Amasa in Gammial Aw simtute i Toupa leh Hondampa Jesu Khrist min in chibai! Toupa hoihna ziak in Missions Field i neihte apan gah kipahhuai taktak report tungtawn a i muh zelte ziak in kipahhuai i sa hi. Ban ah, Partnership a i sepkhawmpihte toh leng lamzang a semkhawm tou theizel i hihna ah manpha mahmah hi. Hiipi leng lak a septheihdan lampi zong a i sepkhawmnate uh Pathian in hon vuaksuak saklou ahihdan hiai anuai a report-te enkhawm nawn ni.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. Toupa’n Field a i sepgahte hon musak zel in, semtute tungtawn leh thumtute tungtawn in gingthak, baptisna tangthak hon penawn hi. Gah thak i muhte ziak a kipahthu gen in, amaute ginna a hong pichinna ding un thumna tampi toh delhzui zel ni.

2. Chisang Biakin December 30, 2020 apan bawlpat a om zoh theih a omtaak toh kiton in July 31, 2021 in a honna leh latna Pastor Dilip Kumar Samal, Assistant Field Superintendent in nei hi. Hiai hun in Saptuam milip 60 vel kihelthei uhi. Hiai Biakin bawlna EBC Headquarters, Lamka North Division, Chennai apan leh Field leh Local pangkhawm a bawl in om hi.

3. Covid-19 vei kha semtu Evan. Manoj Rana Magar, Shantinagar station leh Evan. Jemson Ngaihte, Pakyong station-te thumnate tungtawn in damta uhi. Ban ah, hun sawtkuamtak damlouhna ziak a i na thumpih zel uh Evan. Sangbiakmawi leh a lawipa Mr. Mung Guite leng damta uhi. Amaute hong hatzom ua, a sepna uh chidamtak a hon sutzop zel theihna ding un thumpih lai ni.

4. I semtu Evan. Urmila Rai, Jirmale station a i semtu in koppih pasal a neih ziak in Evangelist nna a sepzom lemtang nawnlou a, amah mun ah Evan. Subash BK in July kha kimlai apan in semta hi. Evan. Subash leh a sepna khua Jirmale Saptuam thumna ah phawk ni.

5. Tanglepa Saptuam kiphuhkhiak nung kum 25 chingta hi. Kipahthu genna hun zat ding May kha sung in sawm mahle uh lockdown ziak a zat theihlouh in om hi. Hun lemtang dang Pathian in a piakna ding in thum ni.

6. Pathari Saptuam in October kha sung in Saptuam dinkhiak nung kum 25 chinna zat sawm uh ahihman in Pathian piina ngetsak ni. I Field sung a Saptuam Silver Jubilee tan chingthei 07 bang phatheita ahihna ah kipahhuai i sa hi. Hiai tan hon pitu Toupa kiang ah kipahthu gen ni.

7. Baby Ruth BK kha 4 lel in July 22, 2021 in Birtamode a B & C hospital ah hon beisan hi. A nu leh pa Mr. Amrit leh Tara te khamuanna ngetsak ni. Amau Taplejung Saptuam a member hi uhi.

8. Mr. Lal Bahadur BK (79), Dharampur saptuam a om in July 27, 2021 in a tangtawn mun ding hon zotsanta hi. A nutsiat inkuan leh saptuam mite khamuanna ngetsak ni.

9. Jorethang a i semtute tungtawn a gingthak i muh Mrs. Sunita Kamre leh a tanu Miss Vaishnava Kamre, Pune a khosate ading in thumsak ni. Khalam a a khanna ding uh, a gal a sai lemtang gige lou thei ahihna ah, Pathian kha ompihna ngetsak ni.

B. DHEMAJI MISSION FIELD

KIPAHTHU GENNA LEH THUMNA DINGTE:

1. Toupa’n a mi siangthoute thumna leh semtute tungtawn in halhthakna ngah mi-5, piangthak mi-2, leh sawm-a-khat pethak mi-3 hon piak nawnte ziak in kipahthu gen ni.

2. Mrs Anamika Taye taksa hatlouhna leh lungsim lam a thawmhauna leh lauhna nei in omzel hi. Semtute’n Pathian thu houlimpihna leh thumna a neihpih nung un hoihdeuh hi. Himahleh, ginna a kalsuan ding a inkuante’n lem salou zel uhi. Pathian kiang ah thumpih poimoh mahmah hi.

3. Gogamuk area a houlimpihna neih a om lellel Numal Pegu leh Happy Pegu te’n Pathian dik hon muh ua, gingtu hong suahna ding un thumna ah delhzui ni.

4. Mrs Sharno Kaman leh Miss Sisily Chintey taksa damlouhna ziak a Dhemaji a hospital a ki-enkolte field in vehna nei thei uhi. Amaute a damlouhna uapan damkheta ahihna uah kipahthu gen ni.

