Kumthak kipah huai ah Toupan honpi tung ta a. Amah min in it mah mah KTZ simtute kumthak chibai kon buk hi. Kumthak leh a sung a thil omte mai tuah ding a i kisak lai in Rabshakeh in Hezekia a chou bang in mimal chiat chou in i om uhi. Hiai mi thupi tegel kichouna tuh ‘Na muanna kingakna bang ahia?’ chih ahi. Tu kumthak ah leng Khrist a na muanna sukling tum in na thiltuahte tungtawn in Khovel in na ‘muan pipen bang hi a’ chiin hon chou ding hi. Pathian muang chih mawk omzia omlou ahi, sum leh pai, nam leh gam mah a thupi pen ahi, chi a khemna hong hat semsem ding hi. Khovel thil a thupipen a koihna Secularism mah gam hausa leh khangtoute buaina ahi. November 8, 2016 apan ‘Demonetization’ ziak in nidang a theih ngeilouh buaina tampi kuapeuh in i phukha uhi. Hiai buaina in i gintaksang in thil saupi leh hun sawttak hon daih ding a bang hi. Sum nen taksap ziak in saptuam sumsaina leng angeina bang a a paitheih louhna tamtak om hi. Langkhat ah helna (terrorism) ziak in India leng galmuang lou gam a suakta hi. Gamnuai mite sum a panpihna (funding) a thupi luat ziak in Solkalte leng pilvang deuhdeuh in mi-nautang leh poi khoihloute a ding in leng haksatna a tun hi. Sa leh gal ziak in mun bitzaw zuan a galtai (refugee) te’n khovel subuai ban mahmah uhi. Thakhat a sukveng vual ding hinawn lou buaina khovel in a hau lawta! Jesu hong pai hak leleng khovel omna tak lai mah ding hia chih nop phial in om hi. A lehlam ah Science leh technology lam a masawnna in thil hoih semsem bawlkhia ahihman in mihing hindan hong nuam semsem ding ahi chih lam-etna liantak a nei pawl om hi. Misiamte’n tunung a thil hong om ding duhthusam a genna uah Transhuman kichi mihing khat hong piang ding a gen kha uhi. Damdawi lam siamna hong khang semsem ding a taksa kahiang hoihloute a hoihzaw a khek khia a mihing pen a tuamtuam kibulh khawm a mi chidam khat bawl khiak ding lunggelna ahi. Tuaban ah smart phone i chih bang deuh smart puan chikhat haptic wearables a chih uh hong kibawl ding a tua tungtawn in mundang a om mi khat toh phone kihou kia hilou in kikawi/kipom, kizut, chibai chihte khophawkna tawn in omtheita ding chi uhi. Tua kia hilou in bawltawm naubawm hong kibawl khe ding a mihing polam ah naupaina khawl apan naungek piansak a om hun hong tung ding hi. Tuaban ah upa lamte tuailai suahkik theihna (reversing age) kibawl khe ding chih leng kigen khat ahi. Tulai inleng mit hoihloute khek, kal (kidney) khek, lungtang kisia ahoih khat a khek, vun thak thuah chihte thuthak hinawn lou hi. Tua bang a siamna hong khang zel ding ahihman in Kilakna 13:15 a Gamsa Lim pausak a om kichi tangtung thei ding mah ahi hon chisak hi. Bible in bang a gen a? Khovel hong hoih deuhdeuh ding hia? Hauhna pung semsem himahleh mi thawmhau tam semsem, laisiam tam semsem himahleh haina uang deuhdeuh, buaina a tam semsem leh ngaihdan gensiam kipilsak tam semsem. Tuabang khovel a om i hi. Nang bang na muang a? Bang ahia na hinsan? Tangthu kigen khat a om a, Khatvei mulukolh khat in tuilian in ganpul a tuah lai a mu hi. Tua mulukolh pen ava leng a ganpul tung a tuang in tui in a tuah kawm kawm in a nesuk suk hi. Tua sa pen lim salua ahihman in akim akiang leng en manlou zen in a sa nek ding mah a buaipih laitak in thakhat in ngakik (waterfall) ah a gansi toh a kesuk ua a si hi. Khovel ah hun awl nei manlou zen a buaipih ding lunglut huai tampi a om hi. Nang leh na inkuante khovel toh na manthat khawm louhna ding in pilvang in. Rabshakeh in Hezekiah a dot bang in tu kumthak ah leng niteng thiltuah te’n bang ahia na muan? Bang ahia na kingakna? chiin hon dong ding uhi. La in “Tangtawn thilte kia lamen in, Pathian khut muanhuai len in” a chih bang in tangtawn thilte en a diktat leh siangthou a hingte mi hampha pen hiding uhi. Nang mimal leh na inkuan Khrist diktatna a kilamtou ding in Toupa’n hon vualzawl hen.
