Amasa in Gammial Aw simtute tengteng i Toupa leh Hondampa Jesu Khrist min in kumthak chibai! Kum thak toh kiton in Toupa’n thil thupitak hon musak zel a, mission nasepna leng khawllou a paizom theizel ahihna ah kipahna lian mah mah hi. Tukha inleng Toupa’ vualzawlna i muh, anuai a bang in enkhawm nawn leng i chi hi: A. NEPAL MISSION FIELD:
Toupa’n semtute tungtawn in Gingthak 15, Baptisma tang 14, Sawm-a-khat pethak 08, Ginna Thuchiam bawlthak zah 04, leh Dansiangthou a koppih nei 02 hon penawn hi. 1. CHYANGTHAPU AREA GROUP EVAN.GELISM REPORT:
Chyangthapu mun ah December 8 & 9, 2016 in Tanchinhoih genna i semtu mi 10 leh huai bial a gingtu mi 2 (voluntary a va kihel) in ni nih sung nei uhi. Hiai hun in inn 135 ah lut ua, tanchinhoih laidal 450 hawmkhia uhi. Milip 280 te kiang ah Tanchinhoih genna neithei uhi. Group Evan.gelism neihna ah a lunglut mi tamkhop tuakkha ua, hiai area a i Evan.gelist in a na sutzop ding in om hi. Thumna in delhzui ni. 2. CONSULTATION ON DISASTER RESPONSE FOLLOW-UP PROGRAM ZATNA OM:
October 2016 a Field Office a APBAid sponsor-na a field in “Consultation on Disaster Response Follow-up program” mun 6 a zat dia gelsate lak ah December 2016 sung in mun 3 leh January 3, 2017 in mun khat ah zang thei uhi. Hiai hunte ah, Holistic Ministry, Disaster- How the Church should response, Christian Responsibility in Development and Growth in the Community leh Bible tea ching about Christian approach to Poverty chihte sinkhawm uhi. Phatuam leh manpha sa mahmah uhi. 3. FIELD DORCAS MALAKNA-TANCHINHOIH PUANZAKNA:
Field Dorcas Fellowship makaih in December 13, 2016 in Buttabari biakin ah “Advent Christmas” zang uhi. Hiai hun ah ginglou mi 40 va kihel ua, Tanchinhoih genna Evan. Dinesh Khadka in nei hi. Buttabari BYF in lapawl leh drama lahna leng nei a, Program zoh in annkuang umkhawmna nei uhi. Buttabari Dorcas Fellowship in hiai program lohchinna ding in anngawl thumna nei in, a khua ua ginglou innkuan 95te kiang ah chialna lai hawm uhi. Gah kipahhuaitak muh in om a, tu in follow-up program in zui lellel hi. Kipahthu genkawm in thumna in delhzui ni. December 25, 2016, Khristmas ni in Gopetar biakinn ah gingloute ngimna in Field Dorcas Fellowship malakna in hun zatna nei uhi. Ginglou milip 65 va kihelthei uhi. Tanchinhoih genna Evan. Prem Raj Rai in zang a, annkuang umkhawmna leng neingal uhi. Hiai hun a ginglou va kihelkhate ading in thumzom zel ni. 4. PHATNA LEH THUMNA DING:
1. 2017 sung a casual a semtu ding Native worker 22 lak hita. Amaute’n gahsuahtak a a hon septheihna ding un thumpih zelzel ni. 2. Transfer a om semtute’n a sepna mun thak ua kithalawp tak a a hon septheihna ding un thumpih ni. B. KARBI ANGLONG MISSION FIELD:
Karbi Anglong Field a Toupa’n semtute tungtawn in Gingthak 03, Baptisma tangthak 07, Sawm-a-khat pethak 02, leh Mission Support thak 02 leh Dansiangthou a koppih nei 01 a hon piaknawnte ziak in a min i phat ahi.
