Gammial Aw | KTZ

    KTZ
    Gammial Aw

    Gammial Aw | July 2019

    Amasa in Gammial Aw Simtute tengteng i Toupa leh Hondampa Jesu Khrist min in chibai aw. Mission field-te a Toupan thil thupi hon muhsakte anuai a bang in enkhawm nawn leng i chi hi.

    A. HIMALAYAN MISSION FIELD
    I. THU TUAMTUAM:
    1. Dharampur Local Saptuam makaihna in One-Day Seminar May 25, 2019 in nei uhi. Hiai hun ah Pastor Dilip Kumar Samal in thupi 2; Biakna bang hi a, chih leh Gingtute adia biakna a kihel a poimohna sinsak hi. Pastor Prem Raj Bantawa Rai in thupi 2 mah; Kiteenna sung a numei leh pasalte mohpuak leh Christian hinkhua chih thupite pansan in sinsakna pia hi. Saptuam mi 35 vel hiai hun ah kihel thei uhi.
    2. May 12-24, 2019 sung Ektin NEBCC ah Basic Bible School nei ua, hiai hun ah semtute mah in sinsak uhi. Evangelist bangzah hiam in localte huh in nektak saisak uhi. Hiai school ah saptuam kho tuamtuam apan mi 40 sintu paikhawm ua, a zoh ni in Participation Certificate piak in om uhi. Hiai Basic Bible School huhna EBCC Aizawl in pia a i kipak mahmah hi. Hiai Basic Bible School feltak leh manphatak a zatzoh a om thei ahihman in Toupa’n thupina tang hen.
    3. Field Dorcas malakna in Handicraft trainingna Taplejung mun ah May 27-31, 2019 sung nei uhi. Government in phalna apiak sinsaktu khat in sinsakna pia a, a telte kiang ah certificate leng hawmkhiak in om hi. Hiai hun ah mi 12 kihel thei ua, thil dangdang tampi a sin ban uah, nahpateh keu apan a van tuamtuam bawldan leng sin uhi. Training hun sung, zingkal teng Pathian toh kithuahna hun in zang zel uhi. Training a va telte’n amau saptuam chiat ah training pesawn thei ding uhi. Hiai training, Field Dorcas in sponsor a bawl ahi a, kipahhuai mahmah mai hi.
    4. Field Missions Committee malakna in Nepal sung a mun 5 station a neih theih ding a chiamteh in om hi. May 29 - June 3, 2019 sung in Survey team 2 sawlkhiak hi ua, information poimoh om bangbang amaute’n kaikhawm in Field Superintendent kiang ah pelut uhi. Pathian in mun hon piak hi ngei ding a i theih Field station a neih theih ding mun nga; Bhojpur Bazar, Tyamkemaiyum, Hatuwagadi, Gaur leh Mohali Bazar munte ahi. Field station thak honkhiak ahihtheih ngeina ding in Pathian kiang ah ngen ni.

    II. KIPAHTHU GENNA LEH THUMNA DINGTE:
    1. Basic Bible School, May 12 – 24, 2019 sung lamzangtak a zat zoh ahihtak ziak in kipahthu gen ni.
    2. Field Dorcas Fellowship saina a Handicraft training May 27 – 31, 2019 sung Taplejung a om lohchingtak a zoh ahihtak ziak in kipahthu gen ni.
    3. Field Missions in tup a aneih, station thak ding survey bawl ding chih sepkhiat theih a om man in kipahthu gen ni. Ban ah, Station thak ding Survey kibawlte Pathian hon pina ahihleh, station thak hon theihna ding a poimoh mi leh a sum ahon piakna ding in ngen ni.
    4. Toupa’n gingthak mi 13 leh baptistna tang mi 07 hon piak nawnte ziak in kipahthu gen ni.
    5. GBC a graduate thak Prakash Shiwa in Birtamode pansan in Evangelist-nna June 2019 in sempan. Lamzangtak leh gahsuahtak a a sep theihna ding in thumsak ni.

