Gammial Aw simtute Jesu Khrist min in chibai! Khovel in natna lauhuai Covid-19 buaipih a, thildang bangmah ngaihtuah manlou a a om lai in, Toupa’n A misiangthoute thumna leh nasepna hon makaihzel a, kipahhuai sa in anuai a bang in i taklang hi.

A. HIMALAYAN MISSION FIELD

KIPAHTHU GENNA LEH THUMNA DINGTE:
1. Tutung natna hiipi ziak a lockdown hong om in niteng a kilohtawm a omte nekzonna hihbuai kha mahmah hi. Field a Saptuam 9 bang in tasamzawte kiang ah huhna a na bawl thei uh ahihman in kipahhuai i sa mahmah hi.

2. March 20, 2020 NEBC Hwaku Fellowship ah One Day Seminar om a, subject tuamtuam i semtute makaih in sinkhawmna om hi. Programme lohchingtak a zat theih in om hi.

3. Doksing a teng Mrs Aruna Bala Rai kum 15, a taksa kimkhat zeng, lupna ngak a om den dam ut in hih theih teng leh lam etna teng a hih nung un le hoihthei tuan lou hi. Pathian thu lunglut mahmah ua, Jorethang a i semtute’n nih vei saptuam memberte toh Pathian hilhna leh thumsakna va nei ua, “ka dam ngeingei leh ka innkuan un Khristian in k’ong kipe ding uh” chi uhi. “I thumnate Pathian in hon dawng a tuin hoihsot lua ka hi” chi hi. Thumna tampi toh delhzui lai ni.

4. Khovel pumpi hihbuai natna Covid-19 ziak in Saptuam Programme bawlsa bangzah hiam ahun suanngai om a, cancel ngai hial leng om hi. Pathian in hun hoih a hon piak nawnna ding in thum ni.

5. Lockdown ziak in nidang bang in ministry semtute pai thei lou uhi. Tuabang dinmun a i om lai a leng hunlem zong siam a Pathian in a hon deihnatak sepkhak theih ahihman in semtute Pathian piina leh a hon deihna bang sem thei ding a kimantak a a om theihna ding un semtute thumsak ni.

6. Mrs. Ganga Gurung leh a innkuante Kathmandu a pan in Madargach ah tunai in pemlut ua, gingtu hi kei mahle uh biakna ah lunglut in i biakinn uah va kikhawm zel uhi. Gingtu ahong suahna ding un Toupa kiang ah ngen ni. Semtute hiai natna hi apan kepbit a a omna ding un thumsak ni.

B. DHEMAJI MISSION FIELD:

KIPAHTHU GENNA LEH THUMNA DINGTE:
1. Buaina ziak a lockdown kipatma in saptuam khenkhatte’n kivehtuahna hun manphatak in zangkhawm thei uhi. Kipahthu gen ni.

2. March 04, 2020 in EBCC Lachangaon ah Rev. G Paukhanmang Guite, GS/EBC in semtu quarter bawlna mun ding ah foundation suangphuhna hun zang hi. Nasep patzui hipah mahleh, tulai khovel buaina ziak a maban sutzop theih louh a dinkhawl phot ahihman in thumna in delhzui ni.

3. March 08, 2020 in FS makaih in EBCC Itanagar ah TBSUC, TBDF leh Mission ading in kitelna neih zoh in om hi. Pathian’ Kha pina toh saptuam kem ding a telching a omte’n a kep theihna ding un thumna ah phawk ni.

4. Field Working Committee in tukum financial year 2020-2021 budget ceiling ding in ` 9,20,000/- Pathian muanna toh pawm hi. Hiai budget HQ panglou in field sung a sawm-a-khat, missions support, antangpham leh adangdang a muhsuah sawm uhi. Budget a guan bangbangte uh muhsuah ahihna ding in thumna ah phawk ni.