1. FIELD IN OPEN AIR PREA CHING NEI:
Field Office leh local saptuam te pangkhawm in Mijung area a Terang khua, Patradisa khua, Disama Area leh Kamsing Ingti Village te ah advance Christmas leh Open Air Prea ching manphatak in nei uhi. Hiai hun ah ginglou mi 200 val bang paikhawm in ankuang umkhawmna leng nei uhi. Ginglou mite Pathian thu lunglut mahmah ahihman un, thumna ah phawk ni hang. Semtuten leng tha-it mahmah uhi. 2. MUN TUAMTUAM A MINISTRY:
December 4-7 sung EBCC Tari Adong local Committee leh Amun a om Evangelistte Group 3 kisuah in, ginglou khua ah nek ding kipuak in zan 2 vagiak ua (1) Arthem Adong Khua, (2) Biren Rongpi Khua, (3) Lang etso khua (4) Longki Teron khua leh (5) 11 Kms Hanse khuate ah inn lut in Pathian thu genna vanei uhi. Hiai hun ah Damloute thumsakna, Damdawi hawmna leh nitak chiang in Bible thu toh kisai Film suahnate vanei uhi. Damlou thumsakte lak ah, ka hongdam leh Khristian ka suak ding chi hunkhop om a, kipahthu genkawm in thumpih zom ni. 3. GINGTU KIBEHLAP:
Dengaon area sung a, Jangmi Bey Khua ah, Evan.gelist te thugenna a kipan in December 21, 2016 in mi 7 ten Pastor T. Pauzalian khut ah baptisma tang uh. Kipahthu gen in, thumna ah delhzui ni. 4. THUTUAMTUAM:
1) Diphu Rongchingri mun a, Field source of income maban ding khualna in, EBC HQ leh Field Pangkhawm in SCHOOL Building kilam zoh hita a, Director of Missions in January 19, 2017 (Ningani) in honna leh latna nei hi.
2) Field sung a EBC HQ huhna in Pastor Quarter leh Field sung Saptuam lian deuh Rongali leh Bithilangso Biakin bawlna pailel. Zohpah ahihna ding in thum ni.
3) Mr TP Hanse in Dengaon a gingthak Mrs Mekri Beypi damlou panpihna Rs 2000/- Bialtu Pastor tungtawn a a piak ban ah EBCC Bithilangso ading PULPIT hoihtak leng pia hi. Thilpiak petu tung ah kipahthu i gen a, Toupa vualzawlna i ngetsak hi. 5. THUMNA LEH KIPAHTHU GENNA POINT:
1. Sikari Ingti leh a zi Mekri Beypi damlou salam damna lunggulh mahmah in Khristian hong suak, Saptuamte thumna ziak in hong damdeuh ta, a dam siangna ding in thumpih lai ni. 2. Pathian thu leh Khristian lunglut mahmah, Harchi- ali Khua a om Benarson Rongpi, Sing Terang Khua a om Ms Basanti Terangpi, Bikrom Terang leh Jari Teron khua a om Bey Innkuante alunglut bangbang ua hong kipiak theihna ding un thumpih ni. 3. Field sung a Native Casual Evan.gelist Appointment piakthak a omte, nak zawsem leh hiamzawsem a a kizat theihna ding un, i thumpih sa sa himahleh thumna toh panpih lai ni. 4. February 8-11, 2017 Diphu Rongchingri mun a, Field sung a Tonic Solfa instructor sekkhe dia training om ding, alohchinna din sinsaktute leh sintute thumpih ni. 5. One-day Seminar on “Field Elders’ Practical Training” February 28, 2017 in Diphu Rongchingri mun ah om ding. Resource Person in Rev M.Zalian FS leh Pastor
T. Thanggoulian pang ding uh. Thumna ah phawk ni. C. DHEMAJI MISSION FIELD:
Dhemaji Mission Field a semtute tungtawn in Toupa’n Gingthak 5, Baptisma tangthak 5, Naulat 1, leh Sawm-a-khat pethak 1 hon piaknawn te ziak in a min i phat ahi. 1. CHRISTMAS & BAPTISMAL PROGRAM:
December 25, 2016 in Dunaguri khua a Christmas lopna hun ah gingthak mi-4 ten FS khut ah baptisma tang uhi. Amaute gingtu muanhuai hong hih theihna ding un thumna ah delhzui zel ni. 2. NEW YEAR PROGRAM & BAPTISMAL PROGRAM:
EBCC Lachangaon mun ah kumlui khakna leh kumthak lopna program kithuah lohching tak in zang ua, hiai program hunsung in gingthak
