Amasa in Gammial Aw simtute tengteng chibai! Toupa’n A min a i kalsuanna te hon ompih zel ahihdan report tungtawn a muh a om zel ahihna ah kipahhuai i sa hi. Missions Field a semtute leh a misiangthoute thumna tungtawn a sep-le-bawl i neihte leh gah hon piakte enkhawm nawn leng i chi hi.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. Evan. Diwas Rai leh a lawinu’n a ta masa ding un tanu deihthohhuai tak February 19, 2020 in nei uhi. Kipahthu genni.

2. Expository Preaching training February 18 – 21, 2020 sung Kathmandu a neih in om hi. Tua ah Field apan in semtu leh saptuam makai mi 24 va kihelthei uh ahihman in kipahthu gen ni.

3. Uttarey Station a semtute zat ding Bike khat DBMC Lamka South Division in leisak ua, tuin a bike leikhiak hita. Hiai bang semtute poimoh phawk pih a leisaktute ziak in Pathian kiang ah kipahthu gen ni.

4. HMF Office leh Quarter ding Bhuttabari a EBC gam ah March 5, 2020 a lampat hita. Kipahthu gen in, buaina bangmah omlou a lamzang tak a lamzoh a hong hihtheihna ding in thumna in phawk ni.

5. Beldangi Biakinn ding bawl in om thei ta hi. Lamzangtak a bawlzom ahihna ding in thumna ah phawk ni.

6. Gauradaha mun ah i saptuam inn khat om a, amau pansan a biakna pat semtute’n lunggulh uhi. Pathian piina ngen ni. Hiai mun ahihleh kho lian huntawktak khat himahleh Biakin om nailouhna mun ahihman in thumna tampi toh delhzui ni.

7. Imbung leh Memeng Fellowship in kikhop theihna ding mun leh a building poimoh mahmah uhi. Hon petheitu Toupa kiang ah ngen ni.

8. Gaur station ah semtu khat i nei a, a seppih ding khat poimoh mahmah hi. Pathian in tua mun a sem ding mi a hon piakna ding in thum ni.

9. Doksing khua, Jorethang apan km 7 vel a gamla ah i semtute’n ministry va nei thei uhi. Inkuan khat ava vehna uah, a innsung nu pen Mrs. Aruna Bala Rai a veilam khut leh khe zeng a, thumna va neihsak uhi. Kihong mahmah uh ahihman un a natna a hong dam a, khalam damna leng ahon ngahna ding un a innkuan un thumsak ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. February 20, 2020 in Amguri mun ah gingthak mi-3 te’n Pastor. S Thangbiakmang khutah baptisma tang uhi. Hiai mun ah hun bangtan hiam sung baptisma tang ding omlouh nunga Pathian in gah hon piak ahihna ah kipahhuai mahmah hi. Amaute ziak a kipahthu i gen kawmkawm in ginna a hong pichin theihna ding un thumna ah delhzui chiat ni.

2. Pathian in Amguri a Biakin mun ding hon piak nung February 07, 2020 ni in semtute’n temporary Biakin bawlna nei ua, nikhat sung in Biakin amau zat theih ding kilawmtak tungkhia in a latna leng nei zui ngal uhi. Saptuam a gingtu ding Pathian in hon piak behna ding in thumpih zomzel ni. Semtute’n gingtute chidam tak a hon keptouh zelna ding un thumna ah phawk ni.

3. Tulai in semtute’n mun tuamtuam ah houlimpih mi bangzah hiam nei lel uhi. Amaute’n sahkhovai khenkhat ziak in thupukna bawl thei nailou uhi. Sahkhua dik honmuh theihna ding un thumna in phawk ni.

4. Field apan tukum in Class- X (SEBA- Assam board) exam mi-9 om hi. Amaute’n February khasung in exam lohching tak in hon zoukhia uhi. Hichibang a kumteng a Class-X exam bangzah hiam omthei zel Pathian vualzawlna ahihman in kipahthu gen pih ni.