    B. KARBI ANGLONG MISSION FIELD:
    I. THU TUAMTUAM:
    1) Director of Missions in Field Vehna Nei: April 27 – May 2, 2019 sung Director of Missions leh a team-te’n field sung ah saptuam tuamtuam omte vehna nei uhi. May 02, 2019 in Field sung a semtu om tengteng toh kithuahkhawmna EBCC Rongchingri Biakin ah om a, hiai hun in Director of Missions in “Philosophy of Church Ministry” sinsak a, Upa Joel G. Hangzo, Chairman, CMSC in hasotna thu manphatak genna nei hi. Programme zoh in itna annkuang sawkkhawmna nei uhi.
    2) Baptisna Piakna: May 05, 2019 in EBCC Basbari ah mi 5 in Jesu Khrist Lal leh Hondampa ding in sang ua, Area Pastor Jacob Rongpi khut ah baptisna tang uhi. Ginna a hong pichinna ding un thumpih ni.
    3) May 14 – 18, 2019 sung GBC Students 27 te’n Karbi Anglong Field ah Field Exposure vanei uhi. FCWC te’n center thum a khen in Pastor-te etkaina nuai ah ministry pai uhi. Saptuam sung leh skulte ah manphatak in kizang ua, vehkhak a omte’n khalam leh salam a phattuamna tang uhi. Field Superintendent in kipahthu genna toh thumsakna in khakkhiakna nei hi.
    4) Saptuam Veh: May 2019 sung Field Baptist Dorcas Fellowship in kivehtuahna hun in zang uhi. May 18-19, 2019 in Rongali BDF te’n Paklongkam vehna nei ua, May 25-26, 2019 in Tari Adong BDF te’n area Pastor chial in Rongali BDF te vehna nei uhi. May 26,2019 ni in EBCC Den Arong BDF te’n area Pastor makaih in Rongchingri Diphu BDFte vehna nei uhi. May 16, 2019 mah in FBDF memberte leh AFS makaih in Paklongkam worker-te leh New Langrik worker-te vehna nei uhi. Hiai hun ah FBDF te’n worker-te kiang ah bedsheet leh lukham-cover pia in vualzawlna leng ngetsak uhi.
    5) Workers Fasting Programme & Outreach: May 16, 2019 in Kaibong Tisso khua ah Area Pastor makaihna in anngawl thumna zinglam dak 7:00 AM – 03:00 PM tan nei uhi. Hiai hun ah GBC student-te leng kihel thei ua, manpha tuan mahmah hi. May 24,2019 in Disama area ah Area Pastor makaihna in outreach programme nei ua, Gospel chi (seed) Disama a kituh a gah Pathian in ahon piakna din thumna ah phawk ni.

    II. KIPAHTHUGENA LEH THUMNA DINGTE:
    1. Evan. John Milik tapa damlou a om saptuamte thumpihna ziak a hong dam ahihman in kipahthu gen ni.
    2. Mr. Debendro Phangcho gingloumi damlou a om, saptuamte thumna ziak a hong damsuah ahihman in kipahthu gen in a damna apan Khrist khebul a hong pai theihna ding in Pathian kiang ngen lai ni.
    3. Dikrutso Fellowship leh Waisong Rongkhelan ah Biakin lamna ding kisa lellel ua, ahon sepsuah theih na ding un thumpih ni.
    4. May kha sung in Field BDF te kivehtuahna leh GBC Student te’n Karbi Anglong Field a vehna uh lamzangtak a neih zoh ahihman in Pathian kiang ah kipahthu gen in, Field sung ah vualzawlna hon tuntu ahihna di’n thum ni.
    5. Den Arong area a Tongklok khua a i saptuam member uh Mr. Rahul Timung kho mipite’n kali bia in ngoh uh, saptuamte thumna ziak in hiai ngohna thu hong dai thei hi, kipahthu gen ni.
    6. Bokalia area a Langsun Terang khua ah Pathian thu puaklut a omta, ahong gahsuah theihna din thumna ah phawk ni. Longnit ah Khristian lunglut Mr. Harlongpi Timung leh Mr. Amor Terang-te’n Jesu Khrist kichiantak a hon muh theihna ding un thumpih ni.

    C. DHEMAJI MISSION FIELD:
    THU TUAMTUAM KAIHKHAWM:
    1. Pathian in a gam nna i sepnate hon vualzawl zel in Lachangaon mun ah ginthak mi-6 semtute tungtawn in hon pia hi. Amaute lak ah mi- 4 in May 28, 2019 in Pastor. S Thangbiakmang khut ah baptisma tang uhi. Amaute ginna a hong pichinna ding un thumna ah phawk in, Baptisna tang nailou mi- 2 te’n hunlem masa a hon lak theihna ding un thumpih ni.
    2. Field ah gingtu kibehlap zel chia i kipah mahmah lai in Mr. Umesh Chungkrang (Pyangchapori khua) in May 4, 2019 in Kidney problem ziak in hon beisan a, May 19, 2019 in Mr Manuranjan Patil (Kapurdwa) inleng TB natna ziak in hon beisan hi. A nutsiat a zi leh tate uh Pathian khamuanna ngetsak ni. Amaute vehna ding TBSUC, EBCC Zion in ` 5,000/- tuak a sumtang a athot te uh Field Superintendent in amaute thumsak kawm in piakkhiakna nei hi. Thilpiak petute tung ah kipahthu i gen hi.
    3. Field Superintendent Office Campus ah multi-purpose building honkhiakna zoh ahih chiang in Dhemaji Town Fellowship patkhiak ding Field in lunggulh mahmah hi. Fellowship patkhiak ahih theihna ding in thumtute’n thumna ah phawkzel ni.
    4. July 23-27, 2019 sung EBCC Guwahati ah Missionary te zite leh Missionary numeite ading in Headquarters in camp sai ding hi. Field akipan semtu numei te leh missionary zite kimtak a ava kihel theih ua, damlouh hitanna tuamtuam in a sukbuai louhna ding un thumpih ni.
    5. Missionary te’n Pathian thu houlim pih tuamtuam a neihna lak uah tulai in Mr. Hemanto Doley (Pyangchapori) te nupa, Mr. Anondo doley (Dokhinchapori), Mr. Rastrapati Pegu (Dokhinchapori). Mr Darasing Pegu leh a inkuante Pathian thu lunglut ua counseling neihpih san lel hi uhi. Jesu Khrist hon muhchet theihna ding un thumna ah delhzui ni.
    6. Kholum kipanta ahihna ah field a saptuam mite kuapeuh a chidamna ding uleh tuktui luang ding hita tuilian nasalua in a sukbuai louh a, semtute’n ministry hoihtak a neih theihna ding un thumpih ni.
    7. Taksa damlouhna nei i na thumpih zelte uh Mr Chandrakanto Mili (Pyangchapori) khua khe-zeng pian a om thumna in delhzui zel ni. Huan Evan. H Jamkhanmang leng lupna ngakden hikei mahleh taksa hat zoulou in damdawi ne kawmkawm in om hi. Amaute hong damna ding un thumpih ni.

