Aw Toupa, thupinate, thilhihtheihnate, pahtawinate, zohnate, lalnate nang a ahi ngala; aw Toupa, gam nanga ahi a, mi teng teng a tungnung pen na hi (1Kro. 29:11).
Khovel a zatkhelh baihlam mahmah hi-a kigen khat thuneihna ahi. Mihing khang tangthu sim leng thuneihna zatkhelhna in a dim hi. France gama political philosopher Jean Bodin in kumzabi 16 lai in “Divine Right Theory” kichi ana posuah a, huai theory tuh ‘Thuneihna Pathian in heutu’ khut a akoih, min autang’ buaipih bat ding hi vetlou hi’ chih gindan ahi. Hiai theory pansan in tawlkhat sung Europe gam ah thuneihna zatkhelhna thupitak om hi. Etsakna di’n, England Kumpi James I (1603-1625) leh French Kumpi Louis XIV te’n hiai ngaihdan naktak in a tawisang uhi. Hiai theory ziak in Saptuam in politics a control hun a om a, politics in Saptuam a control hun ana om hi. Huai ziak in, saptuam leh politics atuam tuak a aom ding ahi chih Evangelical-te thugin ahong piankhiak loh hi. Thuneihna zatkhelhna ziak bulpi tampi a om ding, etsakna tamlou gen leng:
Thuneihna Suikhelhna: Thuneihna zatkhelhna ziak nih a om teitei sek: Khatna ah: Pathian lauh louhna leh, Nihna ah: ki-Pathian mitsak valna Pathian in amah kia thuneihna petuam (Individual prerogative) bang a ngaihtuahna. Pathian kihtaklouh a lauhhuai zahzah in, Pathian in ittuam nei sakna leng lauhhuai hi. Pathian itna pen midangte nuaisiahna ding license hilou hi. Thuneihna Pathian a ahihlam theilou a amau mimal khut a tawite’n mi’ ngaihdan laak, midot chihte haksa a sa uh, niamna a angaih ziak un. Mi’n ngaihdan vakum leleng muhsitna bang in a lazaw sek uhi. Paul in Rome 13:1 a “Vaihawm mi a omte Pathian seh ahi uh” achih pen hoihtak a i sui leh Pathian in mihing ki-ukna ah makai apoimoh dan a theia tua makai Amah ahi chih leh a miseh pen Ama’ nasemtu (t 4) ahi chih gen nuam ahi zaw hi.
Dinmun Suikhelhna: Mi khat kia in vaihawmna sawt a let luat chiang in a dinmun pen mimal hamphatna sakha pahpah uhi. Huai ziak in makai kikhek zel ding mah ana hi ahi. Heutu dinmun pen letna mun, thuneihna mun, amah support te cheet theihna mun a hong suah chiangin huai pawlpi hiam huai gam hiam in siatloh zel hi. Dinmun him him Pathian humbitna, constitution humbitna, mipite’ humbitna toh a pankhawm kei leh sawt daih theilou hi. Heutu dinmun thuneihna tawp wain dinmun hilou in, Pathian thuneihna nuai a Ama’ nasemtu dinmun hilel ahi. Huai ziak in Bible in, heutute aw nouleng na heutupa uh van a om ahi chih thei un, chiin hon thuhilh hi (Eph 6:9).
Mipite’ Theihkhelhna: Mipite’n vaihawmtu lamdiklou a api ton uh atam hi. Hun tamtak ah mipite’n a heutu (Kumpipa) uh akhengval a koihsang in Pathian bang a thilteng hihthei ding asak hun uh om hi. Tuabang hun ah lauhhuai nih om hi. Lauhhuai Khatna: Mipite’n lamet bang a thuneihna khengvala kithupisak tupna. Lauhhuai Nihna: Mipite’n makai hihna diktak a theihlouh chiang un apillou ahi ua, mihai bel utdan dan uk-khum haksalou hi. Romete thupi lai a kumpipa biakna (Emperor Worship) ana om kichi thillamdang hilou ahi.
Tuabang a heutu ngaihsang luatna ah mipite’n dictatorship a vaidawn uh chihna ahi. Etsakna ding in: Thuneitu in anget leng hilou salu-saliang vakhai sekte, hamphatna deihmana asikha uh bang maia kitahlut peihna, diklou ngoih ngoih leng heutupa suai vakaisak tei tei sekte mipite ahi. Amautoh kisai kha hi bilbel lou napi deih neihman a chief guest dia amaute chialsekte mipite mah ahi.
Bangteng gen mah lehang kei ka dik chia khut sil thei ding kuamah i om kei hi. Kilamthak taktak na ding in makaihna dinmun a omte leh mipite’n mohpuak inei chiat uhi. Huai tuh Pathian thuneihna nuai a kituklut ding himai ahi. Mite’n chiamnuih in Lamka khopi tuh president leh secretary-te khopi ahi a hon chi uh. Bangziak a president/secretary huaizah zah omtel ahia! Aziak tuh, kipumkhat theilou, heutu khat nuai a vakun sang a mahni letna ding pawl bawlkhiak siamte khopi i hihman ahi. Kuamah lauh neilou ahihhanga i aw (voice) uh kuaman ngaihkhiak tak asaklouhte i hi. Mihuai siamlou, ei i lunglut deuh deuh leh midang lunglut saklou deuh deuhte i hi uhi. Pangkhawm siamlou a a kibang thou mah pat siamte i hi ua hon gal et te’n ‘Duplicate khopi’ a hon chih uh leng adik zel hi. I Bible tang sim enthak ni, Pathian Lalna i tuhkhe zou tuan kei dia Pathian khut hattak nuai ah kitahlut chiat leng aman hon lamthak baih zaw ding hi.