Huchi in thilhoih hih chimtak kei ni; i lungkiak kei leh ahun tak ah i at ngei ding uhi (Gal 6:9).
Kum tamtak paita a England gam a thiltung tangthu gelhtu khat in hichi’n a na gelh hi. Parliament Member khat a khualzinna ah a sakol kangtalai buannawi lak a tang in kaikhe zoulou a abuai mahmah laitak in bawngching pasal naupang khat a gante toh inlam zuan a pai in a hong tuak kha hi. Tua pasal naupang buannawi lak a vapai in theihtawp suah in vapanpih a a tawp in buannawi apan sakol kangtalai a kaihkhiak pih hi. Tua politician pa kipaklua ahihman in kipahman piak a sawm a himahleh pasal naupang in a sang nuam kei hi. A tawp in “Na thaman leh na hun sukbeizah pezoulou dia hon gingta na hi hia?” chi in a dong hi. Tangvalnou in “Pu, ka kipak, hiai zaw panpihna chihtaak leng ahi kei, nang bang mithupi kon panpihkhak kei hampha kisa zaw ka hi” chi in a dawng hi. Politician pa’n “Ahihleh na let chiah bang hih na ut hiam?” chi in a dong hi. Aman “Doctor hih tuh ka ut ahia ka insung haksat ziak in ka tangtun zoh ka kilamen kei a hiven” chi in a dawng hi. “Huchi ahihleh doctor na hong hihtheihna ding in ken kon panpih ding” politician pa’n a chi hi. Hun hong paizel ah MP pa’n a thuchiam a hih tangtung hi.
Kum 50 phial nung in England gamte mithupi khat pneumonia a damlou in sithei dinmun ah a om hi. Hitler in England gam vadou a hihsiat a tup lai ahihman in England in Winston Churchill makaihna a poimoh luat laitak in gamsung bitna ding toh kisai conference a a hohna ah tua natna hon vei kha hi. Churchill kemtu doctor in penicillin kichi a a kap ziak in lamdang tak in a hong damkhia hi. Tua penicillin kichi tuh medical doctor siam Alexander Fleming in a muhkhiak thak liklek ahi. Alexander Fleming pen kum 50 paita tua buannawi lak a sakol kangtalai kaihkhiak pih pasal naupang ahi. Tua a siamna thukkikna dia doctor a zil sungteng a na chawmtu MP pen Sir Randolph Churchill ahi a tua laitak a Prime Minister Winston Churchill pianna pa ahi. Randolph Churchill in tua Scottish loukhoumi tapa mel ah kuamah muhlouh thil thupi khat a na mu hi. A thuchiam a a ginomna in amah tapa ngei a hondam hi. Thamlou in Winston Churchill a kepdam ziak in England gam pumpi leng hondam kha a suak hi.
Vualzawlna kichi Pathian a kipan himahleh a hong luankhiakna taktak pen mihing leh mihing kikal ahi sek hi. Bible in “Na puakgikte uh kidawn chiat un, huchi in Khrist dan thu na zui uh ahi ding” a chi hi (Gal 6:2). Pathian phawk mipil leh nam halhzawte pankhawm dan asiam ua Corporation, Society, Association, Company, leh pankhawm theihna lampi chiteng zang in khovel tung ah a leng uhi. Tulaitak bang in eite leng laisiam omlou i hikei a, Sumdawng leh mihausa omlou leng i hi nawn kei, i taksap uh pankhawmna, kihuh tuah utna lungtang ahi. Ei leh ei ki-el tuah (compete) ding hilou in pangkhawm a Business dangte, gamdang College khawng i-el ding uh hizaw hi. I Khristianna in hiaite leng huamkha ahi.
Bangteng hileh i gennop pen hiai ahi: Angmasialna leh midangte hehpihna neihlouhna khelhna mulkimhuai khat ahi. Hiai khelhna in i Khristian testimony uh a hihsia a, i society chinatna ahi. Saptuam sung ah genthei tagahte panpihtu i pungtou zel a kipahhuai hi. Himahleh, panlakna ding tampi om lai hi. Midangte tangthu kia simlou a en leng tangthu i neih hunta hi. Thil phalna, midangte itna chihte Khristianna suangphum ahi gige hi. Tuma in Sinzawl a Hostel ka va veh ua, naupang 27 a om ua, ka TV uh kisia leizou lou, devotion a zat ding keyboard neute khat beek deihhuai lua chih a na gen un lungsim a khoih kha hi. Naupangte maban ding etna in Thanlon leh Suangdoh ah leng Hostel i pan a vanzat kisam tampi om hi. A tawmthei pen fee la i chih lai-in nu-le-pate adia haksa a suak lai hi. DORCED, GBC Student Support chihte tungtawn in student haksate huhna i pan a a poimoh dan et in i sukkhak a neu mahmah lai hi. Khrist itna ziak in kuahiam khat khitui nulsaktu in na pang thei gige hi. Khrist ziak a ki-itna leh kipanpihtuahna in i lak ah vaihawmta hen.