Gammial Aw simtute tengteng i Toupa leh Hondampa Jesu Khrist min in chibai! Covid-19 hiipi in hon nawk ziak in kum dang bang in report ding tamkei mahleh Toupa gamna i sepna khawl theihlou ahihziak in semtute leh thumtute’ pan theihdan lam tuam chiat a i pankhawmna leh sepkhawmnate uh tungtawn a gah muh i neih zelte ziak in kipahhuai i sa hi. Toupa’n i sepnate hon vuaksuak saklou ahihdan hiai anuai ah enkhawm nawn ni.

A. HIMALAYAN MISSION FIELD

KIPAHTHU GENNA LEH THUMNA DINGTE:
1. Toupa’n semtute tungtawn in gingthak leh baptisna tang thak hon piaknawnte ziak in kipahthu gen ni.

2. Madargach ah Biakinn bul a toilet kibawl zoh hita. Zoh ahih toh kiton in Area Pastor Padam Thapha in April 19, 2021 in a honna leh latna nei hi. Semtu Quarter ding field leh mimal thohkhawm a bawl inleng om hi.

3. Phidim a i saptuam gam ah semtu quarter ding leh biakinn kilam pen zoh hita. Semtu Quarters April 9, 2021 in Area Pastor in a latna nei, April 29, 2021 in Biakinn honna Assistant FS in nei hi. Kipahthu gen ni.

4. Field Dorka pawl in project a a guan uh Couple Seminar April 27-28,2021 sung hun haksapi kal ah Ektin Saptuamte intekna in programme nuam leh manphatak a zatzoh in om hi. Saptuam 20 apan in milip 115 paikhawm uhi. Pastor Lazarus Thulung, Kathmandu apan leh Pastor Paukhankhupte’n sinsakna pia uhi.

5. TBCA toh i sepkhawmna a semtu Evan. H Thangkhansiam heutute deihna bang in Himalayan Missions Field a suan in om hi. Amah tuin Bhuttabari station ah omlel hi. Buaina omlou a a omna lui apan a station thak ding damtak a a tuntheih ziak in kipahthu gen ni.

6. Covid hipi ziak in field a semtute’n nidang bang in na sem theilou uhi. Pathian piina toh sep dingdan hoihzaw leh lohchingzaw muhsak a a omna ding un semtute thumpih ni.

7. Mrs Megha Rai, Jorethang Saptuam member ahi. Gingtu ahih ziak a a pasal leh a innkuante toh teng khawm lou ahi. Ama pa leh a pi toh innkuan khat bang khosa khawm sek himahleh May 05 apan in ama sungte mah inleng gingtu ahihna ziak in ngai nawnlou ua inn a pan in nohkhia uhi. Tuin a tanu toh i gingtute inn khat bel in omlel hi. A misiangthoute’n thumna tampi toh delhzui in, a sungkuanpihte’n Jesu Khrist hon muhlohna ding un thumna in phawk ni.

8. Mission Field a Music sinsakna pethei ding heutute lemgel siamna tungtawn in Field in neita ahihman in kipahhuai i sa hi. A manpha thei pen a ahong kizat theihna ding in Pathian piina leh amah Evan. H Thangkhansiam leh a innkuante buaina omlou a a omna mun ding ua ahong kilepfel nading un thumsak ni.

B. DHEMAJI MISSION FIELD:

KIPAHTHU GENNA LEH THUMNA DINGTE:
1. Dakuakhana a semtu Evan. Chinkholal Lethil leh a seppih Choron Chuk-te’n Medhi khua ah thugenna ava neih hun un gingtu Mohendro Pegu leh a inkuante’n electric a neih zohlouh ziak un amau a poimoh om bangbang leisak a va sepsak thei ahihna uah kipahhuai i sa hi.

2. EBCC Lachangaon a om Baskar Panginte inkuan in mimal minkim in Missionary vakna pethei uhi. Amah a khosung ua ding a local Doctor bang a kizang ahi. Kipahthu gen kawm in Pathian vualzawlna ngetpih ni.

