…Khrist thilpiak tehna bang jel in hehpihna tuh i kiang ua piak in a om hi. [Eph. 4:7]
Thupatna: Pathian zahngaihna leh ompihna toh tukum 2020 December tan pikai a om in, i Khristian Thukizakna leng suah zom theizel a i om man in, i Pathian tung a kipahthu gen in, a min i phat hi. Saptuam memberte tengteng in tukum Khristmas kipahhuai tak chidam a mu chiat a, navak tak a lawm thei chiat di’n Toupa’n salam leh khalam vualzawlnate in hon vuk hen aw!
Tu kha i thupi Hihtheihna (Gift) Kemtu Muanhuai chih ahi. Laisiangthou a Hihtheihna (Gift) thumal a kizatnate ah ei pau in Kha Thilpiak genna in kizang hi. Huai ziak in, Kha Thilpiak (Spiritual Gift) Kemtu Muanhuai chi a sutkhawm dia kisa i hi.
Hiai Kha Thilpiak kichi Kha Gah toh kibang lou ahihna tomchik in i gen masa ding. Kha Gah ahihleh mi a hong pianthak chiang a Pathian Kha mihing a sungten in a gahsuah khiakte, Pathian deihdan muhtheih a thilhih leh sepkhiakte genna ahi (Galatiate 5:22-23). Huan Kha Thilpiak kichi pen Khrist pumpi “Saptuamte” kilamtouhna ding leh nasepna dia Pathian in gingtute thopna a piakte genna ahi (Eph.4:11; 1 Pet.4:10).
1. Thukhun Thak sung a Kha Thilpiak tuamtuam kigente:
Thugenmi; Nasemmi; Thuhilhmi; Thilpemi; Vaihawmmi; Hehpihnaneimi; Pilnaneimi; Theihnaneimi; Ginnaneimi; Hihdamtheihnaneimi; Thillamdang hihtheihnaneimi; Khate theihkaktheihna neimi; Pau chituamtuam a pau; Paute hilhchettheihna neimi; Sawltak; Zawlnei; Tanchinhoih gen; Pastor; Sinsaktu, etc. (Romte 12:6-8; 1 Kor.12:4-11 leh Eph.4:11).
2. Pathian in michih kiang ah Kha Thilpiakte pha a sak bangbang in pechiat hi (1 Kor.12:11):
2.1. Pathian in saptuam a Gingtu chih ah, ei toh kituak ding in Kha Thilpiak hon pechiat hi (1 Kor.12:7; 7:7). Nang leng Kha Thilpiak khat bek hon pengei ding ahihman in, na Kha Thilpiak tan theihtel poimoh ding hi. Huaiziakin ei Kha Thilpiak donte midangte a sang a thupizaw hiam, thulim lou zaw hiam a ngaihtuah lou ding leh, midangte a sang a etlahhuai zaw hiam, simmohhuai zaw hiam a ngai lou dia i pilvan ding ahi. Jesu’n Talent gentehna thu a genna a, Mi khat gamdang a khualzin dia kisa in, a zin sung a ana sukpung ding ua, a sikhate kiang a talent phazah kibanglou – 5/2/1 - a piak toh kibang ahi (Mt.25:14-30).
2.2. Kha Thilllpiakte lunggulh a, a thupi sem leng lunggulh ding ahi (1 Kor.12:31). Jawlnei Elisha in a pu Elijah Kha tan zah nih lunggulh in ngen a, piak a a om bang in (2 Kump.2:9-13), Pathian in Kha Thilpiakte tamsem leh thupi sem hon piak ding a kipahlam hingei ding ahi chih phawk in, lunggulh pen in nei chiat lehang chih i kideihsak ahi.
3. I Kha Thilpiak tante koihdap mailou a zatkhiak chiat ding ahi:
3.1. Paul in Timothi kiang ah “Nang a thilpiak ompen mutkuang in” chi hi (2 Tim.1:6). Pathian in a hon piak i Kha Thilpiak tante zatkhiak louh a i koihdap leh vutu gawp in apgawp ding hi. Tuaban ah, tuiek gawp dia zat theihlouh hun hong om ding hi. Huai ziak in, na hihtheihna leh hunlem muh zahzah in zangkhe lechin, kuangpha semsem ding leh gahpha semsem ding in Pathian in hon zang ding hi.
3.2. Kha Thilpiak i don bangbangte a gahsuahna dia zatkhiak dingdan thanuam tak a zongkhia a i limsak gige ding ahi. Huchi hileh piching a khangtou semsem in, midangte adia phatuam leh manpha, Pathian vualzawlna vanzat hiding i hi (1 Tim.4:14-15).
4. Midang Kha Thilpiaktante demsak lou a, a zangthei dia midangte hanthawn zawk ding ahi:
Gingtu mimal in a Kha Thilpiak tante i theihchet keileh buaina tun in pianthakna nangawn kimuangmohsak thei hi. Korinth saptuam sung a Khalam Thilpiakte dongte’n theichian uhi. Khenkhatte’n midangte don sang a amau don pen thupizaw leh hoihzaw in kikoih ua, midangte a simmoh sak in, saptuam sung ah buaina nasa tak piang hi. Korinth saptuam a Pau tuam (Greek ah glossa; English ah tongues; Eipau ah Mihingte pau tuamtuamte) dongtute’n a thupi leh sangpen a kikoih in, midangte simmohna in nei ua, Paul in guhdawk zen in taihilh hi (1 Kor.14:1-25).
Sawltak Paul in Korinth saptuamte kiang ah, “I vek un sapum khat a om ding in Kha khat a Baptist in i omta uhi” (1 Kor.12:13) chiin, mihing taksa pumpi a hiang chituamtuam tampi om himahleh, a kizom vek, a pangkhawm vek, tang din a pangkhawm lou a hihtheih neilou ahihdan leh a thupizaw, thupi louzaw chih omlou a, a kisimmoh tuam ding omlou, poimohdan kibang vek ahi, chiin hilhchian hi. Huai ziak in, bah leh lungkiak hun omthei gige ahihman in, michih i Kha Thilpiak don chiat, gahsuah tak a i kizatkhiak theihna dia kihanthawn tuah gige ding i mohpuak ahi.
Thukhitna: Hiai a tung a Kha Thilpiak i gente pianken talent i neihte hilou in (Tuate mah leng Pathian in i Khalam Thilpiak [Gift] suaksak thei), gingtute’n A nna i sepna ding a Pathian hon thopna Kha Thilpiak ahi hi. I Kha Thilpiak tante theichian in, zangkhe thei chiat lehang mimal leh saptuam hing leh gahsuah hilou theilou ding hihang. Saptuam halh, hing leh gahsuah gige hiding a i Kha Thilpiakte Kemtu Muanhuai hiding in Toupa’n hon vualzawl chiat hen.