5. Dokhinchapori khua a i gingtu Mrs Jun Doley w/o Shusil Doley Dakuakhana Health Sub-center a naunei dia ki pawlut himahleh, doctor ten Dhemaji civil hospital ah sawl uhi. Aman tapa-4kg a lian melhoih tak neikhia hi. Evan. Haukhosiam Guite in a minphuahna nei in Siam Samuel chih min phuak hi.

6. Amguri saptuam a numei pawl tamlou chik omte’n saptuam vanzat um leh bel leina ding kilohna nei uhi. Hichibang a kilohna hon neih theih uh kipahpih huai mahmah hi. A project uh a sepsuah zohna ding un thumna in phawk ni.

7. Evan. T Chinbiakmung te inn luahna neitu tapa lungsim lam buaina uang thei mahmah hi. Tu’n mental hospital, Tezpur ah doctor ten enkol lel uhi. A pianna nu lungkham a kapkap ahihman in, Pathian thu houlim pihna a vangkim in semtute’n nei thei zel uh. Hiai damlouhna tungtawn a Pathian hing hon muhna ding un thumpih ni.

8. Tuni chiangchiang ah missionary te leh a zi leh tate un amau omna munchiat ah maban sawn theizel uh. Kho hun hong kikheng ding ah naupangte hitang, khosik leh a dangdang om nuam mahmah. Banah semtute bike a Kilometer tam pipi vialtai a kuan khe gige ten chidamna poimoh lua uhi. Pathian venbitna leh damtheihna ngen in thumpih ni.

9. Field nuai a om EBCC Itanagar in Upa Ordain khat a neih Upa Haulemthang Gualnam in February 25, 2020 in thupina gam ah hon paisan phut in saptuamte phawng mahmah hi. Biakin mun ding a buai a kipan amau inn pansan a kikhopna neizel ahihna uah saptuamte maban ding gen hak mahmah dinmun in om hi. Pathian in a misiangthoute maban ding hon pizelna ding in thumna ah phawk chiat ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Manipur Missions field a i sepna Jiribam Biakin, Thoubal Biakin kekletna ding, Wapokpi Biakin kibawlte sutzop theih zel a om ahihman in kipahthu gen ni.

2. Toupan’ i sepkhawmnate hon vualzawl a, thumna a pang ding, thilpiak a pang ding leh khamangthang mat ding tatsat lou a semtute tungtawn a hon piak zelte ziak in kipahthu gen ni.

3. Semtute’n Pathian thu a lunglut mi 30 a neihte uh, itna toh bawhzui a, counseling hoihtak a neihpih ua, khelh kiphawk a kisikna diktak toh Jesu Khrist a Lal leh Hondampa ding ua a hong san theihna ding un Pathian khasiangthou ompihna ngen in nakpi’n thumsak ni.

4. Semtute’n mimal a haksatna, damlouhna leh inkuan buaina tuamtuam atuahte uh ziak a thazoi mai lou a, hiaite tung tawn a Toupa ompihna tang a, hatna thak leh khalam vualzawlna thupi zaw ahon tan chiat theihna ding un thumsak ni.

5. Tuailaite’n Gospel Youth Camp March 9–13, 2020 sung Thoubal Khunou ah nei thei uhi. Hiai hun in thupi in “Keimah ah om un, kei leng noumau ah ka om ding” Johan 15:4” chih zang uhi. Semtute mah in thugenna hun zang ua, Pastorten devotion zang uhi. Hiai camp tungtawn a gah thupitak muh a hong hih theihna ding in thumna in delhzom lai ni.

6. Field inntuan sak dia kisa i hihman un hiai ding toh kisai a policy hoihtak bawlkhiak a hong om a, inntuan sak thei ding tanpha a Toupa’n hon pina ding in thumni.

7. Laisiangthou sinzou, tunung a leader ding mi muanhuai, ginom, leh michitak poimoh mahmah hi. Toupa’n a Gospel meisel mitlou a akhang akhang a kuansak a om a, suangpi Jesu Khrist tung a kilamtou saptuam det leh muanhuai Meiteite lak a dinkhiat theihna ding in thumsak ni.