Gammial Aw simtute tengteng i Toupa leh Hondampa Jesu Khrist min in chibai! Covid 19 ziak a gamsung pumpi lockdown ahihlai in, Tanchinhoih nasepna in lockdown theihlouh in ma sawnzel a, kipahhuai sa in, Toupa’n thil thupi hon muhsakte anuai a bang in enkhawm nawn leng i chi hi.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. June kha lailak apan in i Field in a huamkhak India lam a omkha saptuamte Biakin kai thei nawn ta uhi. Nepal sung ah leng mun bangzah hiam ah kikhopna pat in om nawn thei ta, kipahthu gen ni.

2. Bhuttabari a Quarter kilamlel lamzangtak in paizom zel thei, kipahthu gen in, buaina omlou a zohsiang a hong hihna ding in thum ni.

3. Field in Field Khawmpi August 29 & 30 chiang in Birtamode ah neih sawm hi. Hunpi zang ding in Rev Paukhanmang Guite, General Secretary, EBC pang ding, Pathian in hun lemtang a honpiak a manphatak a zat ahih theihna ding in thum ni.

4. Gaur station mun Pathian in a honpiak hi a thei in Evan. Dinesh Khadka leh a innkuante July kha bul in teenglutta uhi. Gahsuah leh makeektak a a va septheihna ding un thumpih ni.

5. Semtu Quarter amau Local panlakna a kilam lel, Songretar leh Bihidin munte ah Pathian piina ngetsak ni. Lamzoh pah ahong hihna ding in thumsak ni.

6. Beldangi Biakin kilam leng deihbang a sum thohkhawm a lutlouh ziak in dinkhawl ua, a poimohte uh Pathian in a hon piakzel nading in thumpih ni.

7. Itahari station a i semtute Sangbiakmawi leh a lawipa Mr. Mung in naupang school kailaite ading in free coaching July 10,2020 apan in ana pan uhi. Tanchinhoih thehdalhna vanzat poimohtak ahong hihna ding in thum ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. Covid-19 in masawn zel in a vei leng kibehlap zel mahleh Pathian in tuni tanpha semtu leh gingtute hon kepbit ziak in kipahthu gen ni. Mipi kikhopna om theikei mahleh inn pansan a fellowship field in pan thei nawnta uhi.

2. Assam board nuai a Class-X examna ah field apan mi 8 te’n lohchinna ngah uhi. Tuate lakah, Mr Alvin Mungminthang s/o Evan. JK Mang inleng lohchinna ngah in tu’n Silapathar ah college admission bawl zouta hi. Lohchinna ngah tengteng ziak in kipahthu gen ni.

3. Pityangchapori mun a Home tuition lockdown ziak a khawl a om nu leh pate ngetna ziak in patnawn in omta a, khokim a naupang bang zah hiam inleng va naih uhi. Huan hiai saptuam in Bible study nipikal khat a nihvei bek neih ding in panla uhi. Kipahthu genkawm in thumna ah phawk ni.

4. Gingtute lak ah taksa damlouhna tuamtuam nei omzel mahleh thumna ziak in damkhe zel uhi. Dimoruguri a om Mrs. Bobita Doley in kha khat in numei ngeina dan thumvei khong nei hi. Hongdamna ding in Pathian kiang ah thumna in phawk ni.

5. Covid-19 ziak a buaina haksatak a kituah lai in tuilian (Flood) kumdang sang in Assam ah baihzaw in semtute’n a sepna area-te uh khenkhat buaihuai sim mahleh kepbit in om lai uhi. Kipahthu gen kawm in semtute leh gingtute ading in thum ni.

6. Covid-19 lockdown sung in gingtute awlmohna ziak in relief ading in mi phatuamngai bangzah hiamte’n a piakkhawmte uh hawmkhiakna field a semtute tungtawn a neih in om thei vekta hi. Thilpiakte’n naktak a field a saptuamte taksap awng huksak kha ahihman in kipahthu gen ni.

7. Semtute’n counselling a piakna tungtawn un Baptisma tang thei ding Namgharia, Pityangchapori, Lachangaon leh Kapurdwa-te ah gingthak om uhi. Amaute hunlem bangzel a piak touh a hong hihtheihna ding un thumna in delhzui ni.

8. June 21, 2020 in Dhemaji Town a semtute’n ministry a neihna hun uah gingthak mi-3 te’n Baptisma tang uhi. Pathian adia gingtu muanhuai hong hihna ding un thumna ah phawk ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. July 14, 2020 in Ms Rupeswori w/o Evan. M. Deba, Shija Hospital ah a nih veina ding in operation in om hi. Damlouhna ziak a leiba sangtak nei ahihman un Toupa ompihna toh a hong damsiang theihna ding in thumsak ni.

2. Field a i gingtute tutung Class X leh XII exam omte lak ah tuailai bangzah hiamte’n lohchinna ngah uh, kipahthu gen ni. Maban chidam a a sutzop theihna ding un Toupa ompihna ngetsak ni.

3. Lockdown ziak a biakkhawmna neitheilou a om lai in Pastor L. Amuba in online message bawl in khahkhe thei zel hi. Member tampi’n phattuampih uh ahihman in a hon sutzop touh theih zelna ding in thumsak ni.

4. Semtute’n Pathian thu a lunglut mi a neihte uh itna toh a bohzui ua, counselling hoihtak a neihpih ua, khelh kiphawk a kisikna diktak toh Jesu a Lal leh Hondampa ding ua a hon san theihna ding un Pathian khasiangthou vehna ngen in thumsak ni.

5. Field sung a gingtu Quarantine a omlel leh pawttate’n damna a hon neih theihna ding un thumpih lai ni.

6. Field in maban a sep ding, sinsak ding leh panlak ding a gelkholh a neihte ahun bangzel a sepsuah ahong hihtheihna ding in thum ni.