Amasa in Gammial Aw simtute tengteng i Toupa leh Hondampa Jesu Khrist min in chibai! Report tungtawn a i muh zel bang in, pan i lakna ding leh kalsangzaw i suanna ding tampi om laite thumtute’n i thumnate a delhzui gige poimoh i sa hi. Pathian hon pina ziak a gah thupi taktak i muhte ziak a kipahthu gen zel in, tamsem semtute tungtawn a gah piak a i om zelna ding in thum zom zel ni. Toupa’n field tungtawn a A gamna i sepna a gah hon piakte, nna seplel i neihte leh i malakna i neih bangbang te enkhawm nawn le’ng i chi hi.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. I thumnate uh Toupa’n hon dawngzel in semtute report tungtawn in gingthak 05 leh baptisna tang thak mi 5 piak in ki-om nawn hi.

2. Birtamode Office a accountant nna sem Miss Asha Khapangi in February 26 in Pathari biakinn ah Mr. Subin Tuladhar toh Saptuam dansiangthou in kiteenna lamzangtak in neithei uhi. Birtamode office a Accountant thak poimoh ding ahihman in Pathian kiang ah mi fel, chitak, leh muanhuai ngen ni.

3. February 07, 2021 a Budhabare station a i sepna keekletna in “Gospel Point” chih minvuah in Naya Basti mun ah inn khat luah in Fellowship pat in omthei hi. Biakinn kai utnailoute adia hunlem bawlsakna mun, naupangte sinsakna tuamtuam neihtheihna ding leh akul leh poimoh bang a pichingte counselling neihna ding mun ahihman in thumna tampi toh delhzui ni.

4. February 21, 2021 in Hangdewa Fellowship thak pat in ana omta hi. Taplejung apan in Km 3 khawng a gamla ah gingtu innkuan 5 i nei a, tuate biakkhawmna ding mun honna i nei thei a kipahthu gen ni. Tuin, Mr. Nor Bahadur Maden inn pansan in kikhawm ding ua, Evan. Geeta Subba in enkai tou phot ding hi.

5. Field a nasep i neih Chisang ah Biakinn bawlna, Bihidin ah Quarter leh saptuam annhuan buk leh Naupang Sunday school ding, Phidim ah Biakinn leh Quarter ban ah Madargach ah leng Quarter kibawl hi. Buaina omlou a lamzang tak a bawlzoh ahong hihna ding in thumna in phawk ni.

6. Himalayan Missions Field apan Grace Bible College a sintu i neihte, Covid-19 ziak a inn lam a paite, tu a college kaitheih ding a hong omnawn ta ahihna ah a sinlai uh lamzangtak a hon sinzom zel theihna ding un thumsak ni.

7. Hangdewa Fellowship thak a makaite thumpih ni. Tuin Mr. Nor Bahadur Maden chairman-na nuai ah om lel hi. Amau innkuan panlakna leh kiphalna ziak ua amau inn pindan kiningching mahmah khat fellowhip neihna ding in hon zangsak uhi. Gingtu i neihlelte tungtawn a gingtu ahong kibehlap zelna ding in thumpih ni.

8. April kha sung a programme omte thumna ah phawkni: Tuate, April 06 – 17 sung Basic Bible School Pathari ah om ding a, April 23 & 24 in Ektin ah Field Dorcas saina in Couple Seminar om ding hi.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. Pathian in khamangthang, semtute tungtawn in gingthak mi-2 leh Sawm-a-khat pethak -7 hon piakthak nawnte ziak in kipahthu gen ni. Hiai bang mihing hihtheih hi hetlou himahleh Pathian in i thumna hon dawngzel in gah muh ding hon piak zelte ziak in kipahthu gen ni.

2. Saptuam member taksa damlouhna neite’n thumna tungtawn a damna ngahzel uh ahihman in kipahthu gen ni.

3. Mr Anil Chintey zi a khe a nat ziak a paitheilou a om Mrs Biakching leh Mrs Trisna Mili te’n thumna toh sathau a a zutsak nung un tuin pai theita in kikhawm zouta hi. Kipahthu gen in, maban a hong damsiangna ding in thumpih lai ni.

4. Taksa damlouhna ziak a i na thumpih zel uh Evan. Haukhosiam Guite leh Evan. H Jamkhanmangte tuin damta in, Ministry sunzom thei nawnta uhi.

5. Pariwar Bangkua kichi Whatsapp Group te’n field huhna ding a sum a piak uh zang in field in fellowship 4 te zat ding khuang leina in zang uhi.

6. Pathian in tukum 2021 sung a khamangthang tamsem hon piak a, lohching leh gahsuah sem a sep ahih theihna ding in semtute ading in thum ni.

7. Mr. Ajoy Narah khena (khebawk) tutan damsiang theilou in om hi. Hong damsiangna ding in thumpih ni.

8. Khalui a i taklatsa Mr Arinath Chinteyte nupa Khristian hih lunggulh ahih ziak un semtute’n bohzui zel ahihna uah Pathian dik hon muhchetna ding un thumpih zomzel lai ni.

