A gam na i sepna Report pethei lai ding a hun hoih hon pia i Toupa leh Hondampa Jesu Khrist min in Gammial Aw simtute tengteng chibai! Covid-19 Second Wave in i gamsung naktak in a hon nawk a, saptuam in Field i neihte a Toupa gamna i sepna leng nidang bang in i semthei kei hi. Himahleh, a mi siangthoute thumna leh semtute lemgel siamnate ziak in sep theihdan lam tuamtuam a i sepnate tungtawn a Toupa’n gah hon piaknawnte enkhawm ni.

A. HIMALAYAN MISSION FIELD
KIPAHTHU GENNA LEH THUMNA DINGTE:
1. Lockdown in a hon hihbuai lai in kikhopna poimohsa a alampi zong in saptuam bangzah hiam in biakna azat hun ngei un “Online” tungtawn in kikhopna sunzom theizel uhi. Lockdown omsung a semtute’n Online Ministry a sai zel uh lamzang leh lohching a hon sutzop theihna ding un thumna in phawk ni.

2. Bhuttabari Saptuam in June 01, 2021 apan in tuailai a lunglutte ading in Keyboard tumdan sinna pan uhi. Hiai hun in sinsaktu in Evan. H Thangkhansiam pang hi. Saptuam dangte a leng tunung a manphatak a sinsakna a poimoh bang a piakzom ahong hihtheihna ding in thumna in phawk ni.

3. Toupa’n semtute leh a misiangthoute thumnate tungtawn in gingthak mi 2 hon piak nawnte ziak in kipahthu gen ni.

4. Lockdown ziak a mun tamtak a biakin a kikhak lai in Lockdown in a hihbuai khaklouh saptuam bangzah hiamte’n a kikhopdan ngeinate uh zui in Pathian biakna tatsatlou in zang thei uhi.

5. Grace Bible College a sin Mr. Subash BK, Basbari khua a teng in a sinlai Bachelor of Theology lamzang leh lohching in sinzouta hi. Tuin, Nepal kikta a, Jirmale station ah Lockdown kihon hunhun in Evangelist nna sem ding hi.

6. Mr. Neel Kamal Bose, kum 45, Bhuttabari EBCC member in a sepna mun Haryana ah Covid-19 hiipi ziak in May 05, 2021 in Toupa kiang ah hon paisan hi. A nutsiat a innkuante thumsak in Pathian khamuanna ngetsak ni.

7. Covid-19 hiipi ziak a damlouhna tuak, lockdown ziak a nektakzonna a buaina tuak bangzah hiam i Field sung mi omkha ahihna ah, hiai buaina in maban khosakna ding hetkha mahmah ahihman in Pathian hehpihna tuabang mite ading in ngetsak ni.

8. Mr. L Khupminthang Ngaihte, i semtu Pastor Paukhankhup, Gopetar station, tapa in GBC a Bachelor of Theology zou in Evangelical Theological Seminary, Hosur, Tamil Nadu a Master of Theology sinna sunzom ding a kisa ahihman in thumpih ni.

9. Mr. Chod Kumar Rai, Khadkagaon EBC Fellowship member in gari accident ziak in liamna tuak a, Birtamode damdawi inn ah May 31, 2021 apan ki-enkol hi. A hong damsiang pah nading in thumsak ni.

10. Covid-19 hiipi leh Lockdown in Field programme geelsa bangzah hiam hetkha mahmah mai hi. Tuate lak ah Field Kumsim Khawmpi July 01-03, 2021 sung a neih ding a geelsa a om September 21-23, 2021 sung a neih ding a suan gamlat in om hi. Pathian ompihna toh programme zat ahihtheihna ding in thumna in phawk ni.

B. DHEMAJI MISSION FIELD
KIPAHTHU GENNA LEH THUMNA DINGTE:
1. Mr Probash Doley, Gogamuk area a i sepna a gingtu suakthak himahleh baptisna tang nailou tulai natna Covid-19 in a na positive kha hi. Hiai natna ziak a a ginna a bahloh mailouh a, a hong damsiangna ding in thumna in delhzui ni.

2. Mr Biju Taid leh Puspalota Kuli-te taksa damtheihna kitasam mahmah uhi. Mr Biju Taid pen in a khenchiang in nak haksa sasek a Doctor-te’n Jaundice damdawi toh enkol uhi. A natnate ua pan hong damsiangna ding un thumpih ni.

3. Mr Rajen Taid leh a inkuante Covid-19 positive kha uhi. Amau hiai report gelh ahih tan in buaise zen dinmun in omlou uhi. Amaute khua Amguri ah mi-30 vel bang positive muhkhiak in om hi. Hong damsiangna ding un thumpih ni.

4. Lockdown ziak in biakin ah kikhopkhawmna om theikei mahleh gingtute group a kikhen in mimal in pansan a thumna hun zang theizel uh ahihna ah Pathian kiang ah kipahthu gen ni. Maban a biakkhawmna neih ahihtheihma hiai bang a gingtute leh semtute’n amau omna chiat a pan a laktheih zelna ding un thumpih ni.

5. Covid-19 Second wave hattak in i sepna area hon nawkkha hi. Semtute kuankhe gige theikei mahle uh, amau batphakna tanchiang chiang ah tha-ittak in sem teitei uhi. Amaute bitna ding in thumna ah phawk ni.

