Gammial Aw | KTZ

    KTZ
    Gammial Aw

    Gammial Aw | June 2020

    Gammial Aw simtute tengteng i Toupa leh Hondampa Jesu Khrist min in chibai! Khovel in natna hiipi ziak in buaina nasatak tuak mahleh Pathian gamna i sepna dinkhawl theilou a hihna ah, lockdown hong om in field a semtute’n deihbang in kalsuan khethei kei mahle uh phone manphatak a zang in tua tungtawn in tangthupha puanzakna nna sem thei uh ahihman in kipahhuai i sa hi. Toupa’n semtute tungtawn leh A misiangthoute thumna leh nasepna hon makaihzel ahihdan anuai ah enkhawm leng i chi hi.

    A. HIMALAYAN MISSION FIELD

    KIPAHTHU GENNA LEH THUMNA DINGTE:

    1. Field in April 15, 2020 in WhatsApp “Bible Study Group” Pastor Prem Raj Bantawa Rai malakna in pankhia hi. Biakin a kikhopkhawmna kizang thei nawnlou, khalam kivakna dia awlmohna liantak toh a na patkhiak ahi. Amah leh Evan. Dinesh Khadka-te’n Bible thu sinsak in, ni teng in group ah voice message in khah khe zel uhi. Member tamtak in hiai group zom in phattuampih uh ahihman in saizom zel ahihtheihna ding leh Bible Study pitu Pastor Prem leh Evan. Dinesh te thumna in phawk ni.

    2. Bhuttabari mun a Himalayan Field Office leh Quarters ding kilamlel hoihtak a lamkhiak a hong hihtheihna ding in thumna tampi toh delhzui ni.

    3. Covid-19 ziak in gamsung buai vengvung mahleh semtute leh field sung a gingtute lak ah virus ziak a neektaak haksatna toh kisai a buaisia om tadihlou ahihman in Pathian kepna tang lai i hi chih theih ahihman in kipahthu gen in, thum zom lai ni.

    4. Lockdown ziak a zalentak a ministry neihtheih louh a a om lai in semtute’n houlimpih ding mi thak 177 mu uhi. Tanchinhoih genna ding a panlakna masa ahihman in kipahthu gen in, thumna tampi toh houlimpih a omte leh semtute thumna in phawk ni.

    5. Biakkhawmna om thei lou himahleh semtute’n gingtute inn vehna bel khawl tuanlou in, thumsakna leh hasotna thu gen in inn vehna nei thei zel uhi.

    6. Field in maban a programme gelsa a neih Field Khawmpi July 4 & 5 sung Birtamod mun a neihding leh Field BYF Conference, Gopetar mun a November 4 – 6 sung neih ding chihte ahi. Hiai programme te Pathian in lem hon sakpih leh manpha tak a zat ahihtheihna ding in thumna in delhzui ni.

    7. Grace Bible College a kai ut Field office a ngetna pia mi 2 om te’n a lemtan leh amau June/July apan in GBC ah B.Th sin ding uhi. A maban ding uh Pathian deihna ngetsak ni.

    8. I gingtu Mrs Mumta pasal Mr. Remesh Viswakarma, inn lam a a om sung in Jorethang a i semtute’n counselling neihpih uhi. A sepna mun Andhra Pradesh a tunkiik nung in, tua a sepna mun ah Jesu Hondampa in sang hi. Ginna a kal a suan touh zelna ding in Khasiangthou pina ngetsak ni.

    9. Semtute’n damtheihna hoihtak a neihna ding uleh ministry manpha a neih theihna ding un thumsak ngitnget ni. Biakkhawmna neih theih kei mahleh mimal counselling leh gingtute inn vehna semtute’n a neihtheih zelna ding un thumpih ni.

    B. DHEMAJI MISSION FIELD:

    KIPAHTHU GENNA LEH THUMNA DINGTE:

    1. Lockdown ziak in kikhopna om thei kei mahleh, gingtu bangzah hiamte’n missionary te tungtawn in thilpiak tam loulou sawm-a-khat, antangpham, mission support chihte pethei bang leng om uhi. Amaute ziak in kipahhuai i sa petmah hi.

    2. Dimoruguri Biakinn huihpi’n hon mutpuk sak theiphial a a om lai in Evan. Haukhosiam Guite leh gingtute’n a na bawlthak uhi. Hichibang a semtu leh gingtute kipiak zohna kipahhuai i sa mahmah hi.

    3. Semtute’n counselling a piak uh mi bangzah hiamte lunglut mahmah ua theih ahihlai in, lockdown in lap ahihman in sutzop theihlouh in om hi. Amaute’n Pathian hing a muhna ding uh hunlem piak a i omna ding in thum ni. Huan, lockdown sung a gingtute amau munchiat a ginna toh a dinkipna ding un thumna in phawkchiat ni.

    4. Lockdown sung vakkhiak theih hikei mahleh, semtute’n akep saptuamte uh veh thei zel ua, neek leh dawn haksa diakte kiang ah huhna pe thei uhi. Senna omte local saptuam chihte’n amau fund neih bangbang a kaihkhopte ua pan a piak uh ahi.

