Gammial Aw simtute tengteng i Toupa leh Hondampa Jesu Khrist min in chibai! Covid-19 hipi kal ah leng Toupa’n semtute, thilpiak petute leh thumtute tungtawn in gah kipahhuaitak honpe zel a, kipahhuai sa in, anuai a bang in i enkhawm nawn ding hi.

A. HIMALAYAN MISSION FIELD

THU TUAMTUAM:

1. September 27 – October 03, 2020 sung NEBCC Budhabare ah Public Speaking and Anchoring Training chih min vuah in tuailaite lak ah sinsakna Miss Binita Rai, NEBCC Dharampur in nei hi. Hiai hun in sintu mi 13 kihel thei ua, amaute lak ah mi 10 in Certificate ngah uhi.

2. September 23, 2020 in Himalayan Missions Field Office leh Field Superintendent Quarters thak honna leh latna Rev Lalmalsawm, Field Superintendent in nei hi. Building thak lamzoh ahih toh kiton in Field Superintendent leh a inkuante October 24, 2020 in kituahlut ngal uhi. Hiai building lamna, March 04,2020 a nasep pat in om a, September 22, 2020 in zohsiang in om hi. Hoih in etlawm mahmah mai hi.

3. Beldangi a gingtu khat in a gam hon khelhsakna mun ah kikhop theihna ding Biakin building hoih huntawktak lamkhit ahih toh kiton in Assistant Field Superintendent in ahonna leh latna October 03, 2020 in nei hi. Padajungi a Saptuamte toh pangkhawm a kibawl ahi. Tualsung saptuam memberte’n biakin lamna a tha tampi thoh khia uh ahihman in kipahhuai i sa hi. Hiai Beldangi Saptuam ahihleh Padajungi Saptuam a pan a intuan ahi. Toupa’n thupina tang hen.

KIPAHTHU GENNA LEH THUMNA DINGTE:

1. Semtute a kipan report piakkhawm pansan in gingthak 13 leh baptisma tangthak mi 5 te ziak in kipahthu gen ni.

2. Bhuttabari mun a Field Office leh Quarters banah Beldangi Biakin thak bawl zoh a luahtheih a hihtak ziak in kipahthu gen ni.

3. Toupan tukum in Grace Bible College a Laisiangthou sin ding Miss Sita Limbu (BTh sin ding) leh Miss Angita Tamang (Diploma sin ding) hon pia a, kipahhuai i sa hi. Amauten lohchingtak a hon sinzoh theihna ding un thumpih ni.

4. Grace Bible College graduate thakten a sepna mun ding ua gel a omna pansan a lamzangtak a ava sep theihna ding un thumsak ni. Khyam Raj in Khudunubari, Bijay Khapangi in Gaur leh Bikash Rai in Itahari ah sem ding hi.

5. Handicraft training kha khat sung daih ding October 7, 2020 in NEBCC Budhabare ah kipan hi. Training a tel mi 10 te’n a sinkhiak bangbang te uh nekzon theihna ding khop a siamna a neihtheihna ding un thumna in delhzui ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. Tutung report in ahuamkhakna sung ah Gingthak 4 leh Baptisma tang 4 Toupan hon piak nawn ziak in kipahthu gen ni.

2. Evan. M Daizachin sepna mun Morahuti kichihna mun ah September 02,2020 in Mr Japan Taid te nupa in baptisma tang uhi. Mr Taid te inkong a a kithoihna sek uh singkung a sih ziak in a pathian uh lungkim lou ding chi in patau mahmah ua, Missionary-te’n counselling leh thumna a neihpihna ua pan gingtu hongsuak uhi. Toupa leh a saptuam a dia gingtu muanhuai hong hihna ding un thum ni.

3. September 08,2020 in Namgharia khua ah nupa kawp-1 Mr Yakradhar Doley te nupa in Jesu Krist sang in baptisma tang uhi. Mr Doley taksa lamah damlouhna nei in amau hih theihna tan ah kithoihna tuamtuam nei mahle uh damtheilou hi. Missionaryte’n houlim pihna a neih nung un Jesu Krist sanna neiin gingtu hongsuak uhi. Salam leh khalam damna hoih zawsem hon ngahna ding in thumna in phawk zel ni.

4. Mrs Bobita Doley (Dimoruguri) in Jesu Khrist gingta in, biakna kikhop, anngawl thumna chihte thanuam mahmah hi. Aman baptisma tang nuam mahleh a pasal in a phallouh ziak in tanglou in omlai. Baptisma honlak theihna ding leh a pasal ngeileng gingtu hong suahna ding in thumpih ni.

