Tukha thupi ‘Khua leh veng kemtu muahuai’ chih pen a lunglut huai mahmah ban ah lam tuam tuam a gen theih thupi ahi. Genesis laibu ah Pathian in a thilsiam tengteng a zoh in a en a “Ngai in, hoih a sa mahmah” chih i mu hi (Gen 1:31). Zapi huap a gen in tua Pathian in hoih asak mahmah thilsiamte, khua leh vengte tan in, kembit a cheimawi tou zel ding a mohpuakna mihingte hon pia ahi. Khua hausate hiam pawlpi makai tuamtuamte kemtu ahi masa peuhmah uhi. Himahleh, ei khristian mimal malte’n leng i khua i kepna nasep ah mohpuakna nei chiat i hi chih leng i gennop khat ahi.
I kisinsak dan ziak hia bangziak hiam in ei Khristiante i ngaihdan uh azim mahmah hi. Biakin sung a thilhihte Pathian nna hideuh ‘biakin polam leh bazar khawng a i thilhihte zaw khovel thil ahi’ chih ngaihdan hat tak i nei mawk uhi. Hiai tuh Setan philosophy ahi chih nop huai phial ahi. Pathian nei taktakte’n bel a sep khempeuh uh awilou kumpi nasep (secular job) nangawn Pathian nna sep in sem zaw uhi (Dan 3:17). Khosung hausate bang, pawlpi tuamtuam a makaite bang in ‘Toupa nasem ka hi’ chih lungput toh sem himaizen leng i khosung i gam sung kikhek mahmah ding hi. Mi khenkhat ka office nasepna ka ‘pulpit’ ahi chithei a om ua amaute ziak in Toupa min i phat ahi.
Biakin toh khovel a kibang ahi chih kisinsak sawm i hikei a himahleh, nahoih sepna leh kikepna ah Pathian in anih in a ngaipoimoh chih gen nuam i hi. Saptuam a mohpuakna ah diktatna leh siangthouna poimoh, saptuam polam mohpuaknate chu ut dan dan chih ngaihdan hat tak i gam ah om hi. Govt nasepna ah lepchiah tak a hih poilou, saptuam nasepna a i hihhoih peuh leh Pathian lungkim ding dana ngaihtuahna om hi. Hiaite i genna ziak bel i tukha thupi leng saptuam sung nasepna hilou, khua leh veng kemtu hihna ahihziak in i gal-et louh ding uh ahi, chinuam i hi.
Khua leh veng kepna kichi Pathian lunglutna leh a ngaih poimoh ahi. Nidanglai a Israelte khua leh veng kikep dingdan Pathian in a genna ah a lak ua gamdangmi hiam, meithai leh tagah gentheite nopneh lou ding in a hilh hi (Dt 24:10-15). Israel khotang a chimoh deuhte nopneh ahih ua, khasia a a kah uleh a kemtute leh vaihawmtute tung a Toupa heh ding ahihdan a gen hi (Dt 10:18, 19; Is 10:1-4). Khua leh veng kikepna ah thil ahi ding bang a a pai ding Pathian in deih hi. Pathian in mihing manphatna a neih alam, abeh-aphung pansan in en ngeilou hi. Khua-le-tuiten mikhat hihna a atan dingte ua kilawm ahibang tak a piak ding Pathian’ ngaih poimoh ahi. Khristian gam ah khua leh veng kikepna a thanghuai chiang in Biakin sung ah thum in, kipak in, khawmpi thupite bawl mahleng Pathian lungkimsak tuanlou hi, chih Bible in gen hi (Is 1:10ff).
Khua leh veng kikepna ah mihingte khat leh khat kikem tuah, kipanpih tuah ding Pathian in ngai thupi hi. Invengte khat hong tasam taleh gal et louh ding, unau khat in bawng hiam belam hiam mangsak leh midang a mukha a omleh a daihsan louh ding, aneitu kiang a inn a ava koih ding chih ahi. Unau khat sabiltung hiam bawngtal hiam lampi a tuahsia om taleh midang in a muhleh a kihepsan louh ding, a photpih ngeingei ding chih ahi (Dt. 22:1-4). Tulai khovel ah ‘angma sialna’ hong uang sem sem a, insak-inkhang kikawmtuah lou, mahni compound bittak sung a om hithiat ding tupna hat sem ding bang hi. Pathian in a nei zodeuh a a hon bawl leh a neilou zodeuhte kepna ah mohpuakna na nei hi. Pathian in Kain kiang a na nau Abel kaw om ahia a chihlai a, “ka thei kei, ka nau donpa ka hi ahia?” a chih in amah pengkhesak tuanlou hi (Gen 4:9). Unaute kemtu mohpuakna nei i hi uhi.
Thukhitna ding in, khua leh veng kikep dan kivel thak ni hang. Kemtu dinmun tuh Biakin leh khotang ah leng belam chingtu dinmun toh kibang Toupa lak a mohpua (accountable) i hi uhi. Khua leh veng kem kichi hinapi mahni gilpi kem, mahni inn leh lou kem, mahni motor, mahni building project delh bang lel i hih khak ding lauhhuai ahi. Neukha khosung a ding fund khoih kha zekte nasan tomchik sung khosakna sang zutzut, kikepna lah se deuh deuh chihte!!! Nidang lai in Toupa’n huchibang kemtu ginaloute “ka dou” a na chi top mai hi (Eze 34:10). Tu kha i thupi limtak a sut thak in tu ‘pandemic’ hunlai ngial in kemtu hihna ah mahni kivualzawl himai lou in Toupa a pan thaman pen delh zaw ding in Toupa’n hon vualzawl hen.