mi-    1 in Pastor S Thangbiakmang khut ah baptisma tang hi. Ginna a hong pichinna ding in thumpih ni. 3. CHRISTMAS & NEW YEAR PROGRAM LOHCHING:
DMC/LND Division in Dhemaji field a saptuam haksa deuh diakte annkuang luina ding in huhna pia hi. Hichibang hun ah ginglou mi tamtak annkuang um ding a paikhawm sek uh ahihna ah, saptuam tawmchikte ading in puakgik suak thei zel hi. Hiai thilpiak saptuamte lakah field in hawmzak a, amaute’n manpha tak a zangchiat in baptisma tangthei mi 5 Pathian in hon pia hi. Thilpiak petute tung a kipahthu genkawm in, thupina Toupa i pia hi. 4. KANGKAN BIAKIN BAWLNA PAI HOIHZEL HI:
DMC/LSD te’n Kangkan biakin bawlna ding a a piak uh 1.5 Lakh pansan in biakin bawlna pai touzel hi. Nasep hoih leh kilawm mahmah a hih man in saptuamte kuapeuh kipak chiat uhi. Tuabang zel a a pai theih leh nasep zohsiang pah lamet ahi. Thumna ah phawk ni. 5. DIGOLGORAH LEH PITYANGCHAPORI MUN AH GAM LEI HIPAHTA DING:
Digolgorah leh Pityangchapori mun a biakin leh Quarter bawl theihna mun ding bhiga khat tuak a lian gam leiding toh kisai in, HQ in lemsakna a piak bang in leikhiak pah hita ding. 6. BDF/EBCC GUWAHATI TE THILPIAK HAWM KHIAK HITA:
BDF/EBCC Guwahati Saptuam miten puansilh (second hand) tamtak field a hawm ding in thon uhi. Hiai thilpiakte Christmas Gift in semtute tungtawn a hawmkhiak ahi a, thilpiak ngah gingtute’n kipahpih thei mahmah uhi. Thilpiak petu leh tangtute Pathian in a leh tampi’n vualzawl hen. 7. KIPAH THUGENNA LEH THUMNA POINT DINGTE:
1) Field ading thilpiak tatsatlou a lut zelte ziak in kipah thugen in, thilpiak dongtu te’n Khrist Itna a theihchian semna uh ahihna ding in thum ni.
2) Hq. in field a semtu thak ding a a piak Evan. Haukhosiam te nupa ziak a kipahthu gen in, amaute sepna ding munthak ahihna ah kim leh kiang toh ki adjust a gahsuah tak a hon sep theihna ding un thumpih ni.
3) Dhemaji town ah field office-cum-quarter bawl kipanta, buaina bangmah omlou a zoh ahihna ding in thum ni. D. MANIPUR MISSION FIELD:
Manipur Mission Field a Toupa’n semtute tungtawn a Gingthak 14 a hon piaknawnte ziak in a min i phat ahi.
1. FIELD IN CHRISTMAS GIFT DONG:
Kum 2016 Christmas leh Kumthak 2017 lopna, field in gahsuah, lohching leh nuamtak chiat in zang thei uhi. Fellowship khenkhat, amau kia a nekkhawmna bawl zouloute khualna in Lamka North Division Missions Committee in nekkhawmna ding huhna pia hi. Imphal Division Missions Committee in leng Field sung a haksa deuhdeute Christmas Gift pia hi. Thilpiak dawng tute kipak petmah uhi. 2. KIPAHTHU GENNA & THUMNA DINGTE:
1) Toupa’n khamangthang mi 14 honpiakte ziak in kipahthu genni. Amaute khalam a hong pichinna ding un thumpih ni.
2) Tu kum thak a Toupa’n thilpiak pe mi tamsem, gingthak, leh baptisma tang ding tamsem hon piakna ding in thumni.
3) IES Thiyam Konjin skul tungtawn a Toupa gamna i sepna in ma sawnzel, kipahthu genkawm in, thumpih ni.
4) Thanga Salam a biakin kibawl lel sumlam taksap ziak in deih bang in hatzou lou a, semtu Pastor O. Manibabu leh a saptuam kepte’n tha-ittak in sem zel uhi. Hoihtak a hon zohkhiat theihna ding un thumna ah phawk ni.
5) Kum 2017 pen khamangthang tamsem matna kum ahong hihna ding in thumni.
6) Field Accountant thak G. Liansuanmung leh a innkuante’n Field Office mun ah join ta. Amaute’n lohching leh gahsuah tak a a sep theihna ding un thumpih ni.