Amasa in Gammial Aw Simtute tengteng i Toupa leh Hondampa Jesu Khrist min in Khrismas chibai aw. Bethlehem lam ngaihtuahna a neikawm in, mission fieldte a Toupan thil thupi hon muhsakte anuai a bang in enkhawm nawn leng i chi hi.

A. HIMALAYAN MISSION FIELD

I. THU TUAMTUAM:
1. October 13-17, 2019 sung Birtamode ah Native Workerte ading in Discipleship training neih in om hi. Pastor Vanlalngai Langel leh Pastor Purushottam Adhikarite sinsaktu in pang uhi. Training hun a telte’n hamphat pih mahmah ua, nungtolhte kiknawnna ding sinlai hoih mahmah leng sinkhawm uhi.

2. BYF Plain Area malakna in October 29 leh 30 in EBCC Pathari ah Revival Programme nei uhi. Hiai hun in tuailai hunkhop paikhawm ua, Pastor Prem, Evan. Dinesh leh Mr. Kalyan Bajgain-te’n thutak genna leh Bible quiz neihna hun zang uhi.

3. Guwahati ah November 1-3,2019 sung missionary-te adia nupa Camp ah Evan. Dinesh Khadka, Evan. Givson Rai leh Evan. Philip Khapangite innkuan vatel thei uhi. Report a bawlna uah, thilthak tampi a sin ban uah, lungkiak theihna dinmun a din hun chiang a panpihna muh theihna ding Laisiangthou thu leh midangte pansan a thathak lakna ding, leh innkuan a missionary ahihdan khawng phawk khe thakthak ua kipahpih mahmah uhi.

4. EBCC Shillong, Dorcas Committee in Himalayan Missions Field November 2-7,2019 sung vehna va nei uhi. Tua hun in station tuamtuam a phakna uah veh a om saptuamte apan tanchin tomkim ngaihkhiakna nei zel in amaute adia thumsakna hun leng zang thei zel uhi. Saptuam mipite ading itna thilpiak a ken bangbang uh piakna hun leng zang uhi.

II. KIPAHTHU GENNA LEH THUMNA DINGTE:
1. Kum thak gal-et in sepdan hoihzaw leh muhkholhna Toupa’n a hon piakna ding in thum ni. Field a semding, native casual a sem ding mi lak hun nawn ding ahihman in Pathian kiang ah ngen ni.

2. Khristmas hun pen gingloute toh kichimatna hoihzaw bawlna hun ahih a, tanchin hoih genzakna hun lemtang ahihna ding in Field sung a saptuam chihte thumpih ni.

3. Budhabare Saptuam in La leh Music tungtawn in tanchin hoih December 18, 2019 chiang in a khua ua mun poimohna mun pen ah Open Air programme khat bawl hiding thumna ah phawk ni.

B. KARBI ANGLONG MISSION FIELD:

I. THU TUAMTUAM:
1. Field Khawmpi & Missions Conference 2019: Field Vaihawm Khawmpi & Missions Khawmpi kithuah EBCC Bithilangso ah October 4-7, 2019 sung Programme manphatak zat in om hi. Thugentu Rev. N. Tuang Lang FS, Devotion pitu in Rev. Jameson Bey, AFS leh Seminar pitu in Mr. Jacob Ronghang ahi uhi. Khawmpi in EBCC Basbari Saptuam enkoltu ding in Binon Marak Ordination pia hi. Kum nawn (2020-2021) KAEBC Budget ding in Rs. 24,60,000/ guang uhi.

2. CES Rongali in October 25 & 26 sung Evangelistic Week nei ua, Area Pastor Manthing Hanse in a honna nei in, Evan. John Milik in thugenna hun zang hi.

3. New Langrik Convention English School (CES) in October 24 & 25, 2019 sung, EBCC New Langrik Biakin ah Evan. Ngaihnuam, Evan. Sarthe Hanse leh Evan. Kache Hansepi-te’n thugenna hun zang uhi. Student-te’n nuamsa in kipak mahmah ua, gah kipah huaitak hon suah leng lamet ahi.

4. EBCC Tari Adong Local Committee leh Local Dorcas Committee-te pangkhawm in Mijung leh 10KM area ah tanchin hoih gen ding leh ginglou damloute thumsakna nei ding in; amun a Evangelist-te leh Upa Honsing Hanse-te makaih in tanchin hoih genna & thumsakna nei thei uhi.

5. Bial BYF Hotdamna Camp: Bial BYF Committee saina nuai ah EBCC Dimapur Biakin ah, Tuailai Hotdamna Camp, Evan. Lianding Guite makaih in October 4-8, 2019 sung neih in om hi. Hiai Camp ah piangthak mi 15 leh kilanthak mi 40 om hi.

6. Field HQ Puahna: EBC HQ. Field HQ. leh Bial-te pangkhawm a Field Headquarter compound fencing, gate leh kongtual puahna kinei a, etlawm mahmah ta hi.

II. KIPAHTHU GENNA LEH THUMNA DINGTE:
1. Paklongkam, Rongali leh New Langrik CES-te’n Evangelistic Week zang zouta. Kipahthu gen in kilatna nei naupangte thumpih ni.

3. EBCC Rongali in Silver Jubilee programme December 17-18, 2019 sung zang ding uhi. Hiai hun manpha tak a zat ahih theihna ding in thumna in phawk ni.

