“Na Nu leh na Pa zahtak in” (Exod.20:12)
Thupatna: Tukha May 2020 a i saptuam thupi dia i tel “Nu leh Pa Tekte Kemtu Muanhuai” chih ahi. Mihing a piangkhia tengteng Nu leh Pa neilou ki-omlou ahihman in i thupi dia i tel bang in Pathian in michih i Nu leh Pate kemtu muanhuai hihding hon lametdan ahi. Nu leh Pa tekte KEPNA i chih in taksa, lungsim, kha leh poimoh tengteng uapkhawm vek hi.
Kum 1908 in Miss Anna Jarvis, America gam a Philadelphia a om in, Nute pahtawina hi ding in Nute Ni patkhiak di’n saptuam ah ngen a, Nute Ni patkhiak ahi. Kum 1909 in Mrs John Bruce Dodd, Spoken khua, Washington a om in Pate Pahtawina Ni hi ding in Pate Ni patkhiak di’n saptuam ah ngen a, Pate Ni patkhiak hong hinawn hi. Hiai mi nihte theihchet mahmah tuh “Nu leh Pa te i leitung pathian ahi uh” chih thu dik leh manpha ahi. Britain, Europe, America, South Korea, etc. gamte hichikhop a a khanna uh kingakna bulpi tuh Nu leh Pa zahtakna ah ahi. Nu leh Pate i leitung pathian ahihman un amaute muanhuaitak a kepna, amaute i zahtakna lahkhiakna ahi hi.
Pathian in Nu leh Pa tekte zahtak a, pahtawi ding in thupiak khauhtak hon pia hi (Paun.23:22). Toupa ah na Nu leh Pate uh thu mang un (Eph.6:1) chi hi. Hiai a “Toupa ah” kichi “Toupa na zahtak a, a thupiakte zui a na pahtawi bang in” chihna in a lak theih ding hi. Toupa a Nu leh Pa te zahtak ding ahihdan Laisiangthou apan in tomkha in i kikum ding. Eksodas 20:12 ah …Na Nu leh Pa zahtak in… chih thupiak om hi. Hiai a zahtak/pahtawi (honor) kichi genchetna in Laisiangthou ah thumal 4 (li) kizang hi:
1. Ngaihsan pen a nei (Prize highly - Paun.4:8): Hiai in Nu leh Pat e ngaih thupi a, ngaihsan pen ding ahi chih hon sinsak hi. Kipahman – a man tawm/tam thu hilou a - i ngaihsang bang in! Greek mite’n Marathon (Lam sau kitaitehna) a ngaisang mahmah ua, khatna lak ding thiltup thupipen in nei uhi. Hiai kitaitehna a khatna kipahman dia a piak uh Olive singnah khuikhawm lukhu dia khuksak hi leltak hi. A deih uh Olive nah man tawmchik lu a khuk hilou in, kipahman khatna lak a minthanna ahi zaw hi.
Mihingte’n i ngaihsang mahmahte – Laisiamte, Mihausate, Kimawlsiamte, Melhoihte, etc. ahi uh. Hiaite toh teh vuallouh a i ngaihsang zawk ding Nu leh Pa te ahi chih Pathian hon lametdan ahi. Tulai hun in, ta tamtakte’n Nu leh Pa tekte chimtak, thusim lou, ngaisang lou, simmoh leh nelhsiahtak in bawl uhi. Hiai Pathian zakdah mahmah ahi. Na Nu leh Pa te ngaihsangpen a nei di’n Pathian in hon deih hi!
2. Zahtaaktak a kem (Show respect: Levitikas 19:30; 20:9): Khawlni zahtak bang a tate’n a Nu leh Pa te a zahtak ding uh Pathian deihdan leh lametdan ahi. Israel in Pathian a zahtak ziak in, Pathian thupiak leh deihdante zuih louh theihlouh a ngai in, khawlni (Sabbath) tang hi. Sepaihte’n a heutu (Commander) a zahtak ua, a thupiak tengteng “Hi hen Heutupa” a chih vek bang ua, i Nu leh Pa tekte thugente i zahtakna i thumanna leh zuihna a i latkhiaksak ding Pathian hon lamet ahi. Lisa Rogers, Celebrity minthang khat in, Leitung ah ka Pa toh tehpih theih ding khop a thupi bangmah ka mu kei, a na chih in, midang tengteng sang a a Pa zahtak zaw ahihna gen hi.
