“…Na lak uah hamsiat thil a om a ahi. Na lak ua hamsiat thil na lakmang masiah uh na melmate uh na zou theikei ding uh” (Jos 7:13).
Pathian’ vualzawlna kichi Pathian hoihna leh deihsakna mihingte tung a muhtheih a kilang khia genna ahihman in Pathian toh tuam khen theih hilou hi. Pathian in a tate thil hoih pen deihsak gige hi. Himahleh, mihing lam ah tua Pathian deihsakna dal thei thil a om chiang in vualzawlna bei thei phet hilou in hamsia tanpha tunloh thei hi. Vualzawlna ngahna ding in Pathian’ deihdan leh a kipahna bang a hin a poimoh hi. Diklou tak a gamtang a vualzawlna ngah dia kilam-et pen mahni kikhemna ahi. Tua bang a diklou tak, zuautheitak, leh huham tak a gamtatna in tawlkhat sung ading in nopsakna hiam hauhsakna hon pia bang in kilang mahleh sawt daihlou hi. Pathian in hon vualzawl nuam gige himahleh mihing lam a diklouhna a om chiang in vualzawlna dal (blocked) a om thei ahi chih Israelte tangthu apan i en zek ding hi.
Sa leh Sisan’ Lung-gulhna (Numbers 11): January kha a I houlimna uah vualzawlna muhna ding in omna munlui apan paikhiak apoimoh thu i gen uhi. Pathian in a bantha hanta liauliau in Aigupta apan Israelte a pi khia hi. Himahleh, amau gilpi leh taksa lunggulhnate a buaipih ua “Ut leh dah-a Aigupta gam-a ngasa i nekzelte i thei gige ua, tangmaite, mazelte, phulun sial-nekte…” (t 5) khelah na hang e chiin mipite amau inkong chiat ah dharna tu in a kap uhi. Sal a om laia bawlgentheihna ziak a kap a thum thumte tuin a gawl uh thuaklah in a kap uhi. Abraham midangte adia vualzawlna hidia sapkhiak himahleh tuin hiai ah Abraham suante midang ading hilou in amau sa leh sisan ading lunggulh in a kap uhi. Hiai kahna in vualzawlna tamsem a samkhe kei a, Pathian thangpaihna tamsem a sam khezaw hi. Mahni kibuaipih khelhna in vualzawlna a dal hi.
Makaite simmohna (Numbers 12 & 16): Mosi in Kus numei zi a a neih ziak in Miriam leh Aron makaih in mipite akipunkhawm ua “Mosi kiang kia ah hia Toupan thu a gen? Ei kiang ah leng a gen sam k’a hia?” chiin a makaipa uh demna a hon pan uhi. Mosi hoihlouhnate pulak in mipite hoih kisa in mipi kikhopna (public meeting) a nei uhi. Himahleh Pathian a hong kigolh a kintak in a makai uh Miriam phak natna in a gawt pah mai hi. Huchiin Mosi mai ah ngaihdam ngen in Mosi in a thumsak a ahong dam kik hi. A nungzek mah in Mosi mudah pawlte Korah, Dathan, leh Abiram-te makaih in mipite’n helna chikhat a hon bawl nawn uhi. Hiai hun a a slogan un “Na uang lua uh Bangziak-a Toupa mipi omkhawmte tung a kikoih na hi ua?” (t 3) chih ahi. Makai simmohna, makai deihkhop louhna, makaih utte thil bawl ahi. Pathian in bang a chi vaihawm taphet diam aw chih i et leh Bible in hichiin a gen hi: “Lei in a kam a ka a, a inkuan un Korah mi tengteng, a neih tengteng utoh a valhkhin vekta hi” (t 32) a chi hi.
Israelte hinkhua tulai gingtute hinkhua toh bulh leng sinlai tampi lak ding a om hi. Mihing lam a khelhna a om chiang in Pathian vualzawlna khaktan in a omsek hi. Angmasialna in nupakal siatna a tun a, insung a hihsia a, khat leh khat kikal, lawmta kikal a hihsia hi. Huai ziak in, angmasialna zaw siatna (corruption) bulpi ahi. Tuaban ah Israelte vualzawlna daltu dang khat makaite simmohna ahi. Nu leh Pa a kisimmohna insung ah Pathian vualzawlna a luanglut theikei. Pitu leh heutute a kisimmohna pawlpite a niamkiak sem sem ding. Makaite simmohna kuate’n nei hiam i chihleh mi kisathei leh kithupisakte’n a nei uhi. Kisaktheihna in kuamah nuai ah hon kunsak nuam kei a, kunna ding mite mai ah hon ding del sak a, pahtawi dingte hon gense sak a, zahtak dingte hon simmoh sak hi. Pathian in angmasialte leh simmoh hatte moh a tansakdan i muh ziak in eite leng i pilvang ding uh. Tu kumthak ah midangte ading a vualzawlna i hih theihna ding in hiaite sepkhiak (project) in nei leng chiin kon sawm hi. # Midangte hoihna muhkhiak sawm ding, tua hoihna i muhte pahtawi kisin ding. # Inkuanpihte hiam i kim i kiang a mite phunsan tawpsan ding, amaute nenniam sang-a dopkang sawm ding. # Ankuang a khosung heutu, saptuam heutute gensiat tawpsan ding, amaute insung mite mai a phat ding. # Inkuanpihte mai a midangte a mintak ua sam nawnlou ding, amau toh i omkhawm chiang a i sap didan mah a sam ta ding. # Midangte’n hon hichihle uh chih demand i neihte tawpsan a en amau tung a hih panta ding.
Nang vualzawlna himasa in.