6. Bumakopsan, Lachangaon area kichihna khua ah semtute’n inlut a houlimna lohchingtak in neithei uhi. Innkuan-3 kimin mahmah ua theih ahihna ah kipahthu gen kawm in, Toupa’n maban a panlak ding om bangbangte panlatu ding semtute ahihna uah thumna ah phawktou zel ni.

7. Mr. Dimbesori Taye te-nupa in Pathian thu a lunggulh man un houlimpihna semtute’n nei uhi. Ginglou, Pathian thu lunggulh dang leng bangzah hiam om lai uhi. Abiktak in Mr Indera Gare, Juganando Kutum, Ms Dimpi-te’n Jesu Khrist hon muhna ding un thumpih ni.

8. Field a semtu missionary (Cross-cultural Missionary-10) leh Native Evangelist-11 ban ah, Pathian hon piak gingtute khovel hiipi nuai a bit leh nek-le-tak tasam lou a omna ding un Pathian kiang ah thumpih zel ni.

9. Covid-19 Lockdown ziak in mipi biakkhawmna omthei kei mahleh Namgharia leh Pityang area a semtute’n inn vehna nei theizel uh ahihman in kipahhuai i sa hi. Hun haksatak kal a ding himah lehang hiai bang a kalsuanna nei thei semtute leh gingtute panlakna kipahhuai i sa a, maban a a kalsuanna zel ding uh thumna in phawk ni.

C. MANIPUR MISSION FIELD
KIPAHTHU GENNA LEH THUMNA DINGTE:
1. Toupa’n semtute salam-le-khalam a hon kepbitsak zel ziak leh tatsat lou a itna khitui toh thumna a a na pang gige Pathian it, saptuam mite ziak in kipahthu gen ni.

2. Gingtute apan thilpiak a biakna sum-le-pai ahunhun a alut theih zel ziak in kipahthu gen ni. Amaute’n ahunhun a a piakzom zel theihna ding un thumpih ni.

3. Semtu muanhuai, ginom leh chitaktak a nna semte ziak a Toupa gamna i sepna in masawn zel ahihziak in kipahthu gen ni. Amaute’n tua bang a Pathian lau kawm a chidam a hon sepzom theihzel nading un thumpih ni.

4. Pathian thu a lunglut ding mi piak a i om zel ziak in kipahthu gen ni. Amaute itna toh bohzui ahih ua, khalam pianthakna diktak ahon neih theihna ding un thumsak ni.

5. Utlou Fellowship Founder Chairman Th. Ingo Singh in May 25, 2021 in Covid-19 ziak in hon beisan hi. Aluang damsa Thamnapokpi ah vui in om hi. A zi Rita leng Covid Positive a, a tapa Th. Monesh leng ICU/JNIMS tanpha a kep in om hi. A nutsiat innkuante Pathian khamuanna ngetsak kawm in, damloute a hong damsiangna ding un thumna in phawk ni.

6. Saptuam phuhna leh kepna in a kentel Biakin leh Quarters kilam lelte hiipi ziak in dinkhawl phot in om hi. Toupa’n’ hun pha hon piak a, mabante sutzop nawn ahong hihtheihna ding in thumna ah phawk ni.

7. Field in Headquarters thupiak bang in Account toh kisai teng EBC PAN/IFSC code zang in a poimoh om bangbang semsuah zouta uhi. Kipahthu gen in, maban a buaina leh haksatna omlou a lamzang a hon sutzop theihzel nading un thumsak ni.

8. Field inntuanna ding toh kisai a sepzui ding project omte Toupa ompihna toh ahun bang zel a sepkhiat ahihtheihna ding in thumna ah phawk ni.

9. Semtute’n target, budget leh goal setting local chih a akibawlte uh ahon sep pichin theihzelna ding un Pathian ompihna leh a vualzawlna ngen in thumsak lai ni.

10. Masawnna tehna khat thilpiak lam ah saptuam khenkhat duhthusam a batlouh chang om mahle uh fellowship leh saptuam neu khenkhatte’n awlawl in masawn uhi. A hong kitoudelh theihna ding un thumsak ni.

11. Field Office building first floor tuang kisung tanlel zoh in om phot hi. Maban sahpi abaang umna, window, room partition, flooring, plastering, painting leh electrification chihte sep ding tampi in samlai hi. Maban a lamzang a sepzom a hong hihtheihna ding in a poimoh om bangbang Toupa kiang ah ngen in thum ni.

D. INTERN MISSIONARY-TE TOH KISAI
KIPAHTHU GENNA LEH THUMNA DINGTE :
1. OTI, Hosur a training a omlel Mr Jamkhanlian Tangpua leh H Ginkhanzam-te’n Online Class sunzom tou theizel uh ahihman in kipahthu gen ni. A misiangthoute thumna tungtawn a amaute leng Covid-19 Positive ahihna uapan damsuahta uhi. Maban a a training uh chidam leh lamzang a hon sutzop theihna ding un amau leh a innkuanpihte ading in thum ni.

2. Intern Missionary mi thum: Mr Nangsonlian Ngaihte (Tanglepa), Mr B Kaisuanlal (Gaur) leh Miss Lianbiakmawi (Taplejung) Field Exposure a Himalayan Mission Field a om lelte lockdown ziak in April 11, 2021 apan a omna mun ngei uah om lai uhi. Tua a omna chiat uah a gammi i semtute toh kithuah in Field vai, Nepali-te tawndan leh pau sin in om uhi. Hiai hun sung a a sinte uh maban ministry adia phatuam leh gahsuahna dia vanzat manpha ahihna ding in thumna toh delhzui ni.