Siamthak nawnna lou zaw, zeksum chih bangmah ahi keia, zek sumlouh leng bangmah ahisam kei hi (Gal 6:15).
Diktatna a Kilamthak ding dan Bible gendan leh Khovel mite’gendan leh a paipih dan uh kibang hetlou hinapi in thumal kibang, context kibang leh issue kibang sung a a hong kizat chiang in mi tampite a buai (confused) uhi. Bible gendan i chih chiang in Bible bung leh tang khat-le-nih pansan (quote) chih lel hilou in Bible pumpi in a sinsak (Theology) i genna ahi. Communist-te, Hindu-te, Muslim-te leh a dang dang te’n leng diktatna leh siangthouna a gen ua Khristian-te’n leng a gen ua, huchi ahihleh message kibang himailou hia? Pathian thu awikei mahle uh Khristiante mah bang a diktat ding, sianthou ding chihte a tangkoupih ua huaite khawng mah hilou maw Pathian nasepna (ministry) chi a i gen gen? Hiai dotnate chiang tak a dawng dia kimanlou na hihleh pilvang in genkhial kha thei na hi!
Tulaia i theih chiat uh Pu Anna Hazare leh politician tampite’n corruption hihbei ding a tangkoupih uhi. Amaute ma in Mahatma Gandhi in thudik/thutak a kibulphuh apoimohdan phawk in Satyagraha Movement a na pankhin hi. Hiai mite Pathian thu awi hikei mahle uh thumal kibang ets. ‘diktatna,’ ‘corruption,’ ‘social justice,’ ‘human rights,’ thute a gen ua, khotang siatna tuamtuamte bawlhoih sawm a nasemte ahi ua Saptuam in leng tuate mah a tup ahihleh bangziak a kibang i hi chimailou ihia? Kibang taktak i hihleh bangziak a tuabang thu hoih gente i pulpit ua dingsaklou a, eite leng amau political platform a vading mailou i hia? Unaute aw, i theology uh dou (attack) in a om a, i thutawi uh chou (challenged) in a om hi. Social norms khawng, political norms khawng diktatna tehna a zang a i Pathian thu pomzam (compromise) ding a khemna a tam hi. Saptuamte thugen leh Khovel (secular) mite thugen a kibatlouhna bulpite khenkhat i en ding.
1. Thulakna Kibanglou: Pathian Saptuam’ thulakna bulpi Bible ahi a, khovel mite thulakna tuh khovel mah ets. social, political, humanitarian issue khawng a pan kibawl khia ahi.
2. Thugen Kibanglou: Khovel mite’n a gen uh khotang lamtouhna, development leh economic khawng ahi. Saptuam in bel Message khat kia a nei a huai tuh Jesu Khrist ahi (1Kor 1:2, 23; 2:2; Gal 1:16; Eph 3:8; Phil 1:15-18; Kol 1:26-29). Adang teng Jesu (Gospel) a kipan kahiang ngen ahi uh.
3.Dinmun Kibanglou: Khovel mite Adam a mihing kisesa siksan in a ding ua, Pathian Saptuamte bel Khros a siamthak nawnna siksan in a ding uh (Sam 32:1,2; Eph 2:1-10; Tit 2:14; 2Kor 6:14-7:1; Ro 6:18; 1Pet 1:13-15). Siamthak nawnna lou zaw zeksum, reformation, change i chihte bangmahlou mai ahi (Jer 13:23; Is 64:6; Jer 2:22; Ro 7:18).
4.Thu Bulphuh Kibanglou: Saptuamte thu bulphuh mihing kisesa sunglam apan Khrist a siamthakna a kinga ahi (Kol 2:14; Phil 3:9; Gal 3:11; 6:14; 1Jn 3:3), Khovel mite thubulphuh bel mihing kisesa polam a pan bawlthak sawmna ahi.
5.Paipih Dan Kibanglou: Khovel thupil tuh a chil a kipan in hoih leh hoihlou akidou den (dualism) ahi, huaiziak in ahoih pen tundingna ding in ahoihlou (evil) suksiat (destroyed) ding chih ahi. Khovel thupil vanzat (sawltak) minthangte; Adolf Hitler (1889-1945), Joseph Stalin (1878-1953), Pol Pot (1925-1998) Idi Amin (1925-2003), Saddam Hussein (1937-2006) leh midang tampite ahi uh. Hoihlou a chihte uh (political opponents) a that ziah ziah ua a tawp in amaute leng gitlouhna chiamteh (embodiment of wickedness) asuak uhi. Bible in “Pathian diktatna theilou in amau diktatna lamkhiak a tum ua” a chihte ahi (Rom 10:3). Khovel thutawi in bel mi hoihloute hepkhiak ding a tum a, Saptuam thutawi in bel khelhna hua in mikhial a it a, huaiziak in Khros a khelhna ngaihdam in mikhial pen a hondam a a bawlthak hi.
Khovel thutawi ah bel a khialsa mihing in a khialsa mah midangte, mihing thahatna zang in bawlthak a sawm hi. Hon siamthak thei khat kia a om a huai tuh Jesu Khris ahi. Huan siamthak theihna thilhihtheihna nei khat kia aom a huaituh Kha Siangthou ahi (Rom 12:2; 2Kor 5:17; Eph 4:23; Tit 3:5). Khris tellou leh Kha Siangthou tellou a kilam thak theih hileh Jesu Khrist hong pai kullou dia Hitler bang Stalin bang a lalgam uh tutan dinglai ding hi. Khrist’ Diktatna a kilamthak thei di’n Toupa’n hon vualzawl chiat hen.