5. Khovel in a buaipih Covid-19 (Corona Virus) in i tenna India gam leng hong lutchilh ban ah, i omna state leh area leng bit tuanlou dinmun in om hi. Nasep theihlouh ban ah biakna kikhop leng sutzop theihlouh a om ahihna ah, hiai hun sung a gingtute a tolhmang louhna ding un thumna a phawk kawm in, Pathian in a gam nasepna ding hun hon piak nawnna ding in thum ni.

6. March 17, 2020 in Field Superintendent Rev. T Thangzasiam in Evan. Suanboy Vualnam leh Evan. Premjit Singh Goalpara field a semtute khut ah bike (Glamour) piak khiakna nei hi. Dhemaji field kichi naupang chik himahleh Pathian vualzawlna ziak a field dang a khutsam zawte panpih thei a omna ah kipahhuai i sa hi.

7. Missionary te leh a zi leh tate amau omna mun chiat ah bit leh damtak in om uhi. Khovel buaina kal ah thawmhau ni nei mahle uh ahun hun in Pathian in pizel hi. Maban ah leng nek leh dawn, bitna leh muanna Pathian in a piakna ding in thumna in delhzui ni.

8. Field in COVID-19 buaina ziak a nek-le-tak haksatna tuak innkuante kiang ah huhna bawl thei uhi. Gingtu kiloh, kuan khe theiloute a na buaise thei ding dinmun a om pawlkhat field in a huntak a huh khathei uh ahihman in kipahhuai mahmah hi.

9. Pityangchapori khua a i gingtu Mrs. Kamlaboti Doley pasal Meghalaya a a kilohna apan March 03, 2020 a inn tung Police leh doctorte’n a inkuan un va pawkhia in COVID-19 test a neihna uah bangmah mu kei mahle uh khosung mipi’n khosung lutsak nuamlou in khonawl a bukta ah a nupa un khum uhi. Semtu Evan. JK Mang in a gal apan a va thumsak leh warning pe sawnsawn lai uhi. Chouna tuamtuam omte semtute’n ahunhun a bohdan siamna a neihna ding un thumna ah phawk ni.

C. MANIPUR MISSION FIELD:

KIPAHTHU GENNA LEH THUMNA DINGTE:
1. Youth Gospel Camp, MEBC Thoubal ah March 9 -13, 2020 sung neih in om hi. Hiai hun a Jesu Hondampa dia sangthei mi 12 om uh ahihman in kipahthu gen in, gingthakte Toupa’ kha ompihna tang a ahong pichin theihna ding un ngen in thumsak ni.

2. Toupa’n’ i sepkhawmnate hon vualzawl a, thumna a pang ding, thilpiak a pang ding leh khamangthang mat ding tatsat lou a semtute tungtawn a hon piak zeelte ziak in kipahthu gen ni.

3. Toupa’n semtute leh gingtute Covid – 19 lak apan hon venbit ziak in kipahthu gen ni.

4. Semtuten’ Pathian thu a lunglut mi 19 a neihte uh, itna toh bohzui a, counseling hoihtak a neihpih ua, khelh kiphawk a kisikna diktak toh Jesu a Lal leh Hondampa ding ua a hon san theihna ding un Pathian Khasiangthou ompihna ngen in thumsak ni.

5. Semtute’n mimal a haksatna, damlouhna leh inkuan buaina tuamtuam atuahte uh ziak a thazoi mai lou a, hiaite tungtawn a Toupa ompihna tang a, hatna thak leh khalam vualzawlna thupizaw ahong tan chiat theihna ding un thumsak ni.

6. Field intuan sak dia kisa i hihman in policy draft ding a mohpuakna piak a om heutute’n mohpuakna piak a om bangbang a hon sepkhiat theihna ding un tunglam pilna ngen in nakpi’n thumsak ni.

7. Laisiangthou sinzou, tunung a leader ding mi muanhuai leh ginom, michitak field in poimoh mahmah hi. Toupa’n a Gospel meisel mitlou a akhang-akhang a kuansak a om a, suangpi Jesu Khrist tung a kilamtou saptuam det leh muanhuai Meitei lak a i dinkhiat theihna ding un thumsak lailai ni.