3. Pityangchapori khua a semtu Quarters puahphatna zohsiang hita hi. Hiai mun ahihleh Evan. H Jamkhanmang leh a inkuante omna ahi.

4. Naupangte school admission bawl zou ni tamlou chik a kainung un Covid-19 second wave ziak in school khak hinawn hi. Naupangte laisinna a siatloh louhna ding in thumna ah phawk ni.

5. Tulai Covid-19 second wave ziak in nasepna bangkim nawngkai mahmah hi. Semtute lah a poimoh luat ziak a kuan khiak louh theihlouh hun uh a om man in, kiven dingdan leng om thei taktak tuanlou hi. Pathian mahmah in hon ven keileh bitna ding omlou ahihna ah thumna in phawk chiat ni.

6. Toupa’n i thumna pangkhawmte uh hon ngaihkhiak sak in khalui in kho tuamtuam akipan mi-12 te’n baptisna tang uhi. Amaute a omna munchiat ua pan khalam pichingtak hong hih ua, saptuam adia khuam poimoh hong hihna ding un thumna ah phawk ni.

7. Field in septuak leh bohzuituak tamtak nei mahleh khovel chidam louh ziak in bangmah gel theih mulmal neilou hi. Pathian in hun hoih honpiak a gahsuah tak a sep zom a hihtheihna ding in thum ni.

8. Tulai a taksa damlou tuamtuam nei Evan. Haerbaswar Ngate, Mrs Pluto Pegu (brain tumor) Miss Priyanka Pegu (lungsim lam buai) te thumpih ngai mahmah uhi. Pathian hihdamna hoihtak hon ngahna ding un thum ni.

C. MANIPUR MISSION FIELD:

KIPAHTHU GENNA LEH THUMNA DINGTE:
1. Toupa’n semtute tungtawn in gingthak, baptisna tangthak, sawm-a-khat pethak leh Mimal Missionary Vakna a pang thak hon piakte ziak in kipahthu gen ni.

2. Tangthupha gen a khamangthang matna Covid-19 hiipi lak a leng nasep sutzop a hong hihtheihna ding in thum ni.

3. Semtu ginom leh chihtaktak leh hangsan a nna semte ziak a masawnzel i hihna ah kipahthu gen ni. Amaute’n a nasep hoihte uh hon sutzop theihna ding un thumna in phawk ni.

4. Tatsat lou a, itna khitui toh thumna a ana pang gige Pathian it, saptuam mite ziak in kipahthu gen ni.

5. Semtute’n Pathian thu a lungluut mi - 34 hon penawn hi. Itna toh bohzui ahih ua, counselling hoihtak neihpih nung a khelhnate kiphawk a, kisik lunghei a Jesu Lal leh a Hondampa ding ua a hon sa theihna ding un Pathian khasiangthou ompihna, vehna leh thopna ngen in nakpi’n thumsak ni.

6. Thoubal saptuam a member 209te biakin ah tazoulou ua, kekletna nasep Field GAD huhna toh bawl in om hi. Midang a kinga lou a, amau a pan a honlak theihna ding un thumsak ni.

7. Field Baptist Dorcas Fellowship Committee-te’n Anngawl thumna khateng kiginni 2na in saptuam 2/3 kigawm a neih touh a sawm uh, Covid – 19 second wave ziak in lemtheilou ding in kilang hi. Toupa’n kha pina ngetsak ni

8. Elder Ch Tombi, Thiyam Konjin a om tuma lam a stroke apuk damsiang lou Covid positive ziak in Care Centre tanpha ah a tupa pa toh kep in om hi. Pathian hihdamna ngetsak ni.

9. Semtute’n target, budget leh goal setting local chih a kibawlte hon sep pichin theihna ding un Pathian vualzawlna ngen in thumsak ni.

10. Kangmong saptuam Quarters bawl ding in kisa lel uhi. Pathian kha ompihna ngetsak ni.

11. Meitram a Field Office building, first floor bawlna nasep paisaan lel hi. Lamzang leh lohchingtak a sepzoh a hong hihpah theihna ding in thum ni.