5. Pityangchapori a semtu Evan. JK Mang in Home tuition, Bible Study, Football Club leh Mising gospel video clip shooting ding a buaipihte a hunhun a Pathian in sepdan thak honpiakte ginglou mite leh gingtute kal a kizopna hoihsem lamtouhna dia poimoh lua ahihna ah, a hong lohchin touh zelna ding un thumpih ni.

6. Lachangaon mun a semtu Quarter ding kibawl a foundation teng zohnung in lockdown leh tuilian ziak in sutzop theihlouh in dinkhawl hi. Tu’n natna hipi leng dai kei mahleh maban sawntouh sawm a om nawn ahihna ah nasep zoh ahih a, semtute adia omna mun nuamtak ahong hihna ding in thumna ah phawk ni.

7. Tulai in semtu Evan. T Chinbiakmung leh a seppihte Palm area kichihna mun ah lutthak in houlim pihna leng nei uhi. Huan semtute’n mun tuamtuam ah houlim pih bangzah hiam nei lellel uhi. Pathian pina leh makaihna ngen in thumpih ni.

8. Gingtute lak ah taksa lam damlouhna nei bangzah hiam om uhi. Tuate lak a thumpih ngai kholdiak bangzah hiam om uhi. Amaute i na thumpih sek uh Pityangchapori a om Mr Chandrakanto Mili (Khezeng), Mrs. Janabi Pegu (Town fellowship) in brain tumor ziak in damlouhna nei hi. Amaute hongdamna ding un thumpih ni.

9. Covid-19 pung deuhdeuh a theih ahihman in semtute leh gingtute hong bitna ding un thumna ah phawk ni. Huan lockdown sung a ana segawp Kapurdwa biakin leh Dimoruguri biakin te repairing bawlzoh hita, kipahthu gen ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Toupan’ semtute tungtawn in piangthak 7, Baptisma tang thak 3, Sawm-a-khat pethak 2 leh Mimal missionary vakna apang thak 1 hon piakte ziak in Pathian kiang ah kipahthu gen ni.

2. Field Kumtawp vaihawmna khawmpi a 17 veina leh Ordination service kithuah October 02, 2020 in MEBC Nambol biakin ah lohchingtak a zatzoh in om hi. Field kumsim khawmpi hun in kumthak (2021-2022) budget ding pomna om a, tuate GAD ah Rs 26,40,000/- Field BDFC Rs 3,30,000/- Field BYF Rs 3,00,000/- leh Immanuel English School Rs 14,37,500/- ahi. Pathian vualzawlna tang a muhsuah ahih theihna ding in thumna in phawk ni.

3. Hipi leng lak ah leng semtu khenkhat in ministry sunzom thei uhi. Tuabang semtu i neihte ziak in kipahthu gen ni.

4. Salam damlouhna nei Elder Ch Tombi, Thiyamkonjin stroke ziak a ataklam khut-leh-khe zoi leh Ms Rupeshori accident te’n leng hoih lam manoh zeel ua theih ahih ziak un Pathian kiang ah kipahthu gen ni.

5. Semtuten’ Pathian thu a lunglut mi 17 September kha a aneihte uh, itna toh bohzui ahih ua, counselling hoihtak a neihpih theih ua, khelhnate kiphawk a kisikna diktak toh Jesu a Lal leh Hondampa ding ua ahon san theihna ding un Pathian khasiangthou ompihna, vehna leh thopna ngen in thumsak ni.

6. Th Ramesh te nupa in September 30 in goutan tanu nei uhi. Jaundice ziak in Mother’s care hospital ah ni 4 nung in ki admit uhi. A nu-le-pa ginglou ahih ziak un milem pathian kiang a kithoih din kun mahle uh utlou ua, a nu-le-pa heh in sum-le-pai ah huhna tanpha bawl utlou uhi. Ramesh ahihleh Immanuel English School, Thiyam Konjin a teacher a sem ahih ban ah Local a secretary lenlel leng ahi. Thumna ah phawk chiat ni.

7. Field in tukum sung a sepsuah dia a tup SINGLUP ESHEI re-print ding, Hand book re-print ding leh Certificate tuamtuamte ahun bang zel a sutkhiat theihna ding in Pathian ompihna ngen ni.

8. Upa Ordination piak a om Mr M. Momon of Thoubal Khunou a di’n Pathian Kha ompihna ngetsak ni. Tulel in field ah Upa 9 kia omlel hi.

9. Buaipih theih ding tampi omna khovel ah Jesu khebul a tu a, thumna toh khamangthangte matna ding leh gingtute khalam khanna dia kikepna mah awlmoh pen a nei semtu, saptuam leh field hong hihtheihna ding in Pathian kiang ah thum ni.