“…Toupa ah…na Pate uh thu mang un” [Ephesate 6:1]
Thupatna: Saptuam in tukum Pate Ni a i thupi dia i tel “Pa hihna a Pathian pomtak biak piakna” ahi. I Pate, Pathian adia pomtak biak piakna hinkhua a a hin ding uh i deihchiat hi. Pathian thupiak bang in, Tate’n i Pate zahtak leh thuman pen in nei chiat lehang, Pathian pomtak biak piakna hinkhua a hing thei di’n Pathian in i Pate vualzawl ding hi.
Pate Ni zatdan manpha sem i neih ding deihna in Pate Ni hong kipatkhiakdan i taklang masa ding. Mrs John Bruce Dodd, Spoken khua, Washington a om in amau unau 6 a nu’n a sihsan nung-a a Pa’n zi dang neihsan lou a, amaute hawmthoh tak a kem piching a, Pathian thu leh hotdamna a pitu ahihna theih gigena dia kum 1909 a hon patkhiak, Pate pahtawina Ni a zat ahi.
Mrs John Bruce Dodd in a theihchet mahmah tuh “Nu leh pate i leitung pathian ahi uh” chih thu dik leh manpha ahi. Britain, Europe, America, South Korea, etc. gamte hichikhop a a khanna uh leh vualzawlna a donna kingakna bulpi uh Nu leh pa zahtakna ah ahi. Nu leh pa i leitung pathian ahihman un nu leh pa zahtak mi in Pathian a zahtak hi.
Pathian in Pate zahtak a, pahtawi ding in thupiak khauhtak honpia hi (Pau. 23:22). Toupa ah na nulepate uh thu mang un (Eph.6:1) chi hi. Hiai a “Toupa ah” kichi “Toupa na zahtak a, a thupiakte zui a na pahtawi bang in” chihna in a lak theih ding hi. Toupa a Nulepate zahtak dingdan tomkha in i kikum ding.
Eksodas 20:12 ah …na Nu leh Pa zahtak… chih thupiak om hi. Hiai a zahtak/pahtawi (honor) kichi genchetna in LST siamte’n thumal 4 (li) zang uhi:
1. Prize highly (Pau. 4:8): Hiai in Pate ngaih thupi a ngaihsan pen ding ahi chih hon sinsak hi.
# Kipahman (Prize), a man tawm/tam thu hilou in, I ngaisang hi. Tua sang a Pate ngaihsang zawk ding ahi!
# Silh-le-ten/Sum-le-pai/Minthanna, etc. sang a ngaih thupi zawk ding Pate ahi!
# Messi: Argentina mi, Barcelona Football Club a kimawl in, World Player of the Year 4vei sang a, Japan Company Ginza Tanaka in ngaisang lua in a Veilam khepek lim Gold a bawl in US $ 5.35 million in zuak hi (= Rs.3,745,000,000/-). Hiai sang a ngaihsang zawk ding Pate ahi!
2. Show respect (Levitikas 19:30; 20:9): ‘Khawlni zahtak’ bang a tate’n Pate zahtak ding ahi.
# Pathian zahtak a, a thupiak leh deihdante zuih louh theihlouh a i ngaih bang a, Pate zahtak a, thil bangkim a i thuman ding genna ahi.
# Lisa Rogers, numei Celebrity khat in, “Ka Pa toh tehpih theih ding khop a thupi Leitung ah bangmah ka mu kei” na chi hial hi.
3. Care for (Sam 91:15): Tate’n Pate (Nu leh pa) kem a, limsak a, duattak a etkol, amau i pahtawina/zahtakna lahkhiakna hoihpen ahi.
# Tate khotuahna a – Nisa/vuahzu/gilkial/dangtak/ihmutmoh/duh leh deih taan-ngap uhi!
# Mi thupi khat thugen, “Na nulepa duatsiam tak in kem in, a tutna vuak (empty) uh na muh chiang in a manphatdan uh na khonung phawk semsem ding.”
4. Obey (Diut. 21:18-21): Tate’n Pate (Nulepa) thu mang a, zui din Pathian in hon lamen hi.
# Pate sang a Tate laisiamzaw, pilzaw, gam zaa tuanzaw, thil theizaw… a kikoih khak theih ahi. Pate’ siam/siamlouh/pil/hai thu hilou in, Pa ahihman a zahtak ding Tate mohpuak ahi.
# Macaulay Culkin: Home Alone I star: A pa thu manglou, a pa’n ngeibet, court a hek; sum tampi liausak a om. Tua drug addict hita!
# Jesu’n sihna tanpha thuak dia a Pa thu a man bang a, Tate’n Pate thu mang dia lamet i hi.
Pate zahtak louh a mulkimhuaidan: (1) …a Pa nuihsan leh a Nu musit guam Vaakte’n a tawm ding (Pau. 30:17). (2) …a Nu hiam, a Pa hiam hamsiat, zan khomial penpen a khawnvak hekmit ahi ding (Pau. 20:20). (3) …tapa phengphi leh helhat …suang in a denglum ding uh (Diut.21:18-21). (4) …a Nu hiam a Pa hiam vua leh hamsiat sih sak ngeingei ding ahi…” (Exod. 21:15,17)
Thukhitna: George Herbert in, “Schoolpu za khat sang in Pa khat a manpha zaw” a chih bang in, i Pate i leitung Pathian, Pathian sik-le-tang ahi ua, Pate sang a zahtak a thuman zawk ding leitung ah kuamah omlou hi. Joseph (Gen. 37:1-4; 50:13) in a Pa zahtak a a thupiak zui in, Egypt a a Pa guhte Kanaan a pua in, Mamre ma a Makpel lou a kokhuk ah a vui hi. Tu kum Pate Ni i zatna ah, Pate chitlahnate gen lou in, Pate a zahtakhuai dan sui in, i hihtheih zahzah a amaute pahtawina ni in zang lehang, Pathian pomtak biak piakna hinkhua in hong hing ding ua, i Inkuan, khotang leh saptuam adia vualzawlna thupi tak hong hi ngei ding uhi.