Amasa in Gammial Aw Simtute tengteng Kumthak Chibai! Kumthak ahih toh kiton in lungsim leh ngaihtuahna thak toh mission field lam galdot nawn leng i chi hi.

A. HIMALAYAN MISSION FIELD

I. THU TUAMTUAM:
1. November 12 & 13, 2019 sung in Taplejung ah Biblical Church Planting Seminar neih in om hi. Hiai hun in semtu mi 19 paikhawm ua, sinsaktu in Riverbend College and Seminary, Georgia apan in mi 3 pang ua, sumsente leng amau sponsor uhi. Tuabang hihtheihna ding a panlakpih Mr. Ngulsuanmang Songput, Siliguri tung ah kipahna lian mahmah hi.
2. November 16, 2019 in Kathmandu Saptuam vaisaina a Seminar neih a om ah mi 50 vel kihelthei ua, Evan. Geeta Subba in Saptuam a Dorcaste poimohna gen in, Gindan diklou apan pilvanna ding Pastor Prem Raj Bantawa Rai in sinsakna pia hi. Kathmandu saptuam ban ah, Dhading apan leh Pokhra apan in mi bangzah hiam leng va ki-helthei uhi.
3. November 21, 2019 in Ektin ah tanggam Saptuamte ading ngimna in Saptuam makaite ading Seminar ni khat sung sai a om ah mi 80 vel paikhawm thei uhi. Hiai hun in thupi tuamtuam: Saptuam kivaipuakna, Nungzuihna, Thugendan, Khasiangthou toh kisai leh Gindan dik kisinsakna hun manpha tak leh lohching tak zang uhi.
4. Lamka South Division, Missions Committee in Himalayan Missions Field November 22 - 27, 2019 sung vehna nei uhi. Hiai hun sung in Sikkim a Jorethang station in a poimoh mahmah hanmual fee ding a piaksak ban uah, Takuthang station in a poimoh mahmah uh Guitar khat pia ua, Uttarey station ah semtute zat ding Motorbike khat pia uhi. Station omnate ah semtute leh saptuamte toh hun zangkhawm zel uhi. November 26, 2019 in semtu tengteng samkhawm in workers’ fellowship neihpih ua, report ngaihkhiakna leh semtute hasotna thugenna leh annkuang umpihna nei uhi. Semtu tengteng Khristmas gift leng pia uhi. Hiai kivehtuahna in gah hoihtak hon suah ngei i lam en hi.

II. KIPAHTHU GENNA LEH THUMNA DINGTE:
1. Toupa’n gingthak mi 16 leh gingtu baptisma tang 3 hon piakte ziak in kipahthu gen ni.
2. DMC, Lamka South in semtute Khristmas gift leh Sikkim lam a station 3te vehna thilpiak tuamtuam piakna nei uhi. Kipahthu gen in, amaute Toupa’n tamsem vualzawlna pia a, pekhe thei zel hong hihna ding un thumsak ni.
3. November 11, 2019 in Phidim ah gam leikhiak hita. Kipahthu gen ni.
4. BYF, EBCC Mumbai in Mrs. Urmila Sewa w/o Pastor Ran Kumar Sewa vehna thilpiak pia uhi. Kipahthu gen ni. Amah a hihleh a kal-a suang om at ngai ding chih himahleh a suang omna pen nasia in ahong dam ngak in a at hun ding suan in om zel hi. Damna pethei Toupa kiang ah panpihna ngetsak ni.
5. Mr. Ram Prabesh Yadhav, Gaur station a gingthak Pathian in a hon piak, cancer natna in damlou a, Pathian in i semtu zang a damna a piakna ding in thumsak ni. A hong dam chiang in Pathian a ginna hong khang mahmah ding ahihman in hihdam theitu Pathian kiang ah ngen ni.