9. Mr Romendra Pegu (BaliGaon-Gogamukh) pichin nung a lungsim lam buaina nei, thumna tungtawn in hoihlam manoh semtute’n Pathian thu houlimpih a, maban lametna hoihtak neih a omlai un a pi uleh a innkiim leh kiangte un dal uh ahihman in sutzop theihlouh in om phot hi. Thumna in phawk ni.

10. Saptuam memberte lak ah khenkhat khalam bahna liantak nei om uh ahihman in, amaute a bahna ua pan hong dinkhiak theihna ding un thumna in phawk ni.

11. February 05, 2021 in Nahalbali kichihna mun ah Evan. M Daizachin makaih in Fellowship patthak in om hi. Nilaini teng 3:00pm in biakna hun zang ua innkuan - 5 vel paikhawm theizel uhi. Pathianni chiang in Dhemaji Town ah kikhawm thei uh ahihman in manpha i sa hi.

12. February 07, 2021 akipan Pastor. S Thangbiakmang makaih in Gogamukh ah fellowship kipan thak hi. Inkuan-4 vel paikhawm theizel uhi. Lamzang leh lohching hong hihna ding in thumna in phawk ni.

13. February 14, 2021 in Bolukhaguri mun ah Evan. H Jamkhanmang makaih in innkuan thum omna ah Fellowship thak pat in om hi. Fellowship dingthakte hong pichinna ding un thum ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Toupa’n semtute tungtawn in gingthak, Baptisna tang thak, Sawm-a-khat pethak leh Mimal missionary vakna a pang thak hon piakte ziak in kipahthu gen ni.

2. Toupa’n A vualzawlna salam leh khalam a hon tansak lai a, tangthupha gen a khamangthang matna nasep sutzop a omtheih lai ahihziak leh tatsat lou a itna khitui toh thumna a ana pang gige saptuam mite ziak in kipahthu gen ni.

3. Semtute’n ginom leh chihtaktak a hon sepna tungtawn ua khamangthang man zel i hihman in kipahhuai i sa a, amaute’n tua bang a Pathian deihna bang a hon sepzom theihzel na ding un thum ni.

4. Semtute’n Pathian thu a lungluut mi 37 a muhte uh itna toh bawhzui ahih ua, counseling hoihtak a neihpih nung a khelhnate kiphawk a, kisik lunghei a Jesu a Lal leh Hondampa ding ua a santheihna ding un Pathian khasiangthou ompihna, vehna leh thopna ngen in thumsak ni.

5. Manipur Field Office Assistant thak Evan. Kh Binoy in a mohpuakna feltak leh kizentak a hon sepzom theihzel na ding in thumna in phawk ni.

6. Thoubal saptuam a milip a pun zelziak in biakin ah tazou nawnlou ua kekletna nasep dinkhawl lel hi. Toupa pina toh a poimoh bang a huh ding leh panpihtu ding ngen in thumsak ni.

7. Field in tukum semtute lak a kisinsakna atamthei lam piaksawm a pan a lakna lamzang leh gahsuah a sepsuah a hong hihtheihna ding in thum ni.

8. Semtute’n target leh goal setting a kibawlte uh a hon sep pichin theihna ding un thumsak ni.

C. ASSAM A MUNTHAKTE TOH KISAI

KIPAHTHU GENNA LEH THUMNA DINGTE:

1. Assam a field thak ding a i etna Goalpara, Hojai leh Dima Hasoa ah semtu a kigawm in 10 i nei hi. Amau semtute leh A mi siangthoute thumna tungtawn a field piching Toupa’n hon piakna ding in nakpi in thum ni.

2. February 21, 2021 in Hojai a semtute’n Children Ministry/Sunday School pantheita uhi. Hiai hun in gingtu hilou naupang 10 vel kihelthei uhi. Amaute Pathian thu-le-la leh sianthouna toh kisai sinsakna semtuten nei thei zel uhi. Nu-le-pate kipak ua, tutan in dalna bangmah omlou ahihman in naupangte lakah Tanchinhoih chii tuh hong hih theihna ding in thumna tampi toh delhzui ni.

3. Semtute gamthak a lut ahihna uah pau sinna poimoh masa ahihman in amaute’n pausinna bulpat theita uhi. Kipahthu gen in, a sinte uh hong siam baih ua, ministry a manphatak a hon zatkhiak pah theihna ding un thumpih ni.

4. Semtute’n a innkuanpihte utoh worker’s prayer fellowship pan theita uh ahihman in kipahhuai i sa ahi. Lamzang a tua bang hon neihtheih zel nading un thumna in phawk ni.

5. Pathian pina toh Sunday worship service daltu omlou in semtute tam keimahle uh bulpat theita uh ahihman in kipahhuai i sa hi. Hojai a semtu omte’n Worship service a neih hun ua, taksa damlou thumna tungtawn a damna lunggulh a va tel Mrs. Lalita Devi w/o Rajendra Singh, tuin damsiang keimahleh hoihzaw leh damzaw a hong om ziak in kipahthu gen ni. Toupa’n semtute tungtawn a tuailai mi 2/3 Tanchinhoih genpih theizel uh ahihman in thumna in delhzui ni.

6. Pathian pina toh semtute’n ministry manphazaw sem hon neih ua, mi tuamtuam a kimuhpihnate uh tungtawn a zil ding leh sin ding om bangbangte hon siampahna ding un thumna tampi toh delhzui ni.