3. Duattak a kem (Care for: Sam 91:15): Tate’n Nu leh Pate kem a, limsak a, duattak a a etkol uh, a pahtawina/zahtakna uh lahkhiakna hoihpen ahi. Nu leh Pa te’n tate hon khotuahna ua – Nisa/vuahzu /gilkial/dangtak/ihmutmoh/duh-le-deihte taan ngap uh ahihdan i theichiat hi. Tate’n zong i Nu leh Pa tekte a duh leh deihte uh piak ding tup a nei a, ataksa hat nawnlou uh deihthoh leh itnatak toh kem a, amau a kitoudelh zou nawnloute a zun leh ek uh i siak sak a, sih tanpha a lungkim leh khamuangtak a om dia kep ding i mohpuak a Pathian in hon koih ahi chih phawk ding ahi.
4. A thu uh mang a kem (Obey - Diut.21:18-21): Tate’n Nu leh Pa te thu mang a, zui kawm a kep ding ahi. Tate – laisiam zaw; pil kisazaw, gam zazaw tuan, thil theizaw a kikoih a, Nu leh Pa tekte simmoh/muhsit khak ding lauhuai mahmah, Pathian thangpaihna sukha ahi, chih phawk ding ahi! Joseph in a neulai apan a Pa Jakob thu mang in, a Pa sih nung nangawn in thu mang hi. Aigupta a a Pa si himahleh, a Pa thupiak bang in Kanaan gam ah a guhte vui ding in paw tung teitei hi (Gen.49:29-50:13).
1997 in Delhi a i tuailai college kailel khat music lunglut lua in, a lawmte toh Music Band bawl uhi. A Pa’n laisim poimoh ngaih in, khou hi. Music lunglut lua ahihman in, a Pa thu man telzaw in, kap hithit hial in Music tawpsan a, a music van khenkhat saptuam ah pe zomah hi. Hiai tuailai tuin lohching mahmah a, Officer khat in semta a, tuin a Nu leh Pa tekte duattak a kemtu hita hi!
5. Nu leh Pa Tekte zahtak louh a mulkimhuaidan: (1) A Pa nuihsan leh a Nu musit guam Vaakte’n a tawm ding (Paun. 30:17), sih sia a si a, a luang top louh leh vui louh a om ding genna ahi. (2) A Nu hiam, a Pa hiam hamsiat, zan khomial penpen ah a khawnvak hekmit ahi ding (Paun. 20:20), lohsapna leh mangbatna tawpkhawk hinkhua genna ahi. (3) Tapa phengphi leh helhat … suang in a denglum ding uh (Diut.21:18-21), Inkuante adia manna bei, a sih hoihzaw, hinkhua genna ahi. (4) A Nu hiam a Pa hiam vua leh hamsiat sih sak ngeingei ding ahi” (Exod.21:15,17), Khangdawng a sihna leh hamsia thuakna genna ahi.
Thukhitna: George Herbert in, “School pu zakhat sang in Pa/Nu khat a manpha zaw” a na chih bang in, i Nu leh Pa Tekte sang a zahtak a thuman zawk ding leitung ah omlou hi. … i leitung pathian, Pathian sikletang a honkemtute ahi uhi. Milim bia – Hindu, Muslim, Buddhist, Sikh, etc … Pathian in a vualzawlna ziak omsun Nu leh Pa Tekte zahtakna ahi! Salam leh Khalam a, Pathian apan vualzawlna kiching dong, Nu leh Pa Tekte zahtak leh thuman Tate, hi ding in Toupa’n hon ompih chiat hen!