B. KARBI ANGLONG MISSION FIELD:

I. THU TUAMTUAM:
1. November kha sung in Pastor & Evangelist-te panlakna leh Saptuamte thumpihna ziak in Pathian thutak genna leh houlimpihna tungtawn in pasal 4 leh numei 3 te’n Pastor Manthing Hanse leh Pastor Jacob Rongpi-te khut tungtawn in Baptisma tang uhi.
2. CES Tari Adong in November 4 & 5, 2019 in Evangelistic Week “ You must be born again” (John 3:7) chih thupi a nei in, Area Pastor Jacob Rongpi makaih in zang uhi. Sinlai naupang bangzah hiam in salam leh khalam a aphattuampih ban uah, heutute mahmah inleng hiai Evangelistic Week nasatak a phattuampih ahihdan uh report ngah ahi. Gah kipah huaitak hon suah lamen kawm in thumna ah phawktou lai ni.
3. Dorcas Veng Missions Committee in November 08, 2019 in Local Pastor, D. Kamchinmang makaih in, Field Saptuam naivai deuh leh gari lut theihna chiang a om saptuamte FS leh AFS makaih in vehna leh thumsakna nei uhi. Amauten saptuamte ading in thilpiak hoih taktak a piak ban uah, Cross-cultural missionary mi 5te kiang ah leng itna thilpiak pia uhi. Pathian in hiai bang thil hoih semzom thei zel ding in TBMC, EBCC Dorcas Veng vualzawl hen chih i thumna ahi.
4. EBCC Delhi Missions Committee in November 19 & 20, 2019 sung field vehna nei uhi. Amaute TBMC Chairman in makaih hi. A phakna khua a Saptuam school-te leng tawnchiat in naupangte hasotna nei zel in sweet hawmzel uhi. Saptuamte toh hunzatna ah mahni khe a ding dia muanhuai sak thu ban ah, Pathian muang le hang thil hitheilou chih omlou ahi chi’n hasotna thu gen zel in thumna neih sak zel uhi. Field nasepna a poimoh bangbang a zat ding sum-le-pai piakna leng nei uhi. Toupa’n hiai bang thilhoih leh manpha semzom thei zel ding in veina leh itna pezom zel hen chih i thumna ahi.
5. Pastor Area (Dengaon, Paklongkam, Bisarpo & Dikrutso) Conference EBCC Paklongkam ah November 16-17, 2019 sung “A Gam leh diktatna zong masa un” (Matt 6:33) chih thupi pansan in Rev N. Tuanglang FS, Evan. Chinkholal Lethil leh Evan. Robinson Teron-te’n thugenna, sinsakna & devotion hunte zang uhi. Hiai Khawmpi ah thu leh la a kidemna leng om hi. Gah kipah huaitak a suah ngei lamet ahi.

II. THUMNA LEH KIPAHTHU GENNA DING:

1. EBCC Tari Adong saptuam member leh sawm-a-khat pia kibehlap zel hi. November 4 - 5, 2019 sung Evangelistic Week CES Tari Adong in buaina bang mah omlou in zangzou thei uh ahihman in kipahthu gen ni.
2. Rongchingri, 5km Fellowship area a om Mr Kangbura Rongpi leh a koppih Mrs Rina Tokbipi, ginglou sahkhua apan Khristian a hong kipiak theih ziak un kipahthu gen in, ginna lam a khanhoih-khanpha a hong khanna ding un thumpih ni.
3. Field sung a school omten kumtawp ekzam buaina bangmah omlou in zoutheichiat ta uh. Kipahthu gen in, kumnawn a ahuntak a a kipat nawn theihna ding un thumpih ni.
4. Evan. Moses Teron, CES Rongali, Headmaster makaihna toh skulpute’n naupangte inn a banban a vehna November 01 a apat uh hoihtak a a zoh theih ziak un kipahthu gen ni. Hiai in gah manphatak hon suah lam-et ahi.
5. EBCC Dengaon saptuam member, Virvar khua a teng Mr Davit Teron leh Mr Robinson Teron-te’n Rongker (Khosung adia awiloute kithoihna) adia sum kithohkhawm, Khristian ahihziak ua piak siang nawnlou ahihman a apiak kei uleh, khua a teng theilou ding chih thu om. Thumna in panpih ni hang.
6. Tukum 2020 akipan Karbi Anglong Missions Field ama khe a dinsak tak ding chi a Indigenization Policy i neih, buaina leh haksatna bangmah omlou a sepsuah ahih theihna ding in thum ni.

C. DHEMAJI MISSION FIELD:

KIPAHTHU GENNA LEH THUMNA DINGTE:

