Naute aw, thu kia in it kei ni, lei kia in itsam kei ni, thilhih leh chihtaktak in hizaw hen [1 Jn. 3:18]
Tukha June 2021 a i saptuam thupi dia i tel “Insung a Kingaihdamna” chih ahi. Insung i chih, Inkuan sung mite, Tekpi, Tekpu, Pa, Nu, Tate, i genna ahi. Kingaihdamna i chih genthoh lel hilou a, mimal leh Inkuan hinkhua a muhtheih thilhih a kilang ding ahi, chih Pathian deihdan leh lametdan ahi chih kikum lehang chi i hi.
Pathian in a thilsiam tengteng kem a enkol a, atung ua thunei ding leh Chi suang a, leitung luahdim ding in Adam leh Evi nupa in na gawm a, mohpuakna pia in, na vualzawl hi (Gen. 1:18). Mihingte khelhna ziak a tuichim zang a hihmang in, khangthak bawlna ding in Noah Inkuan na zang hi (Gen. 7:1). Leitung a namchih a vualzawl theihna di’n Abraham Inkuan sep hi (Gen. 12:2). Kanaan gam mite’n Jehovah, Pathian dik ahi chih a theihna ding un Jakob Inkuan zang hi (Gen. 35:1-7). Mikhialte hondamtu ding Jesu Khrist hongpianna ding in Joseph leh Mari Inkuan zang hi (Luke 1:26-38; Mtt. 1:18-24).
Pathian in thil bangkim, Inkuan a kibulphuh a, sepkhiak ding a tup-le-ngim dan leh deihdan ahi chih atung a a thilhihdan apan in kichian mahmah hi. Inkuan, khotang leh gamsung a kingaihdamna om theihna di’n Inkuan sung mite a ngaihdamna a kipat ding Pathian deihdan leh geldan ahi chih hiai in nial vuallouh in hon theisak hi.
Inkuan sung mite a kingaihdamna a manphatdan Joseph hinkhua ah muhtheih in om hi (Gen. 45-50). A unaute’n si in mang leh leng poisa lou in Joseph zuak uhi. Pathian in ompih in, sal a a khotna uh Aigupta gam a Kumpipa zom a vaihawmtu a dopsang in om hi. Kanaan gam a kial tung in, a unaute’n Aigupta ah ann va lei uhi. Joseph in, a unaute tung a hehna leh phubalak tupna neuchik zong neilou a, kipuangkhia in, a unaute a kitheihsiam louh khak ding uh leh lauh zaw in, a inkuante damna dia Pathian in a ma ua ana sawl ahi chi a hilhchian in khamuan zomah hi. Huchiin, Jakob suante adia vualzawlna, Aigupta kumpipa deihsakna ngahna leh kial sungteng a ngawl lou in, Gosen gam hoihtak ah tenglut uhi. Aigupta a lut ua mi sawmthum khawng, a pawtkhiak ua piching kia leng nuai guk val pha uhi. Joseph ngaihdamna hinkhua a manpha ngei! Amah leh unaute kal, a unaute khat-le-khat kal, leh a nu-le-pa toh kal tanpha a kingaihdamna leh damna ahi hi.
Inkuan sung mite a kimelmakna leh phuba kilaktuahna a huaisiatdan David tate hinkhua ah muhtheih in om hi (2 Samuel 13-19). David tate Amnon in Tamar (Nu tuam tuak) ngai a, hunlem bawl in a sualluih hi. Tamar sanggam Absalom thangpai in, Amnon that in phuba la hi. Huchiin kumpi David Inkuan sung buai chihtak in hong buai hi. Absalom in a pa David Jerusalem apan delhkhia in, a pa Meite zahlakhuai tak in a luppih hi. David leh a tapa Absalom kidou in, Absalom thah in om a, David Jerusalem ah hong kiknawn hi. Amnon gitlouhna leh Absalom phuba lakna hinkhua in a Inkuan sung uah namenlou buaina leh siatna tun hi. Insung mite lak a kingaihdam louhna lungput leh hinkhua poi petmah ahihdan hon sinsak hi. Hiaibang thilhih leh hinkhua ziak in a galkap heutute leh a khawnbawl upate’n, kumpi David leh a Inkuante, simmoh a thulak louh loh in, demna leh gensiatna tampi neih loh uhi.
Kingaihdamna leh kituahna omna Insung mite hamphatna leh vualzawlna don a thupidan, amah Insung a kingaihdam louhna a mulkimhuaidan thuaktu, kumpi David in Sam 133:1-3 ah na gen hi. Kituak diamdiam a omkhawm nakpi a HOIH in NUAM mahmah ahi, chi hi. Thau manpha, siampu thaunilhna a a luzanga nilh a om, kizom diandian a luangkhia toh kibang a kithutuak leh nuam ahi, chi hi. Hermon tang tung a daitui kiate, zingsang nisuak in hon tatkhak chiang a etlawm mahmah a, teselsel a, mite’n muhnop leh etnop a sak bang ua, kituak diamdiam a om Insung mite midangte adia etnop, pahtakhuai, lungnopna leh etton tak ahi uh, chi hi.
Pathian lametdan leh lungsim bang a kingaihdamna i chih zaw, chiltuikai zen a a thu a gensiam thoh lel tan hiam, kamsiam a chiakzen a gen thoh tan hiam, MoU gelh a kithukimna lel tan hiam hilou in, huai khenlam a, Pathian hon ngaihdam bang a bangmah ngiat neilou lungput (Eph.4:32; Mt.18:35), thilhih leh chihtaktak a kilangkhia, midangte adia muhtheih, kipahpih, etton tak hizaw ahi, Sawltak Johan in chi hi (1 Jn.3:18). Hiaibang kingaihdamna Inkuan sung mite lak a om chiang in, Pathian vualzawlna lamdang tak luanglut in, Inkuan mite adia lungkimna, kipahna, hoihna leh nopsakna tun a, a luanglette khotang leh gam-le-nam adia vualzawlna hisawn zel ahi, chiin David in na gen hi (Sam 133:3). Tuhun a i gam-le-nam, khotang leh Inkuan sung a kimelmakna leh kilemlouhna omte tengteng damna ding omsun, lungsim tawngnungpen a phubalak nopna leh ngiat neihna omlou, kingaihdamna lungput neih ahi. Tuabang ngaihdamna lungput suahkhe thei ding in Toupa’n mimal leh Inkuan chih hong vualzawl chiat hen aw!