A pu’n a kiang ah, Sikha hoih leh muanhuai, na hih hoih hi, tawmchik tung ah na muanhuai a, tampi tung ah ka hon omsak ding; na pu kipahna ah lut in, a chi a (Matthai 25:23) .
Tulai hun a Khristianna toh kisai a a kisam penpen bang hihiam chih kidong leng i dawnna a kibang vek khol kei ding. Mi tampite’n pianthakna a poimoh pen ahi i chih uh a gintak huai hi. Hiai tuh i thugin leng ahi a, a dik ahi. Huai ziak in, chialpina, crusade, camp, inkuan leh mimal tanpha in chialpina i bawl den uhi. Piangthak hong tam hiaihiai chiang in inkuan hong hoih hiaihiai in, khotang hong hoih hiaihiai leh kilawm. Himahleh a taktak in tuadan ahi kei a a kilehbulh sek hi. Khatvei putek khat chialpi bawlte’n Pathian thu a va hilh uleh aman “Tulai mite’n ka piangthak na chichi na ua inn kongkhak leng chabi kilh lou in nawse ngam nawn khang…, kou hunlai in singkhuah khat in kongkhak ka dou ua a bit zaw” a na chihsan chih a kigen ngei khat om hi. Eite ziak in i kim i kiang a Kol leh Vaite kiang a Pathian thugen haksa gawp hita. Khovel in piangthakte om dingdan a na theichian zaw hi. I Tanchin Hoih gen lah dik a, i pianthaknate uleng a diklou hivek tellou ding ahih chiang in a diklou khat om hi peuhmah ding hi.
I gam ah Pathian thu hong lut a kipan in Bible thu sinsak diktak evangelical thugin a kibulphuh in Pianthakna thu naktak in i tangkou pih uhi. Chialpina ah khelhna thu, kisikna thu, ginna thu, Jesu, Lal leh Hondampa pom ding thu a vel a vel in i gen uhi. I ngaihdan tangpi uh “Piangthak phot peuhmah leng thil teng hong dik mai ding ahi” chih ahi. Himahleh, EBC bialsung kia bang ah en taleng kum 70-80 sung Pianthakna etkhiakna (experiment) a kibawl ta a, a result chiantak a muh theih tuh hiai ahi – “Pianthakna ah thil teng hoih pah guih lou hial ahi.” Laisiangthou hoih tak a i et leh “Tanchin Hoih hilh un” (Mk 16:15) chih a masa leh a poimoh pen in Jesu’n a gen hi. Gospel tungtawn in i gam i nam Toupa’n hon salvak a kikhekna lamdang tak i muta hi. Ahih hang in, Laisiangthou mah hoihtak a i sim leh Pianthakna ban ah nungzuihna a omtou lai hi. Jesu’n, Tanchin Hoih gen un a chih ban ah, “Nungzuite bawl unla… thu kon piak tengteng zui ding in thu hilh un” (Mt 28:19) chih genbeh lai hi. Pianthakna i chih khalam toh kisai a sihna apan hinna a lutna, mial apan vak a omna Pathian mai a “dinmun” (position) thu ahi a, sep-le-bawl toh kisailou hi. Nungzuihna pen khalam kalsuanna, sep-le-bawl toh kisai ahi a huai ziak in “Thu kon piak tengteng zui ding in thuhilh un” (t 19) Jesu’n a chi hi.
Sawltak Paul Ephesa khua a a mat lai un Juda makaite’n mipite diklou tak in a tokthou ua mipite a hong paikhawm tak un a buai ta ua “Mi tamzaw in a kikhop san uh leng a theikei uh, khenkhat thu khat in a kikou ua, khenkhat thudang in a kikou uh uhi” (Nas 19:32) . Tulai saptuamte leng i buaina ziak diktak theilou in ngoh ding i gam zon ua, i ngohte’n ei hon leh ngoh zel ua, i theih thakthak leh a kibang i hi leltak uhi. A damna ding in Jesu nungzui muanhuai i hih uh a kul hi. I Khristianna ah nungzui diktak muh theih ding bangzah i nei ua? Tulai in nungzuihna toh kisai a Pathian mizat khenkhatte’n khamangthang hinawnlou in “Nungzui hiai zah ka bawl” a chi thei ta uhi.
Khrist adia nungzui muanhuai hi ding in niteng hinkhua a Jesu hinkhiakpih khristian i hih a kul hi. Tu dinmun et in tribal khristianna tuh genthoh sahkhua a bangta. Khristian sahkhua tuh genthoh lel ding hilou, zuih ding leh hinpih ding ahi. Pianthakna tuh nang mimal leh Pathian kal kilemna ahi a, nungzuihna pen midangte muh a nang leh Pathian gamtang khia hinkhua ahi. Khrist lungput, kampau leh miziate midangte mitmuh a a tak a hinkhiakpihna ahi. I gam khristianna a buaihuaina tuh thilhoihte midang hih dia kikoih vek, a hihtu ding ki-omlou ahi. Office kaite Jesu toh office ah, contractor te Jesu toh nasepna ah, Bazar kaite Jesu toh Bazar mun ah, in nupite Jesu toh insung ah tonkhawm in a thu mang leng Jesu nungzui i hi ding hi. Tuabang nungzuite’n nitawpni chiang in “Sikha hoih leh muanhuai na hih hoih hi…” chih kammal za ding uhi.