    5. Khovel buainate ziak in kikhopna sutzop theih hikei mahleh mun khenkhat ah gingtute’n innkuan kikhopna nak bawl mahmah uh ahihdan theih ahih in kipahhuai i sa hi. Amaute’n Pathian biak tawpsan lou a a hahpan semna ding un thumna in delhzui ni.

    6. April 15, 2020 in Mr. Umakanto Pegu i gingtu a ngabetna ah tangkhial kha in hon beisan phut hi. Lockdown ziak in semtute leh gingtute kidelh tuah thei a om louh ziak un sivui dingleng omlou dinmun in om hi. Semtute’n maizumna tan pha a tuah nung un, khomite’n vui thei uhi. A nutsiat a zi leh tate Pathian kiang ah thumna in phawk ni.

    7. Namgharia a gingthak nupa kopkhat Pathian in hon piakte lockdown bei hun a Baptistma buaina bangmah omlou a piak ahihtheihna ding leh semtute’n ginglou mi houlimpih aneih zelte un sahkho dik leh Pathian dik hon muhna ding un thumna ah phawk ni.

    8. Tulai in kholum kipanta a hihna ah damlouhna chi tuamtuam om thei hi. Khovel in a lauh Covid-19 kia lou natna dang aleng semtute leh gingtute a bitna ding uleh gingtute’n a kineppih mahmah uh a gankhoite uh lak ah vok leh bawng sisite ziak in lungkham thei mahmah uh ahihman in, Pathian in mihing leh gantate tung a damna hoihzaw sem hon piak sakna ding in thum ni.

    C. MANIPUR MISSION FIELD:

    KIPAHTHU GENNA LEH THUMNA DINGTE:

    1. Ms Rupesori w/o Evan. M. Deba Accident ziak a kha khat val Shija Hospital a etkol ahih nung in hoih deuh in pawt ta hi. Toupa’n i thumnate hon dawng ahihman in kipahthu gen ni.

    2. Pathian in Covid -19 ziak a semtute leh gingtute kem bit a, neek-le-taak tasam leh suansam leng omlou a, huhna field in hawm thei zel ahihman in Pathian kiang ah kipahthu gen ni.

    3. Semtuten’ Pathian thu a lungluut mi a neihte uh, itna toh bohzui a, counselling hoihtak a neihpih ua, khelh kiphawk a kisikna diktak toh Jesu a Lal leh Hondampa ding ua a hon san theihna ding un Pathian khasiangthou vehna ngen in thumsak ni.

    4. Semtute’n mimal a haksatna, damlouhna leh inkuan buaina tuamtuam a tuahte uh suanlam a nei lou a, hiaite tungtawn a Toupa naihsem a, a ompihna tang a, hatna thak leh khalam vualzawlna thupizaw a hon tan chiat theihna ding un thumsak ni.

    5. MEBC Thanga Salam a Vice-Chairman, N. Damu Singh in May 3, 2020 in thupina gam ah honna paisan ta hi. Amah ahihleh Native casual worker a semtu N. Joshua, Khordak a semlel pianna pa ahi. A zi in thuaksiam lou in ngaihtuahna lam buai ahi chih zak ahihziak in Pathian khamuanna leh hihdamna ngen in thumsak ni.

    6. Field a semtute’n Pathian sapna theichian a tua a dawnna utoh kituak a khamangthangte itna taktak toh a hon sepzel ua, gingtu omsate vakna leh kepna lam a leng a hong masawn theih ua, tunung a makai heutu ding Pathian in a hon piakna ding in thumsak ni.

    7. Toupa’n semtute chidamna toh a ompih touh zel bang in maban a leng chidamna hoihtak toh a ompih a, kum khat sung a sepkhiat dia seh leh guan a neihte uh lohchingtak a a sepkhiat theihna ding un thumna ah phawk ni.

    8. Field in labu Singlup Esei, puahphatna bawl a sutthak asawm uh tuin Meitei mayek etdik ding in sam lel hi. Melma van zat hihbuai thei tam ahihman in Pathian panpihna ngen in thum ni.

    D. ASSAM AREA (Hojai, Lumding & Goalpara):

    KIPAHTHU GENNA LEH THUMNA DINGTE:
    1. Toupa gamna i sepna ding a mun thak i etna Assam area a Hojai, Lumding leh Goalpara munte daltu omlou a Field piching a puan a hong hihpah theihna ding in thumna tampi toh A misiangthoute’n delhzui ni.
    2. Kumnawn a Dima Hasao District sung Dimasate khua, Maibong pansan a nasepna pat ding a gel a om daltu omlou a sepsuah ahihtheihna ding in thum ni.
    3. School kai naupangte’n online tungtawn in class la thei zel uh kipahthu gen in, maban lamzang a hong sin theihna ding un thumpih ni.
    4. Goalpara Area semtute Covid-19 apan Pathian kepbitna ngetsak ni. Amau omna area ah +ve bangzah hiam om hi.
    5. Semtute’n amau omkhakna area a pau leh ham a zil bangbangte hong siampahna ding un thumsak ni.