Gammial Aw simtute tengteng i Toupa leh Hondampa Jesu Khrist min in chibai! Toupa pina leh ompihna toh October kha tan bang pikai in i om nawnta a kipahhuai hi. Toupa’n semtute leh A misiangthoute thumna tungtawn a gah hon piak zelte i na muh zel bang in tuin leng A gam na i sepna a gah hon piaknawn hiai anuai ate enkhawm nawn leng i chi hi.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. Toupa’n August kha sung in semtute tungtawn in piangthak 10 leh Baptisma tang thak 11 hon piakte ziak in kipahthu gen ni.

2. Nepal phaizang a omte biakin a kikhawm thei nailou omzek lai mahle uh singtang lamte ahih leh kikhawm thei zel uhi. Sikkim ah leng a biakna mun ngeite uh luah theih nawnta uhi. Bhuttabari ah June kha apan tuni tan biakin ah Pathianni a biakna, Dorka Pawl kikhopna, leh fellowship group te paitou thei zel hi.

3. Bhuttabari mun a Field Office leh Field Superintendent Quarter ding a ki bawl zoh a om tak toh kiton in Field Superintendent te leng kituahlut ngal uhi. Khovel buainate ziak a Lockdown hong om in buaina tuamtuam hong om zel mahleh hon hetbuai lawmlawm lou a zou thei a omta i hihman in honpi a hon makaih Toupa Pathian min i phat hi.

4. GBC a Bible zouthak mi thumte sawttak lockdown ziak a Lamka a tangte i thumnate uh ziak in September 08, 2020 in Nepal lut theita uh, kipahthu gen ni.

5. GBC graduatete Mr. Khyamraj Kadarya, Mr. Bikash Rai leh Mr. Bijay Khapangi te sepna ding FWC in gelsa nei hi. Innkuante toh kha khat khawng hun a zat zoh chiang un, practical ministry zom ding ahihna uah thumpih ni.

6. Tu kum a GBC a kai thak mi 3 te lak ah 2te Nepal ah omlai ua, Online in zil lel uhi. Pathian piina ngetsak ni. Miss Angita Tamang pen in Budhabare apan Diploma in theology sin a, Miss Sita Limbu pen in ahihleh Chisang apan Bachelor of Theology sin hi.

7. Evangelist Geeta Subba nu Mrs. Dilmaya Tamang, kum 75 in September 02, 2020 in hon omlouh san a, Pathari mun ah kivui hi. Geeta leh a sungkuante Toupa’ khamuanna ngetsak ni.

8. Evan. Jemson lawinu nau nei ding, a naupai ngeina lou deuh ahihman in Doctor leh Hospital hoih omna Delhi ah kikem lel uhi. Damtak a nau hon neih ua, chidam a a sepna mun uh a zot theih na ding un thumna in phawk ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. August 02, 2020 in Pathian in i sepna gah hon musak nawn in Bongalmari, Kapurdwa saptuam ah gingthak mi-7 te’n Pastor S Thangbiakmang tungtawn in baptisma tang uhi. Amaute baptisma piak hun in sacrament annkuang saina leng neihkhawm in om ngal hi. 

2. I sepna area sung a om Lachangaon leh Majgaon te’n kitheihsiam louhna a neih ziak un, buaina piang in gari kihalsak leh kihonsualna a liamna tuak tanpha om uhi. I gingtute lak a khenkhat leng buaina bawl dan a genkhak om khazek uhi. Khonih kal a i saptuam mi omkha tuakte’n biakkhawmna neikhawm theilou a hun bangtan hiam a om nung un, i semtu Evan. Haukhosiam leh a zi panlakna in, tu in biakna neikhawm theita uh, kipahthu gen ni. 

3. Covid -19 ziak in buaina leh haksatna nasatak om mahleh field sung a saptuamte’n kikhopna neithei zel uhi. Mimal counseling, inn veh leh damlou veh banah anngawl thumna leng nei theizel ahihna uah kipahhuai mahmah hi. Pathian a kipan gah muhding a vangkim a omtheizel ahihman in, Toupa kiang kipahthu gen ni.

