Tulai hun a galvan lauhhuai mahmah a kigen Nuclear Bomb ahi. Hiai bomb lauhuai a kizat hunhun a khovel pumpi a mihingte kia hilou a hinna nei tengteng sibei thei dinmun ahih man in hiai galvan a kizat khak ding ei mimawlte sang in scientist-te a patau zaw uhi. Nuclear galvan neisa gamte’n aneinailoute’ neih ding a doudal gige uhi. Aziak pipente lak-a khat ahihleh gam zawngkhal sorkal hatloute’n nuclear galvan neile uh denchiang in gamnuai mite hiam mihoihlou kuate hiam in thagum in tua sorkal hon paw tale uh nuclear chabi (button) amaute khut-a om dia lauhhuai lawding chih ahi. Nuclear galvan lauhhuai mahleh lunggelthei sorkal piching khat in tua chabi a tawi laiteng a siatgawpna apan kibit ahi hi. Tuamah bang in i omna khovel uh siatgawpna apan venbit theihna chabi tawite insung a Pate i hi chih i gennop ahi.
Akipatna mun: Thil peuhmah akipatna mun a om bang in ‘khotang siatna leh siatna tuam tuamte atamzaw insung a kipan ahi’ chileng valh haksa sapawl a kiom maithei a, himahleh adik ahi. Insung a i kisinsakna pen khovel zazaw a tate a pawtkhiak hun chiang a a suangphum ding uh ahih man in inkuan kikepna mah a poimoh masa hi. Insung a i khankhiakpih moral standard, ginomna leh muanhuaina, kuhkalna leh chihtaknate, hangsanna, upazawte zahtakna chihte kisinsak lou insung apan khangkhia i tate’n i society, school, i pawlpite hon zelsuak ahi zaw hi.
Pa Hoih: Pa khat hihna ding in nakpi a kisakholh luat louh in leng ahun ahong tun chiang in Pa naran khat kisuak thei hi. Himahleh, Pa hoih hihna ding in khalam, lungsim lam, leh salam ah theihtawp a kisakkholh akul hi. Pathian deihdan a amah insung mohpuakna semkhetheite Pa hoih i chihte ahi uh (Eph 6:4; Pau 22:6).
Pa Hoihlou: Tulai insungte en leng thil dahhuai tampi om hi. Insung tampi ah zite dipkosak leh insung subuai Pate ahi uh. Adik geih theikei mahlehang eimi sung ah insung papen Bible sim gige lou inkuan za lak ah 80 sang a tamzaw dia ngaihtuah theih ahi. Insungpa, inkuan biakna makaih theilou, tate maia phatnala sa ngeilou, nupa a thumkhawmlou, Biakin kaikhawm nawnlou, insung discipline enkailou, tua naksang a papen danpalsattu i gam ah apumdimta hi. Insung vaktu pa tampite nasepna mun apan inn tunma a zu dawn malam thei zel apunghat mahmah akichi hi. Tuabang inkuan apan khanglian naupangte’n tunung a i nam i gam leh saptuam hon makaih hunding uh ngaklah huai i sa uhia? Insung zoulou pi in khotang leh nam ka vei i chi ua… i insungte uh en thak dihni bang suak ding i hia (Kah 4:3)?
Theihkhelhna: Tulai khantouhna hat mahmah hun ah i om a, dik hetlou ahihhang a adikpen bang a i pom uh tam hi. Tulai a Pa hoih leh pil i chihte uh sum bawlsiamte, Tate school hoih a kaisakzoute, Inn hoih neizoute, Motor neizoute Pa hoih in i pom tangpi uhi. Tulai in ahoih leh manpha i tehna uh leitung thilte ahita, i tate hiam i deihsak luat khat Pathian nna sem in thanuam mahleh a hauhsak kei leh hihfuh i chi ut kei; insung mi khat Pathian it in, khami in, theihtawp in kizang mahleh a khosakna ahoih kei a, agentheih leh i ngaisang tuan kei uh. Hiai tuh tulaipau in i value system uh adik louhdan taklatna ahi. Zawnna leh gentheihna pahtawi i hikei; himahleh, Inkuan kingakna suangphum diklou hitalou hiam chi i hi. Insung hiin saptuam sung hileh Pathian Kha pina leh Pathian ompihna sang a Coaching Centre khawng, Management expert khawngte muanhuaizaw sakna khovel a om i hita.
Mikhat in hichiin a gen hi: In lian semsem i lam ua, inkuan lah tawm deuhdeuh; laisiam tam deuhdeuh, thil theisiam (common sense nei) tawm deuhdeuh; damdawi hoih semsem, damtheihna kitasam semsem; Khapi tanpha a vakal theita, himahleh invengte leng thei nawnlou; Theihna sang semsem, pilna tawm deuhdeuh; vanzat hoih semsem, nna sem tawm deuhdeuh; hausa deuhdeuh ki-itna-kithuahkhawmna bei hiaihiai; mihing pung deuhdeuh himahleh mihing hinna zahtakna tawm deuhdeuh a chih tulai hun a i buaina uh ahita. Laigelhtu khat in “Society pen inkuan limlang ahia, huai ziak in society hoihtak in en lechin mimalte inkuan na mu thei ding” a chi hi. I khotang uh kisiatdan i gen ua, hiamgamna, sisan suahna, nekgukna ichihte’n i insung uh ahon musak hilou hia? Kua ngohngoh lai ding i hi ua? Insung pen i ta-i naute uh society a a lutma ua sinsakna masa (coaching centre) bang in ngaihsun leng i sawlkhiakte uh khotang ah bang a vachi ua? Pate aw “thouni in lamni” i chabi tawi uh poimoh lua ahi. Khotang leh saptuam adia vualzawlna Pa hiding in Pathian in hon vualzawl chiat hen.