"…kuapeuh in…amah inkuante khol houh a ngaihtuah sak keileh, ginna a zuausan a, ginglou mi sang in a gilou zaw hi” [1Tim.5:8]
Thupatna: Tulai i leitung hinkhua ah khantouhna leh kikhekna kin-gang mahmah a, ei singtangmite hon nawkkhakdan huaise mahmah a bangta hi. Kisakkholh man leng hilou khop in, tuilian bang in hon phanoh gawp a, gam khangtousate adia manpha leh kipahhuai thilte ei adia hon hihbuaitu leh nawksetu suak maimah thil tampi omta hi. Khotang thilte kia hilou in, Inkuan sung mite mahmah hon nawkkha a, alanglang ah buaina leh haksatna in hon tuam a, khat a ven ma in adang in hon behlap semsem a, alomlom a hongtung a bangta hi. Tuate lak a hon nawkkha, i phawk mahmah khat “U-le-nau kal a kikepna nelhsiahna” ahita hi.
Tangthupha (Gospel) hong lut ma tham a i pi-le-pute’ singtang hinkhua a manpha leh thupi mahmah u-le-nau kikepna nasep ahi. U-le-nau kal a a tasam leh genthei zawte a nei zaw leh hithei zawte’n kankuah in, na kihuhtuah uhi. Tuabang a huhtu ding u-le-nau neiloute leng insak-inkhang leh khosung mite’n huh in na kitungding zel uhi. Khua Hausate’n a khua-le-tuite lak a haksa leh panpih ngaite na panpih in, na huh zel ua, taksap ziak a meikuang paisuak om ngeilou uhi. Hiai thilhoih hih nuse simta i hidiam aw i kichih lai in hon khophawksak thak di’n Pathian in COVID-19 hon tuaksak guih a, u-le-nau, insak-inkhang a tasam zawte kepna nna a poimohdan leh michih mohpuak ahihdan phawk in, khotang makaite leh saptuamte’n lungkimhuai leh kipahhuaitak in pan i la siausiau a, tuni tan in i lak ah meikuang paisuak om tadih lou ahihman in kipahhuai i sa mahmah a, Pathian min i phat hi.
U-le-nau kikepna Pathian in ngai poimoh mahmah in, a namtel Israelte kiang ah hiai nna sepkhiak louhtheihlouh (mandatory) thupiak in na pia hi. Tuate apan tamlou taklang lehang i chi hi:
A unau genthei kemtu dia mohpuakna piak ahi: Levitikas 25:35 a Pathian thupiak hiai ahi – “Na unau a hong gentheih a, nang a hong belh leh na kep ding ahi.” Leitung a mi hampha penpente tuh midangte kemtu leh panpihtu a pangte ahi a, mite kep leh panpih a omte mi genthei leh hehpihhuai penpente ahi uhi. Hiai a ‘Unau’ kichi Israel namte leh pianpih sanggam genna hikhawm hi. Eite adi’n Pa khat suan piangkhawmte genna leh i nampih, beh-le-phung leh saptuam pihte genna in leng a lak theih ding hi.
Mi kuahiam tasam, huh leh kep ngai, na kiang a hongtai leh huhna hong ngen omkhata hia? Tuabang om leh bangchi a na vaidawn in na khakhe zel a? Khutvuak a kiksak zel maw? Hihtheih dandan a panpihna na pezel? Tasam leh gentheite kepna nna Government hiam, mihausate hiam, khotang makaite hiam leh saptuamte mohpuakna dan a koihkha a, i khut kisilsiang a baihlam mahmah hi. Amaute mohpuakna omchiat ahi chih bel i haih kei hi.
Sawltak Paul in, meithaite kepna a Pathian poimoh ngaihdan hiaibang ahi chi hi, “…Meithai kuapeuh in tate leh tute a neih uleh, huaite’n ama inn sung ah Pathian limsakna mohpuakna thei masa uhenla, amau nu leh pate uh kem uhen; huai Pathian kipahlamtak ahi” (1Tim.4:4). Hiai a kipan in, meithai leh gentheite kepna, amah Inkuante mohpuakna himasa ahi, chih Pathian koihdan nial vuallouh in kichian a, kuamah kiawngsut vual hilou hi.
Sawltak Paul in Timothi kiang ah, gingloumite nangawn in unau tasam leh gentheite hehpih a, kem a na panpih zel uh ahih ngal leh, ei gingtu kichite’n tua i limsak kei leh, gingloumite sang a gilou zaw leh thulimlou zaw hi ding i hi, chiin na hasuan hi (1 Tim.5:8). Tulai a Pulnatna (COVID-19) i tuah akipan genthei leh tasamte kepna nna michih mohpuak ahihdan khophawkna hong lian thaknawn a, michih in awlmohna liantak toh pan i la chiat hi. Maban a hiai i mohpuakna kitheih mohbawl a nelhsiah lou in, panla tou zel ni chiin i kichial hi.
Hiai mohpuakna a muanhuai louhna tuh ginna zuausanna ahi: Sawltak Paul in Timothi kiang ah, i ginna kingakna Pathian itna ah ahi a, tua itna ziak a a Tapa Jesu Khrist i hondampa dia hon piak ahihdan thei a, ginna a i san ahi, chi hi. Hiai itna a phawkkha lel hilou a, a neite (hong sungluahte) hita kichi i hihman in (1Kor.6:19), ei mimal in leng hiai itna mah i suahkhiakna dia i mohpuakna poimohte lak a khat tuh “U-le-nau genthei, tagah, meithai leh haksa thuakte kepna nasep ahi” chi hi.
Sawltak Johan in, “Min Pathian ka it chi in, a unau haw leh, amah zuauthei ahi; a unau a muhsa bawn a it ken, Pathian a muh ngeilouhpi bangchiin a it thei dia?” chi a ana gen, hiaibang mite ahi ginna nei a kichih uh zuausante chih a gennopdan ahi (1Johan 4:20). Hiai mohpuakna toh kisai Pathian in ngaikhawk mahmah ahihdan kilang chian hi. Pathian itna tangkhate’n, tua itna mah i suahkhiak ding Pathian hon lamet leh deihdan ahi hi.
Thukhitna: Pathian lungput leh lunggelna ah genthei leh tasamte kepna nna, ei Pathian tate mohpuakna hi masa ahi chih thei thak nawn ni. Jakob in, “Pa mitmuh a sabiak siangthou leh gilou panglou zaw, tagah leh meithaite a gimthuak lai ua veh…” ahi a na chih Pathian hon lametdan mah gen ahi hi (Jak 1:27a). Hiaibang a U-le-nau kepna nasep Pathian ngaih a lungkimhuai, gimnamtui, siangthou leh pomtak biak piakna ahihman in, tuabang a U-le-nau kemtu muanhuai gingtu mimal leh saptuamte hithei zel ding in panla chiat ni chiin Toupa min in i kichial hi.