...Lemna zong inla, a delh in delh in [Sam 34:14b]
Tu kha thupi ding a i tel “Tanau kal a Kingaihdamna” chih ahi. Kha masa a i thupi “Insung a Kingaihdamna” toh khentuam theihlouh thu kizom ngeingei ding ahi. Insung leh mimal a kingaihdamna bawltute i hih masak keileh tanau toh kal a kingaihdamna bawltu hih ding thil baihlam hilou ding hi. I Tangtel Sam 34:14b ‘…Lemna zong inla, a delh in delh in’ chih michih lungput leh panlak dingdan a Pathian in poimoh a sak ahihdan kikum lehang chi i hi.
Lemna ‘zong in’ chih in ‘Lemna bawltu in pang in’ a chihna dan ahi. Mimal, Insung leh Tanau kal a kilemlouhna a om chiang in, kilemna leh kingaihdamna a om theihna dia midangte’ panlak ding ngak lou a, nang lam apan panlak masak ding ahi chih genna leng ahi pah hi. Nang adik zaw a kingai na hi maithei, kilem a kingaihdamna bawl ahih chiang a nang lam pen a dikzaw bang a kilat na utna ziak a, panla masatu a pan ding haksa sak luat theih ahi. Midangte leh Tanaute toh kal a kingaihdamna bawl ahihna dia ei Khristian piangthakte, panla masa i hih ding ahi. Amau hon ngaidam theilou ahi maithei uh, nang a ngaidamtu a na pan ding na mohpuak ahi. Lewis B Smedes in, “Ngaihdamna tuh suangkultang khahkhiakna ahi a, a suangkultang pen nangmah na hi chih phawkkhiakna ahi,” a na chih bang in, mi na ngaihdam chiang a, amah hilou a, nang na lungsim leh ngaihtuahna a na koltanna apan a suakta a a dam hizaw na hi, chih thu dik leh manpha mahmah ahi.
Lemna ‘zongtu’ a pang a, kingaihdamna a om theihna dia gingtu mimal lungput dingdan, Sawltak Paul in hichiin na gen hi, “…lungsim niamlak in michih in amah sang in midang hoihsazaw hen” (Philp.2:3b). Ei sang a midangte hoihsa zaw chih in a gennop bel, midangte a diklouhna uh a dik a pomsak ding, a hihkhelh uh khiallou a pomsak ding, chihdan hilou in, amau hihna bangteng hitaleh, kingaihdamna om theihna ding ahih photleh, ei dikna leh hihhoihnate sumkuang chiangpeh (claim) lou a, amau hihna bangbang pomsiam dia kimanna gen ahizaw hi. Mihing pianken ah, michih midangte sang a hoihzaw, dikzaw, pilzaw, siamzaw leh hatzaw a kikoih in, tuabang lungput in hon kiliansak in, hon kisatheisak a, kingaihniam haksa i sa chiat hi. Thil khatpeuh leh hinkhua ah, gingtu mimal chih in, ei sang in midangte a hoihzaw a mu in koih lehang, lemna bawltu dia panlak masak thil haksa hilou ding ahi, hon chisak hi.
Lemna zon thil baihlam ahih louh lai in, a zon hun kikhel thei ahihman in, awlkhakha hiam, denchiang, zingchiang hiam chichi lou a, a delh a i delh kul ahi, chih theih poimoh hi. Lemna leh kingaihdamna bawl theih a omlai a, kiphasaktak a a deih hetlou bang a om theih ahi. Hun hong pai zel ah, lemna in a taihsat nung a, lemna leh kingaihdamna lunggulh vungvung a, tu-le-tu a sepkhiak pah theih hileh ut lua, zongzong in delhdelh mahle uh, muhphak leh delhphak a om nawnlouh hun tung a, kisik in lei khuat mahle uh, phatuam nawnlou dinmun a om theih ahi. Huaiziak in, Paul in, lemna leh kingaihdamna zon ding ahih ban ah, a delh a i delh thoh keileh, hon taisan dia, delhphak louh leh muhphak louh dia hon taimangsan hun omthei ahi, chiin Philippi saptuamte na vauhilh hi (Philp. 2:3b).
Thunkhun Lui hun a Isak tate Jakob leh Esau kal ah kitheihsiam louhna liantak a na om hi. A u Esau in a pa Isak apan vualzawlna a tan ding lai, Jakob in a pa khem a a laksak ziak ahi hi. Esau thangpai mahmah in, a pa Isak a sih hunhun a a naupa Jakob thah ding tup in nei hi (Gen.27:41). Lau in Jakob a pu Laban kiang ah tai a, huai a kum tampi va om mang in, zi leh ta tampi va nei in, a khua ah hong kiknawn hi. A u Esau toh kituah ding lau petmah a lau in, Pathian vualzawlna ngen in, Pathian in vualzawl hi (Gen. 32:22-29). Jakob in a u Esau toh kilem a, kingaihdam ahihna ding in a ma ah thilpiak tampi paisak masa in, a u Esau a tuah ding kuan in, a u muh ngei in sagihvei mahmah leisi in a kun hi (Gen. 33:1-3). Jakob a diklouzaw a a kikoihna, a lungsim taktak a a kiniamkhiakna, a u Esau sang a khialzaw leh hoihlouzaw a a kikoihna thilhih leh omdan in, a u Esau lungsim zou mahmah in, nidang a thah ding sawmpa’n hong kimuhtak un “…Esau amah (Jakob) mu ding in a tai a, a pom a, a ngawng a kun in a tawp a, a kapkhawm uhi” chih i mu hi (Gen. 33:4). A u Esau toh kilemna ding leh a ngaihdamna tanna ding ahih photleh Jakob in panla masa a, a hihtheih zahzah in thilpiak hoih penpente pephal a, leisi a tamveipi zahtakna piak leng a ngap hi. A u Esau apan ngaihdamna aw a ngak masa kei a, a kimuh ma uapan theihtawpsuah in a kisakhol hi. Jakob kingaihniamna lungput leh thilhihte’n gah thupi leh khamuanhuai mahmah, amau unau leh inkuan kal ah, suangkhia hi.
Tulai gingtute lak a khat-le-khat kal leh tanau kal a kilemna leh kingaihdamna om theihlouhna ziak bulpi “A dikzaw a kikoih tuak in, aman ngaihdamna ngen in hong thum masa leh chih kilamet tuahna ziak” ahi. Khristiante hinkhua leh lungput dia Jesu thugen, “…na taklam biang bengte, a lehlam leng dohzaw un. …na puanak lak a tupleh, na puanza leng lasak ngal in. Huan, mel khat pai dia hon phut kiang ah mel nih pai sak in” chih ahi hi (Mt.5:39-41). Huai ban ah, “…mi’n na tung ua a hih ding ua na deih bang uh, mi tung ah leng hihsam un” chiin Jesu’n hon sinsak hi (Mt. 7:12). Jesu’n a dikna khatvei mahleng gen lou a, mikhial a mohpaih a om a Kros a sihna tanpha hong thuakna ziak a, Pathian leh mikhial kal a kilemna leh kingaihdamna hon tun ahihdan theichian kichi gingtute i hi chiat hi. A thu a thei i kichih kia hilou in, theichian taktak i hihna i hinkhua leh thilhih a sulang chiat di’n Toupa min in i kichial hi.