4. Jesu Khrist lunggulhna nei Mr. Robinson Bey, Mr. Soron Bey leh Mrs Jangmi Terangpi-ten Jesu Khrist a Pathian hotdamna a hon muhna ding un thumpih ni.

5. EBCC Hidim Teron apan Evangelist-te hahpanna ziak in MMV a pang thak mi 8 om thei, Kipahthu gen in, a chiam bang ua a piak zom theihna ding un thumpih ni.

6. KAEBC sung a Workers-te leh a innkuante uh Pathian in damna pia in, sem leh bawl thei a om siausiau uh ahihman in kipahthu gen in, thumpih zel ni.

C. DHEMAJI MISSION FIELD:

KIPAHTHU GENNA LEH THUMNA DINGTE:
1. EBC in field thak ding a i etna Assam a mun thumte lak a Lumding (Dimasa Field) a sem ding Evan. Thangbiaksuan leh a innkuante field in khakna programme manpha tak in zang hi. Ama etkol Dunaguri area Evan. Haukhosiam Guite in thuthak om ma enkol ding hi, thumna in delhzui ni.

2. October 9-12, 2019 sung EBCC Lachangaon, North Lakhimpur Dist. ah Field Khawmpi 3veina zatzoh in om hi. Rev. B Chinkhengoupau, CC in thugenna hunteng zang in, Evan. JK Mang in devotion hun ah sinsakna pia hi. Lam tuamtuam ah khawmpi field in phattuampih mahmah ahihman in kipahthu gen ni.

3. October 4, 2019 in Evan. Haukhosiam Guite leh a zi Evan. Vungbiaklunte sepna mun Lachangaon ah gingthak mi 5 in baptisma tang uhi. Huai hun in nupa kawp 1 in leng kitenthakna nei uhi, amaute thumna ah phawk zom ni.

4. October 14, 2019 in Evan. H Jamkhanmang sepna area a om Bolukhaguri kichihna mun ah gingthak mi 3 in baptisma tang uhi, Pathian mizat hong hihna ding un thumna in delhzui zel ni.

5. Lachangaon area a saptuam 5 in a tamthei lam kivehtuahna programme neihsawm uhi. Hiai in ki-ittuah semna leh gingtute kihanthawn thakna a tutna ding in thum ni.

6. Mr Debyo Mili (Naharbali) te a innkim leh kiangte un kithoihna sisan (gan sisan) a inn nunglam leh malam ah vatheh in sukbuai sawm theizel uhi. Ginna hatsem hon neihna ding un thumpih chiat ni.

7. Tulai in semtu missionary-te’n houlimpih (counseling) lellel bangzah hiam nei uhi. Amaute’n Khrist hon muhchianna ding un thumna ah delhzui ni.

8. October 14, 2019 a Bolukhaguri a baptisma piak a om Mrs Renumai Kumbang in December kha a nau nei ding chih ahihlai in anaupai a gilsung ah si hi. Assam Medical College, Dibrugarh ah normal in neikhe thei a kipahhuai, hiai tuahsiatna ziak a ginna hong bahlouhna ding un thumpih ni.

9. Field in project a aguan Stuti Geet (Song book) enlarge & reprint ding nasep paitou zel hi. Hiai sepsuahna ding in DBYF, EBC Mizoram Division in HQ tawn in panpihna pia. BCD, Shillong in naupang kimawlna van leh puansilh tamtak thon, hiaite ziak in kipahthu gen ni.

D. MANIPUR MISSION FIELD:

KIPAHTHU GENNA LEH THUMNA DINGTE:
1. Field in Mass Counselling programme October 15-16, 2019 sung MEBC Thamnapokpi a a neih hun in khamangthang 1 Toupa’n hon pia hi. Kipahthu gen ni.

2. Field Music Sub-Committee in Labu second edition ding a bawl uh nasepna pai lellel hi. Buaina omlou a zoh a hong hih theihna ding in thumna in phawk ni.

3. October 31 - November 4, 2019 sung Missionary Couple Training, Guwahati mun ah semtu 3, a zite utoh vatel thei ua, manpha mahmah kipahthu gen ni.

4. December 14, 2019 chiang in TBMC, EBCC Lamphelpat in field a semtute motivational Joint Fellowship, Thamnapokpi ah neihpih sawm uhi. Manpha tak a zat ahih theihna ding in thumna in phawk ni.

5. Khamangthang mat nnapi ahih dung zui in Mass Counselling Programme field in nei zom tou zel hi. A vaisaitu local committee leh semtute, speaker leh counsellorte a ding ban ah, Khamangthangte Jesu khebul tut ahihna ding in leng nakpitak in thumpih ni.

6. Semtute’n houlimpih ding a neih zelte uh ziak in kipahthu gen in, houlimpih a omte’n Jesu thutak theichian a, a hondampa ding ua a hon san theihna ding un thumsak ni.

7. November 6, 2019 in Naranseina a Chairman W. Khelen in thupina gam ah honna paisanta hi. A nutsiat innkuante leh a kep saptuamte ading in Pathian khamuanna ngetsak ni.

8. FBYF malakna a October 5 - 6, 2019 sung Thamnapokpi a Youth Revival Camp neih a om lohching mahmah hi. Hiai hun in Rev Thang Johnson FS leh Pastor L. Amuba in thu gen uh, Toupa nasep thupite ziak in kipahthu gen ni.