GUEST Editorial
Pathian in Khrist a noute hon ngaihdamtak bang in, noute zong lungnemna toh siam kituh tek unla, kingaidam tuah tek un. [Eph. 4:32]
Tukha thupi ding a teltuam ‘Nupa kal a Kingaihdamna’ ahi a, poimoh mahleh nupa tamtak in i zuih zohlouh hi ding hi. Midang gamlapi a omte leh melmate tanpha toh kingaidam thei zenpi i ten khawm pih zi hiam pasal hiam ngaidam thei hetlou om thei hi. Nupa khenkhat kingaidam lou in tenkhawm theihna ding tan lel a kilem hamham leng om thei hi.
Kingaihdamna tellou a kilemna lel chu a sezaw adia kisakkhawlna lel asuak hi. Kidoupi-I zoh in kingaihdamna tellou in Versailles a kilemna suaikaih in Kidoupi-II ding a kisakkhawl kipatna suak hi. Kingaihdamna ziak hilou a atomic bomb hatna ziak a Kidoupi-II na suktawp a om in kiguk douna (cold war) leh Asia sim-suah gamte a buai vengvungna tun in, USSR kichi republic 15 a khennenna tun lel hi. Kingaihdamna tellou a kiteng dia kilem leltak in nupa hihnung a hun paisate ziak a kikhonung phul nilouh in kinakloh leh kikhenloh phing bang leng om thei hi.
Laisiangthou in hon sinsak tuh ngaihdamna tellou a kilemna leh tenkhawmna hilou in Pathian in Jesu Khrist a hon ngaihdam bang a kingaihdamna (as God in Christ forgave you-ESV)’ ahi. Pathian in i khelhnate thei in hua tham mahleh A Tapa Jesu Khrist tung a lungkim law mahmah ahihman in A Tapa ziak in hon ngaidamta hi. Huai bel Jesu Khrist toh (en Xristo) vui khawm, thounawn khawmta ahihman in batna lai a kigelh i khelhna tengteng kros a kilhlum in A lakheta chihna ahi (Kol.2:12-15). Huchi in kuapeuh Khrist ah (en Xristo) a om leh thilsiam thak ahita, thilluite amangta in a thakvekta hi (2Kor. 5:17).
Nupa khenkhat thu khonung taktak a nungak-tangval lai thu khawng uh ki khonung phul in ki khonung nakpih thei om ua, a zawlluite uh min a kitawng thei bang om uhi. Chiamnuih a ki gen mouthak khat in a mouthak ni zing a anthuk a pang in, “Kua teng e ka kingaihlai ua hon deih lou, ann thuklouh di himai” kichi pen ataktak ahihkhak ding lauhuai hi. Jesu Khrist zar a thilsiam thak hita i hihman in hun paisa a lungkimlouhnate pholh kikkik ding hilou hi. Hiai in nupa kal susia in, tate lungput kawisak a, tanau-laina ding hawlmang thei ahihman in athuak tu ding eimah kihizaw hi.
Pathian in Jesu Khrist zar a hon ngaidamta ahih toh kiton a i hih dia hon gen thil thum nupa hinkhua adia poimoh diak a om hi (Eph. 4:32). Huaite –
1. Lungnemna (kindness) – Lungput, mizia, siamna, khanlet dan leh thil tuamtuam kibang hetlou numei-pasal kiteng himawk i hihman in kibatlouhnate nemthei tawp a gen a thoihdam poimoh petmah hi.
2. Lainatna (compassion) – Nupa kilainatna banghiam polam a thil hihziak hilou in, sunglam apat ahih ding hi. Lungtang apan itna, veina leh awlmohna apoimohpen ahih gige ding ahi. I kiten kum asawt semsem leh kilainatna apun semsem ding ahi a, huai ding a leng i thum ding ahi.
3. Ngaihdamna (forgiveness) – Mikhial nih pumpi khat a kigawm khawm i hihlam mangngilh lou in kingaihdamna atam ding ahi. Huan ah hun paisate mangngilh sawm a pholhkik louh ding ahi.
Atung a kigente mihing hatna a hih ding leh kuahiam hihdan enton ding hilou in Pathian in Khrist a hon ngaihdam taak ziak a hih ding ahi. Thil teng thei Pathian in ngaidam a theihlouh telzaw ahi chih i nupa kal gawmkhawmtu ahih ding ahi. Toupan ngaidamtu hi ding in hon vualzawl hen.