5. Lockdown ziak in mipi biakna om theikei mahleh semtute’n houlimpih bangzah hiam nei lellel uhi. Amaute’n Pathian dik hon muhna ding un thumpih ni.

6. Covid-19 second wave hattak in i sepna area hon nawkkha hi. Semtute kuan khe gige theikei mahle uh, amau batphakna tanchiang chiang ah tha-ittak in sem teitei uhi.

7. Tulai gingtute lak ah nupa kal buaina nei om zeuhzeuh uhi. Semtu missionary-te’n Pathian thu toh pang in lemzel uhi. Nupa kal a Jesu Khrist a laigilpen a a pantheih gigena ding in thumpih ni.

8. Covid-19 hiipi lak apan semtute leh gingtute a bittouh zelna ding un thum ni. Biakna neih lemtangkei mahleh semtute’n home fellowship makaih thei zel uhi. Apoimoh bang in ministry leng nei thei zel uh.

9. Lockdown kikhop theihlouh sung in Dunaguri Biakin leh Bandena biakinte puahphatna zoh in om thei hi. Hiipi nuai ah semtu kuankhe sekte venbit ahihzel ziak un kipahthu gen ni. Amaute chidam a apoimoh bang a kal hon suanzel theihna ding un thumpih lai ni.

10. Tulai in gingtute’n lou nasep tha-it mahmah uhi. Vuahzu-daikai, nisa-kholum lak ban ah, hiipi leng lak a sem ahihna uah thumpih ni.

C. MANIPUR MISSION FIELD

KIPAHTHU GENNA LEH THUMNA DINGTE:

1. Toupa’n semtute tungtawn in gingthak, sawm-a-khat pethak leh Mimal Missionary vakna pethak hon piak nawnte ziak in kipahthu gen ni.

2. Toupa’n semtute salam leh khalam a hon kepbitsak zel ziak in kipahthu gen ni. Semtu muanhuai, ginom leh chihtaktak a nasemte ziak a masawn zel i hihna ah, amaute thumna tampi toh delhzui zel poimoh mahmah hi.

3. Tatsat lou a, itna khitui toh thumna a pang gige, Pathian it, saptuam mite ziak in kipahthu gen ni. Pathian thu lunglut, field a semtute’n houlimpih a neihlelte uh itna toh hon bohzui ua, khalam pianthakna diktak ahon neihtheihna ding un thumsak ni.

4. Pastor S. Deban pianna pa (L) Mr. S Yaima Singh in July 30, 2021 in Raj Medicity, Imphal ah honna beisan hi. A nutsiat inkuante ading in khamuanna ngetsak ni.

5. Saptuam phuhna leh kepna pichinna ding a poimoh mahmah Biakin leh semtute omna ding Quarters kilam lelte hiipi ziak in dinkhawl phot hi. Toupa’n hunpha hon piak a, mabante sutzop nawn ahong hihtheihna di’n thumna ah phawk ni.

6. Field a damlou omkhate damna ngah bangzah hiam omta mahle uh Covid 19 +ve a kikem lellelte Toupa hihdamna ngetsak ni.

7. Covid -19 hiipi ziak in biakkhawmna field dangte bang in neih theihlouh in om hi. Himahleh, semtute lemgel siamna ziak in zoom/online in thugenna leh thumkhawmna sai thei pawl bang om ahihna ah manpha mahmah i sa hi. Khalam halhthakna (revival) ahong om theihna ding in thum ni.

D. INTERN MISSIONARYTE TOH KISAI

KIPAHTHU GENNA LEH THUMNA DINGTE:

1. OTI Hosur, Tamil Nadu a training ding a March 30, 2021 a kuan Mr Jamkhanlian Tangpua leh H Ginkhanzam te’n Covid-19 ziak in training deih bang in va nei theikei mahle uh Pathian pina toh training September kaltawp lam in zou ding ua, September 22, 2021 in innlam (Lamka) hong kikta ding uhi. Amaute chidam a a innlum chiat uh a tun ua, a training hun ua a sinkhiak bangbangte uh tunung a Missions Field a lut hun ua a zattheihna ding un thumna in delhzui ni.

2. Intern Missionary Mr B. Kaisuanlal, Nangsonlian Ngaihte leh Miss Lianbiakmawi te hun bangtan hiam Himalayan Missions Field a Field Exposure a om nung un June 21, 2021 in a innmun chiat uh dam in tung uhi. Tua nung in, WEC te saina a Dorcas Golden Jubilee Guest House, Dorcas Hall Campus a WEC Candidate Orientation programme ah tel ngal uhi. Amaute’n a training uh August 13, 2021 in lamzang leh lohchingtak a zouta uh ahihman in kipahthu gen ni. Tunung a, a sinkhiak bangbangte uh hon zat theihna ding uleh maban a kalsuanna ding a neih bangbangte uh Pathian pina ngetsak ni.