1. Kapurdwa khua a om gingtu Mr Kumar Tau in thupina gam ah hon paisan phut hi. A vui dingdan ah tanaute leh khosung mi khenkhatte toh ngaihdan kibat louhna zek om mahleh Saptuamte’n buaina bangmah omlou in vui thei uhi. A nutsiat a zi leh tate thumpih ni.
2. EBCC Lachangaon saptuamte’n sawm-a-khat buhbuk ding bawlna nei in Pastor S Thangbiakmang in a latna neita hi. Field sung adia a masapen ahihman un masawnna thupitak bang a ngai in report a taklat ahi. Masawnna tuamtuam muh theih a om zelte ziak in kipahthu gen ni.
3. Field songbook “Stuti Geet” enlarge & reprint ding project saiding a guan aom Evan. Daizachin, Evan. JK Mang, Evan. Jugeswar Charah leh Evan. Sharma-te’n amau hihtheihna tan suah in semzui lellel uhi. Lohchingtak a hon zoh theihna ding un thumpih ni.
4. TBMC, EBCC Delhi (Dwarka) in Dhemaji Missions field vehna nei uhi. Amaute’n biakin 8 (giat) pha in gingtute toh kipolhkhawmna, thumsakna manphatak in zang ua, field ading Keyboard (Yamaha PSR-S670) khat, puansilh leh sleeping bag-6 puak uhi. Missions nasepna awlmoh a veh TBMC, EBCC Delhi-te tung ah kipahhuai i sa mahmah hi.
5. TBMC, EBCC Hebron, New Lamka in year plan a a neih dungzui in Khristmas Gift, HQ. tungtawn in thon uhi. Hiai thilpiak petute deihna bang in inlusi ah field in hawmzak hi. Hichibang lametna khenlam pek apan thilpiak ziak in field saptuamte kipak mahmah uhi.
6. Semtute’n inn vehna leh houlimpih tuamtuam a neih zelte uh Jhiadal ah Mr Gambir Pegu, Mrs Niru Pegu leh Mr Sanju Pegu. Dokhinchapori ah Mrs Teromai Mili-te’ inkuan, Kapurdwa ah Mr Khardong leh a inkuante ban ah, mun tuamtuam ah leng tuabang in counseling piak ding nei zelzel uhi. Missionary-te Pathian in manphatak a hon zat sakna ding in thumpih lai ni.
7. Damlouhna toh kisai semtute tate Mr Paumuanding s/o Pastor Thangbiakmang leh Mr. Sangbiaksuan s/o Evan. T Nengminlun-te zunthakna bawl ding leh Miss Manthianmuang d/o Evan. T Nengminlun nihvei operation kibawlsa checkup ding omlaiten damna hoihtak Pathian apan a ngah theihna ding un thumpih ni.
8. Pyangchapori khua a om Evan. JK Mang in khosung naupangte Home Tuition hun bangtan hiam a neihpih nung in, khosung mite’n English LP School tanbek hong ding in ngetna bawl uhi. School a deihluat ziakun signature campaign tanpha na bawl in FS ah ngetna pia uhi. Pathian deihdan dong in field ading in thum ni.

D. MANIPUR MISSION FIELD:

I. THU TUAMTUAM:

1. November 9, 2019 in Kwakeithel in Mass Counselling programme neithei uhi. Imphal College a kai nungak mi 4 te’n Jesu Khrist Hondampa in sangthei uh. Kipahthu gen ni.
2. November 10, 2019 in Wapokpi/ Sugnu in leng Mass Counselling programme nei thei ua, Pathian vualzawlna ziak in gingthak hunkhop kibehlap uh ahihman in kipahhuai i sa hi.
3. November 24, 2019 in EBC Central Lamka in Sugnu/Wapokpi vehna nei in Lecturn hoihtak khat pia uhi. December 01, 2019 in EBCC Pearsonmun inleng Thanga Salam-te vehna nei ua, Lecturn hoihtak khat mah pia uh. Pathian kiang ah kipahthu gen ni.

II. KIPAHTHU GENNA LEH THUMNA DINGTE:

1. Khamangthang mat napi ahihdungzui in Mass Counselling Programme field in neizom tou thei zel hi. Maban a leng hon neihzom zel theihna ding un thumpih ni.
2. Semtute’n houlimpih nei gige ahihman un amaute ading in thumsak zelzel ni. Hiaite’n Jesu thutak theichian a, a hondampa ding ua a hon saan theihna ding un thum sak ni.
3. Evan. Seitamjit a kipukna ah a khe veilam siakmit kihek a, doctor-te’n a tuamsak ban uah chiangkhun zang in paithei hi. Kha thum bang rest dia thupiak ahihman in a hong damsiang baih theihna ding in thumsak ni.
4. Manipur field nuai ah saptuam -13, fellowship -10 leh School -01 nei in ki-enkol lel hi. Semtu CCM -7, NRM -20 leh NCM -11 in sem lel uhi.Tu kumthak, 2020 a station a tamthei lam honbeh kisawm ahihna ah, Toupa’n louma keklian thei dia a hon vualzawlna ngen in nakpi in thum ni.
5. Tukum 2020 March kha Yaosang hun chiang a Youth Gospel Camp neih nawn ding sawm in field BYF te kisakhawl lel uhi. January 12 apan in motivation bawl kipan ding uhi. Tuailai khamangthang awlmoh leh hiai ding a panla ngap heutu muanhuai i neihte ziak a kipahthu gen in leh Camp lohchinna ding in thumsak ni.
6. Toupa’n saptuamte thumna hon dawng zel in i field in khantouhlam a manoh zel ziak in kipahthu gen ni. Tukum 2020 February kha vel a Office thak luah theih ding lametna lianpi kinei hi. Toupa’n ahun hun a i poimoh taksapte a hon piakna ding in thum ni.