Tangthupha thei nailoute kianga pai a Tangthupha tangkoupih ding a thu hon petu i Toupa leh Hondampa Jesu Khrist min in Gammial Aw simtute tengteng itna chibai ! Toupa hoihna ziak in khovel hiipi leng lak a i dinlai in khatawp tan bang buaina tampi te kal a pitung a i om nawntak man in kipah huai i sa petmah in Amin thupi i phat hi. I thumnate tungtawn a Toupa’n thil thupi leh lamdang hon muhsak te, anuai a bang in enkhawm nawn ni :

A. HIMALAYAN MISSION FIELD

KIPAHTHU GENNA LEH THUMNA DINGTE:

1. Semtute tungtawn a gingthak mi 16 leh Baptisma tang thak 25 piak a i om nawn ziak in kipahthu gen ni.

2. November kal masa in Laisiangthou zouthak mi 3 ; Khyam, Bijay leh Bikash te’n a sepna ding ua sehsakna munte ah sempan theita uh kipahthu gen ni.

3. October 25, 2020 in Evan. Jemson Ngaihte leh a lawinu Nemzamawi te’n goutan tapa Khamthianbel, Delhi ah nei uhi. Nauneihna toh kisai a haksatna omthei chih ziak a tuamun August kha bul a a naih uh, Thumna tampi a i na phawk uh ahi. Kipahthu gen ni.

4. Jorethang station a i sepna Toupa’n hon vualzawl in member kibehlap zel hi. October 25, 2020 in gingtu mi 8 in baptisma tang uhi. Tuate lak ah nupa kiteeng thak kopkhat om uhi. Naupang 3 latna leng hiai ni a zat in om hi.

5. Licentiate Pastor 4 lakna ding process pailel ahihman in Pathian in mi kizen leh kipia hon piakna ding in thum ni.

6. Nepal gamlai lam leh Sikkim ah sepna ding mun thak et a om lellel ahihna a Pathian in ei septheihna ding mun kichian hon piak nading in thum ni.

7. Nepal apan Grace Bible College a Laisiangthou sin a omlel naupang sagih(7) te thumsak ni. A sinlai uh lamzang tak a ahon sinzom ua, i Field a ding a mi phatuam tak ahong hihna ding un thumsak ni.

8. Bicky Darjee(kum 20), Bhuttabari a teng ading in thum ni. Accident ziak in kum 5 sung bang lupna ah om in wheelchair zang hi. Pathian thu a zata a, ahun hun in i semtu in veh in Bible pia leh thumsakna nei thei zel hi. Tanchinhoih deihna nei mahleh innkuante kepna nuai a khosa ahihman in thupukna langam nailou hi. Taksa damna leh khalam damna a ngahna ding in ngetsak ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. Kum 2 vel Khezeng paitheilou Mr Yakrudhar Doley in khovel ah lamet ding nei nawnlou in om hi. Huan, Miss Oitoporba Taye leng kum tampi sung paithei lou a, khezeng a omden ahi. Amaute Missionaryte tungtawn in Jesu Khrist hondampa ding a sang in baptisma piak in om uhi. Pathian in i thumna pangkhawmte uh hon ngaihkhiak sak in, lamdang tak in chiangkhun toh biakin zuanzouta uhi. Kipahthu gen kawm in thumna ah delhzui zel ni.

2. Mrs Anjona Pangin w/o Mr Prodip Pangin tulai a vangkim in lungsim lam venlouhna neiin om zel hi. Bang hiam hun chiang in tuabang deuh a buaina nei thei zel ahih man in Pathian kha nasepna tungtawna hong damsiang pahna ding in thumpih ni.

3. Pytangchapori khua a om Mr Juga Pegu(khezeng) in Jesu Khrist tanchin theinuam mahmah in semtute’n houlim pihzel uhi. Hichibang a khovel a lamet bei kisa te’n a lametna uh omsun Jesu kia ahihzel man in Salam leh khalam damna hon ngahna ding uleh mun tuamtuam a houlim pih lellel a omte ading in thum ni.

4. Pathian in khovel hon damsak a a nna sep theihna ding hunlem honpiak ngeiding lametna toh Field extension bawl theihna ding mun bangzah hiam survey bawl beh lungggulh huai ahihman in, field in a masapen ding in Gogamuk area survey bawlzou ta hi. Pathian in loumun diktak honpiakna ding in thumna ah phawkzui zel ni.