4. Field a nasepna pailel Lachangaon a semtu Quarters ding kibawl, Covid-19 ziak leh tuilian ziak a sutzop theihlouh a om sutzop a hong hih a bawlzoh pah hong hih theih na ding in thumna in phawk ni. Field in Field Labu leng semzom tou zel in tuin etdikna neisan lellel uhi. Hiai Labu Assamese & Romans Script kithuah ding ahihna ah nem mahmah ahihman in buaina omlou a zohsiang ahih theihna ding in Pathian kha pina leh makaihna ngen in thumna in phawk ni.

5. Tulai in semtuten amau a Talent Pathian in a koihte zang in sepdan chi tuamtuam zang in tangthupha puanzakna nei uhi. Pityangchapori a semtute’n Home Tuition bang, Bible Study bang, Football club leh Mising pau a gospel movie shooting (video clip) bawlin tha it thei mahmah uhi. Media ngaina mahmah mi ahihman un vanzat hoihzaw bang poimoh mahmah ahihna uah a poimoh bang uh pethei Pa kiang ah ngetsak ni. 

6. Taksa damlouhna na tuamtuam neite lakah Pityangchapori a om Mr Chandrakanto Mili (Khezeng) hatlou sim thaknawn hi. Mr Ratul Narah (Kapurdwa) doctor te’n typhoid chi mahle uh amau siampute’n mibum dan in ngoh uhi. Aman missionaryte counseling tungtawn in gingtu hongsuak in baptisma leng tang hi. Hong damsiangna ding in thumpih poimoh mahmah hi. 

7. Semtute’n tulai in mun tuamtuam ah houlim pih lellel bangzah hiam nei uhi. Amaute a min uh taklang vek zoulou i hihna ah Khrist hon muhchianna ding un thumna ah phawk ni. Covid-19 hiipi om mahleh damlou tuamtuam omte adelh uh ngai bang om, houlim pih a neih uh poimoh bang om, gingtu omsate kepbitna leh ministry kuanlouh theihlouh ahihna ah semtute bitna ding in thumpih zel ni.

8. Tulai in semtute’n sep theihdan lam tuamtuam zong in gingtute amau leh amau tha kipiakthakna dia ki-inn vehtuah sak leh innkuan maitam (family devotion) chihte patpih theihna mun khenkhat omta, manpha leh lohchingtak a hon zatzom theihna ding un thumpih ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Toupan semtute tungtawn in piangthak 06, Baptisma tang thak -05, leh sawm-a-khat pethak 01 hon piakte ziak in Pathian kiang ah kipahthu gen ni.

2. Upa Ch. Tombi, Thiyam a Local Chairman stroke ziak in damlou inn a kikem hoihlam manoh zel hi. Rupesori leng Doctor in hoih lam nawtsa in khanih nung a checkup nawn ding chi hi. Thumnate dawngtu Pathian kiang ah kipahthu gen ni.

3. Hiipi leng lak ah leng semtuten ministry sunzom theizel uhi. Hiaibang semtu i neihte ziak a kipahthu gen in, maban a leng pan hon lakzom theihzelna ding un thumpih ni.

4. Pathian in Pastor L. Amuba whatsapp message tungtawn in (gingthak) Mr Deben, Porompat in Jesu hondampa ding in sang hi. Pathian kiang ah kipahthu gen ni.

5. Semtuten’ Pathian thu a lungluut mi 16 August kha a aneihte uh, itna toh bohzui ahih ua, counseling hoihtak a neihpih theih ua, khelhnate kiphawk a kisikna diktak toh Jesu a Lal leh Hondampa ding ua a hon san theihna ding un Pathian khasiangthou ompihna, vehna leh thopna ngen in nakpi’n thumsak ni.

6. Field in tukum sung a sepsuah dia a tup SINGLUP ESHEI re-print ding, Hand book re-print ding leh Certificates tuamtuamte ahun bang zel a sutkhiat ahihtheihna ding in Pathian ompihna ngen ni.

7. Field in a 17veina Kumsim vaihawmna khawmpi October 02, 2020 in Meitram, MEBC Mission Centre ah nei hi. Hiai hun in Mr M. Momon, MEBC Thoubal Khunou leng Upa Ordination piak in om hi. Pathian ompihna toh programme hoihtak a zat ahihtheih manin kipahthu gen ni.

8. Buaipih theih ding tampi omna khovel ah Jesu khebul a tu a, thumna toh khamangthangte matna ding leh gingtute khalam khanna dia kikepna mah awlmoh pen a nei semtu, saptuam leh field hithei ding in Pathian kiang ah thum ni.