.
9. Khristian lunglut mahmah Disobai mun a Mr. Sona Ingti leh Patradisa mun a Mr. Zen Rongpi, Mr. Zen Timung ten Khrist mu chian a, a hong kipiakpah theihna ding un thumpih ni.
10. Ji-Tleplong Area Teron Khua kichi Khristian lunglut leh kihong mahmah ahihdan uh zak ahih dungzui in, a mun a semte bangzah vei hiam valutta, a hong kipiak ngamna ding un thumna toh delhzui ni.
11. Ji-Tleplong a om Mr Bimol Teron, Mr. Gautom Ingleng Khristian lunglut mahmah, daltu omte tung a vualzou a Khrist khebul a a hong kipiak theihna ding un thumpih ni.
15. Field sung a School 7 (sagih) i neihte Tangthupha genna vanzat phatuam a hong hihna ding leh naupangte lohchinna ding in thum ni.

C. DHEMAJI MISSION FIELD:
Dhemaji Missions Field a Toupa’n semtute tungtawn in Gingthak 02 leh Baptisma tangthak 02 a hon piaknawnte ziak in kipahthu gen ni.
1. BAPTISMAL PROGRAM: February 2017 sung in Namgharia ah Pathian in gingthak mi 2 (Nupa kop) hon pia a, amaute’n Baptisma tang ngal uhi. Hiai gingthakte semtute’n Pathian thu a hilh tung un khauhsim mahle uh, a pasal pen a manglam ah Khros lim piak in om hi. Huai akipan gingtu hikei le ung Pathian in phuba honla ding chiin patauhna nei ua, semtuten leng delhzui zel in, atawp in thupukna honla thei khong uhi. Baptisma tanna ding tanpha a pianna nu sihna lui/mun mah tel uhi. Huan hiai khua mah ah gingtu inkuan-2 leng kibehlap hi.

2. FS QUARTER & OFFICE BUILDING BAWLNA IN MASAWN: January 11, 2017 a kipan Field Superintendent Quarter-cum- Office ding bawlna pai hoih zel hi. Foundation earth filling zoh hita, hiai report gelh ahih tan in doors, windows, ventilation frame teng bulhzoh hita. Maban ah septic tank, overhead tanky toh sepkhawm hipah ding hi. Insun ding iron/pipe bangkim leikhit hita. Nasemte’n lamzang tak a hon sepna ding un thumna ah phawk chiat ni.

3. FIELD IN KUMTHAK BUDGET Ding in ` 2,53,500.00 POMNA NEI: Semtuten thilpiak toh kisai gingtute a sinsakna uh phatuam mahmah a theih ahihna ah, Field Working Committee in sum kum thak April 2017-March 2018 budget ding in Rs. 2,53,500.00 pomna nei hi. Field ading a masawnna thupi khat hi a theih ahih man in hiai ah i taklang hi.

4. KIPAHTHU GENNA & THUMNA DINGTE:
1. Field a project i neihte sepna ding a poimoh bang a support pia mimal leh saptuam te ban ah EBC HQ ziak in kipah thugen in, lohching leh lamzang tak a sepsuah ahih theihzelna ding in thumna ah phawk ni.
2. Field a semtu FS makaih cross-cultural missionary- 8 leh Native Evangelist-7 ban ah, Allowance tamlou piak a semtu mi-3 te ziak a kipah thugen in, amaute’n gahsuah sem a honsep theihzelna ding un thumna ah phawk ni.
3. Mrs Sila Pait, Pityangchaopri mun a i gingtu in lungsim buaihun nei zel, kha gilou in a khoih hi ding in muangmoh uh, a tanchin a zak akipan Dr Jamthianlal Valte in awlmoh huaisa in damdawi khak a, neksak ahih a pan phatuam mahmah a theih ahi. Hong damsiang nading in Pathian kiang ah thumpih zomzel ni.
4. Mr Gunadol Pegu, Namgharia a om TB natna ziak in hunsawt tak damlou a om in, a gimsiat luat ziak in a zi in taisan a, a ta kum-3 toh kia khosa uh. Tuin thumna te ziak in hong hoih mahmahta Pathian kiang ah kipahthu gen in thumpih zom zel ni.

D. MANIPUR MISSION FIELD:
Manipur Missions Field ah Toupa’n semtute tungtawn in Ging thak 01, Sawm-a-khat pethak 07 & Missionary support thak 05 hon penawn hi.

KIPAHTHU GENNA & THUMNA DINGTE:
1. Immanuel English School, Thiyamkonjin in masawn mahmah, Khalam leh salam ah Pathian ompihna leh makaihna ngetsak ni.
2. Native Casual Missionary te’n leng theihtawp in semzel uhi. Maban a pan a hon lak zelna ding uah thumna in delhzui ni.
3. Field Baptist Dorcas Fellowship in khateng a anngawl thumna ana neihsek uh, April 8 - 10, 2017 sung Jiribam ah Dorcas Committee makaihna in vehna leh anngawl thumna neih pih ding uh. Thumna in phawk ni.
4. Thanga Salam a Biakin bawl a om lel bandh/blockade te ziak in zohsiang theihlouh in om. Pathian ompihna tang a, hon zohsiang baih theihna ding un thumpih ni.
5. Field a semtute’n gingloumite counselling a neih pih lelte un Jesu Khrist a hondampa ding ua hon san theih nading un thumpih ni. Semtute leng Pathian kha siangthou vanzat ahih theihna ding un, kha vehna leh ompihna ngetsak ni. 