    D. MANIPUR MISSION FIELD:
    I. THU TUAMTUAMTE
    1. May 26, 2019 in Thamnapokpi BYF in Thiyam Konjin ah Thoubal Pastor area teng toh biakkhawmna fellowship nuamtak in va zatpih uhi. Hiai hun in Evan. P. Anand in thutak genna hun zang a, thilpiak steel bucket leng piakna nei uhi. Field a saptuam omte amau leh amau kivehtuah thei a ompanta ahihman un kipahthu gen ni.
    2. EBCC Tribal Colony in May 26,2019 sunnung in IES Thiyam Konjin itna thilpiak toh vehna va nei uhi. Hiai hun in kithuahkhawmna hun a neih ban uah hanthawnna leh thumsakna leng vehtute’n va neihsak ua manpha i sa hi. Toupa’n a thilhoih hih tungtawn un thupina tang henla, a vualzawlna tamsem luanlutna din amaute hon zatsak leh i chi hi.
    3. May 28-30, 2019 sung Director of Missions, Missions Coordinator leh Upa Joel G. Hangzo, Chairman CMSC ten Field Superintendent makaihna in Manipur Missions Field a saptuam leh fellowship omteng vehsuakna nei uhi. Semtute inn teng phasuak in, thumsakna va nei ua, manpha i sa mahmah hi.

    II. KIPAHTHU GENNA LEH THUMNA DINGTE:
    1. Saptuamte thumnate Toupa’n hon dawng in Manipur Missions Field lam tuamtuam ah masawnna muh theih ding om thei pan panta ahihman in kipahthu gen ni. Saptuamte dinmun kibang lou ahihna ah semtute’n khalam leh salam a piching tak a hon kep theih nading un thumpih ni.
    2. Field in year plan leh project a aneih Gospel Harvesting Camp neih suak ding chih ahi. Semtute’n khalam a pianthakna lunggulh mi 5 – 15 kikal khawng a neih chiang ua camp pat ding in geel uhi. Hiai ding in semtute’n a lunglut mi a zon uh ngai ahihman in Toupa kha ompihna ngetsak ni.
    3. Semtute’n houlimpih aneih lelte un Jesu Khrist a hondampa ding ua hon san theihna ding un thumpih ni.
    4. Toupa vualzawlna ziak in Thoubal khunou leh Naranseina te a biakin uah tazou lou ding khop gingtu hong kibehlap theihtak ziak un kipahthu gen ni. Biakin keklian thei dia Toupa ompihna ngetsak ni.
    5. Field in Indigeneous policy paipih a intuansak ding dan geelna sepkhiat ding maban ah om lellel hi. Pathian kha ompihna toh time-frame plan/policy lohching leh gahsuah thei ding bawlkhiat ahih theihna din thum ni.
    6. Awangjiri leh Heisnam fellowship-ten Pathian ompihna tang a amau atuam ding biakin lamna ding mun-le-mual ahon neih theihtak ziak un kipahthu gen ni. Tun alam na ding sumlepai kaikhom din kisalel uh, Toupa ompihna ngen in thumsak ni.
    7. Lamphelpat EBC/TBMC in Field sung ah Quarter bawlna ding leh Orientational training neih ding pan lakpih sawm uhi. Toupa’n hiai bang awlmohtu hon piak ziak a kipahthu gen in leh tup leh ngim a om bang a lohching leh gahsuah a sepkhiat ahong hihtheihna ding in thumna ah phawk ni.
    8. Field in plan/project a leng a guan batlouh field sung ah sep ding poimoh hiai anuai a omte a hunhun a Toupa’n hon piakna ding in thumna in delzui ni.
    (i) Thamnapokpi a Pastor Quarter hoih nawnlou ahihman in a thak hon neih theihna ding un thum ni.
    (ii) Nachou ah Quarter poimoh mahmah, thumna in phawk ni.
    (iii) Nambol in multi-purpose hall khat poimoh, thumna in delhzui ni.