“Aw na dan deih hinatel ing e! Nitum a ka ngaihtuah ahi” (Sam 119:97)
Thupatna: Tu kha thupi ding a i tel “Pathian Thu Kemtu Muanhuai” chih ahi. Mihingte’n muanhuai tak a i kepte manpha leh thupi sa a i deih pente ahi. Mihingte i thil deihpente’n i lungsim luahdim in, sun nitumtum in i ngaihtuah hi. I deihpen ngahna di’n i lungsim, tha-le-zung, sum-le-pai, gim-le-tawl khawksa lou in vuahzu daikai nuai ah leng i pangngap hi. Leitung a i hin sung in, i niteng khosakna dia poimoh tampi om a, tuate deih a, ngaihtuah a i zon ding mah ahi. Ei Khristiante bel leitung thildang teng sang a, i ngaihtuahna leh lungsim luahdimtu ding leh i deihpen dia Pathian hon lamet, “A Dan thute (Laisiangthou)” ahi hi.
Naungek suakthak in a Nu nawitui a lunggulh bang a, a Dan thute (Laisiangthou) lunggulhpen a nei di’n Pathian in hon deih hi (1 Pet. 2:2). Toupa Dan thute (Laisiangthou) deihpen a nei a, a Dan thute kemtu muanhuai na hih leh hih louh kitheihna di’n, “Toupa Dan thute hun teng a ngaihtuah leh lunggulhpen in na nei hia?” chih nangmah kidong thak lechin na chiang mai ding hi.
Tutung in Pathian thu kemtu muanhuaite vualzawlna donte saulou in taklang lehang i chi ahi:
Khalam ann lunggulhpen a nei in, vah tak a ne gige in, pichin dong in khandan dik in khang uhi: Khristiante adi’n Pathian Thu Khalam ann ahi. Naungek piangtung in a Nu nawitui a poimohpen ahihman a, lunggulhpen a a neih bang a, gingtu in tua khalam ann, a poimoh pen, lunggulhpen a nei a, niteng hunteng a a nek chiang in, khalam khandan dik in khang a, piching in gah tampi suah hi (1 Pet.2:2). Sam gelhtu in “Aw, na dan deih hinatel ing e! Nitum a ka ngaihtuah ahi” (Sam 119:97) ana chih leh, “Na thute ka kam ading in khum hinatel e! Ahi ka kam ading in khuaizu sang in a khum zaw hi” (Sam 119:103) ana chih bang mite hi uhi.
Pathian deihdan theichian in, tuabang in hing uhi: Khalam nawitui, bangmah suknit louh (1 Pet. 2:2), Pathian aw leh deihdan diktak, chiantak in theithei ua, tuabang a hing in, Khristian hinkhua diktak in hing thei uhi. Khalam a mit vak in, kalsuan dingdan leh tot ding lampi kichiantak a mu in, kisui lou in kalsuan gige uhi (Sam 119:105). A melmate uh sang a pilzaw in, amau sinsaktute sang a pilzaw in, tekte sang a theihsiamna hoih nei zaw in hing uhi (Sam 119:98-100). Khristian tamtakte’n Pathian Thu siangthou limsak lou in, midangte thugen leh sinsaknate kia a kinga in, khalam a hat leh chidam taktak theilou in, khandan dik in khang theilou uhi (Kilakna 22:18-19).
Khemna tung a vualzou in hing gige uhi: Toupa Dan thute sun-le-zan a ngaihtuah a, lungsim a muanhuaitak a kem in, tua in Pathian limsak loute omdan zui lou ding leh Pathian tung a khial lou ding in veng in kembit hi (Sam 1:1-2; 119:11). Jesu nangawn in Toupa Dan thute zang in Setan khemna apan vualzohna ngah hi (Mt. 4:1-11). Tuailai Joseph in a hinkhua ah Pathian thu muanhuai tak in kem gige a, khelhna in hihbuai zoulou hi (Gen.39:9). Samson in Toupa Dan limsak lou a, a nu-le-pa thu sang a amah lunglutna pidan a om a, Philisitia numei a itna hinkhua ziak in, Toupa’n a paisan a, vualleltak in a sihloh hial hi (Vaihawmmite 16:20).
Pathian Thu diktak a thei in, diktak in pesawn uhi: Pathian thu a kepte uh midangte adia piaksawnna ah diktak leh gahsuah tak in pesawn uhi (2 Tm.2:15). A piaksawn thute uh midangte adia lam chiteng a hanthawnna leh vualzawlna vanzat thupi tak suak hi (2 Tm.3:16). Pathian thu kemtu muanhuai loute ziak in Khristian mimal hinkhua leh saptuam sung ah sinsakna diklou leh chidam lou kituh kha nak a, tuate’n khalam a bahna leh nungtolhna tun zel hi (1 Tm.4:1-5).
Pathian Thu muanhuai tak a a kepte uh gahsuah pih uhi: Kha a dim in, Pathian thu a kepte uh suahkhia in, ahunhun in Kha gah manpha taktakte a hinna uah muhtheih in gahkhe zel hi (Eph.5:18; Sam 1:1-3). Tuipai kiihkeih in, upat nung nangawn in leng gahsuah lailai uhi (Sam 92:14). Pathian Thu kep ding donlou Khristian tuailaite hi’n Nu-le-pa tampite hitaleh, Kha a dim hih lunggulh mahmah in, atawl a tawl in panla mahle uh, gahsuah ding nei thei mahmah lou uhi.
Pathian galvan kim a kivan in, Khristian vualzou hinkhua in hing uhi: Pathian Thu tak, a thilhihtheihna thupi tak toh midangte adia hinna khek ding in zangkhe thei ua, mi tampite Khrist khebul a tuntu hithei uhi (Heb.4:12). Ban ah, a kihumbitna leh galvan ding in zangkhe pahpah thei ua, Setan khemna tuamtuamte’n nawk mahleh, vualzoutak in dingkip thei uhi (Eph.6:10-17).
Thukhitna: Khristian mimal chih, Pathian Thu Kemtu Muanhuai i hithei hi. Tuabang hi ding in, mun khat a tutmuang hithiat mawk hiam, eimah nopsak dandan a khosak leh hinkhua zat hiam a, hiai dinmun ngah theih himawk lou ahi. Pathian thutak mah lunggulhpen a nei a, niteng a sim a, i lungsim leh ngaihtuahna a kem gige a, i hinpih taktak chiang in, Pathian lamet bang in, a Thu Kemtu Muanhuai i hi ding hi. Tuabang Khristian hi chiat ding in i kideihsak a, panla chiat ding in Toupa min in i kichial hi.