5. Evan. H Jamkhanmang in tulai in kawngna leh nungna a neih ziak in amah thuakkhop in baibawm in, deih bang in gamtang theilou hi. Huchipi inleng a hih theihtawp suah in kuankhe thei zel hi. Hong damsiangna ding in thumpih ni.

6. Kumdang banglou tak a vuahtui hong khonung tam ziak in Jiadhal lui naktak a let in, i gingtu Mr. Kobiraj Pegu te inkuan lou 4-bigha a bawl uh leisai in vuksak vek hi. Buhlak ding khat leng omlou in kihawmkhai kha uh. Amau inkuan thumna ah phawk ni.

7. Covid-19 hiipi nuai ah school naupangte Class IX-XII te Government Orders dungzuiin lutnawnta uhi. Amaute’n Pathian venbitna poimoh mahmah uhi. I semtu missionary te ading in leng kiven dan haksa mahmah, a kuan khiaklouh theihlouh uh ahih ban ah damlou delhlouh theihlou a tam mahmah hi. Semtute hong bit zelna ding un thum ni.

8. Lockdown leh tuilian ziak a sutzop theihlouh a om Lachangaon a Quarters bawlna sutzop theih in om nawnta hi. Huan, ‘Stuti Geet’ kichi field songbook reprint & enlarge leng edit bangkim zohsiang ahih nung in Print ding a offset press a piak hita hi.

9. Field a i semtu missionaryte, Pathian kha in a thop a, gahsuah tak a hon sep touhzel theihna ding uleh a zi leh tate uh toh khovel hiipi leng lak apan abitzel ua, gingtute leng hong bit touhzelna ding un thumpih ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Toupa’n Semtute tungtawn in gingthak 10, baptisma tang thak -06, sawm-a-khat pethak 02 leh mimal missionary vakna a pang thak 08 hon piakte ziak in Pathian kiang ah kipahthu gen ni.

2. Hipi leng lak ah leng semtu khenkhat in ministry sunzom thei zel uhi. Amaute ziak a report ding hong omthei ahihman in a kipiakna uh thupi i sa hi. Tuabang semtu i neihte ziak in kipahthu gen ni.

3. Salam damlouhna ziak in Mother’s care a ki-enkol Ramesh tanu leng damtak in pawtta hi. Thumnate dawngtu Pathian kiang ah kipahthu gen ni.

4. Semtute’n Pathian thu a lungluut mi 24 a houlimpihte uh itna toh bawhzui ahih ua, counseling hoihtak a neihpih nung a khelhnate kiphawk a, kisik lunghei a Jesu a Lal leh Hondampa ding ua a hon san theihna ding un Pathian khasiangthou ompihna, vehna leh thopna ngen in thumsak ni.

5. Naranseina a semtu Evan. Surchandra a kallam buaina nei hun sawtpi ki-checkup saklou a om leh Mr Obed khua mulou leng a kal a suang om, sum neihlouh ziak in operation zoulou in om hi. Naranseina a member mah W. Samendra leng gari accident a kheguh kitan operation thak ngai lai ding hi. Amaute ading in Pathian panpihna ngetsak ni.

6. Division Baptist Missions Committee, EBC Imphal Division huhna tungtawn in Heisnam biakin ding bawl in om theita hi. Lockdown ziak a nongkaina om te ziak in deih bang a nasepna paitheilou ahihman in thumna in thei ni.

7. Field amah leh amah kitoudelh theihna dia poimawh kisinsakna leh kilamlahna workers fellowship chiang in neih in om zel hi. Pathian ompihna tang a, tunung a saptuam hing leh kitoudelh zou a hong hih theihna ding un saptuamte’n thumsak lai ni.

8. Field in tulel in Saptuam Upa 9 neilel hi. Station 23 enkoltu leh intekna latu ding taksapna lianpi omthei ahihman in Toupa Kha vehna tang a Pathian leh saptuam it mi tunung a makai muanhuai ding ngen in thumsak ni.

9. Buaipih theih ding tampi omna khovel ah Jesu khebul a tu a, thumna toh khamangthangte matna ding leh gingtute khalam khanna dia kikepna mah awlmoh pen a nei semtu, saptuam leh field hithei ding in Pathian kiang ah ngen zom zel lai ni.