Amasa in Dorkate hon makaih a genthei, tagah leh meithaite khotuah a huai gige Van Pathian leh i Hondampa Jesu Khrist min in Dorcas Day leh Nute Ni chibai kon buk hi. Amah venna leh ompihna toh Dorkate’n i hihtheih dandan ua pan i na lakna uah lohching tou zel i hihman in hiaitan honpitu Pa Pathian tung ah kipahthu gen in Amin i phat hi. Hallelujah!
1. Kipat tung a pan tutan Pathian piina i tan dan i en ding: Heutu masate’n Pathian lemsakna toh muhkholhna kichiantak leh lametna lianpi nei kawm in numeite ki etkolna poimoh sakna toh Dorka pawl hon pankhia uhi. Huai hunlai in sum muhna a haksa mahmah a, a haksat toh kiton in sum value leng a lian petmah hi. Pawl i kiphuh chiang in sum omlou a nasep hitheilou a hihman in amau sung a, a neih dandan uh thoh khawm in Rs 5/- toh Dorka pawl hon phutkhia uhi. Tuhun ading in tawm i sa maithei, himahleh huai hunlai ading in manpha mahmah ding in i lamen hi. Heututen veina liantak toh hiai pawl a na pat uh Toupa’n poimoh hon sakpih a hun masate i etkik chiang in hiaitan a Toupa makaihna leh ompihna i tante thupi in lamdang petmah hi. Amaute’n honmuhpih uh hileh lamdang leh thupi sa mahmah ding un i ging ta a, heutu masate zahna i pia hi.
a) Budget toh kisai i en ding: Local, field, division leh headquarter tan a i budget te i et chiang in Toupa hon makaihna lamdang lua maw… zu leh va bang a vakvai maiding lai Toupa’n hon domsang a, budget sangtaktak leh tampipi bang i bawltheita uhi. Tuate khempeuh i Toupa vang a hi.
b) Pawldang toh kizopna: EBC Dorka pawlte tawmchik himahlehang Toupa ngaih a manpha mahmah te i hi. Toupa i Pathian in,”Ka ngaih in manpha mahmah na hi ua…” (Isai 43:4) chia a gen toh kiton in ABWU khawmpina a kihelthei leh IBWU a member hihna tan bang neithei in hon koih hi. Khawmpi tungtawn in gam tuamtuam damsung a mudia ki lamet louhna gam tantan Toupa’n hon siksak ta hi. Toupa hoih hina e! Aman theihphaklouhte honthei a midang leh gam changkang zaw te lak a kihelthei ding in hamphatna honpia a, Toupa min i phat hi.
2. Maban panlakna ding omlaite: Toupa gam nasepna ah kuapeuh singtang leh phaizang a ten niteng a i anhuan chiang a antangpham, taklampham, veilampham leh Jesu zintunna dia antang i phamkhiakte lak apan 15% a naupang chawmna DORCED i chih in tuni chiang in naupang 100 val tham bang i chawmthei ta hi. Hiai naupangte Pathian makaihna toh eite panlakna ziak in school kai in laisimthei ua, laisiamthei leh maban lamethuai taktak om ua kipahpih huai in tha hon guan mahmah hi. Chawmtuak tampi omlai a hihdan leh maban i kalsuanna ding saupi omlai ahi chih thei ni. Toupa’n hiai nna hon patsak lunglut huai a, gah manphatak hon muhsak ngeile Amah muanna toh i kilamen hi. Matthai 25:40b ah Toupa’n, “Hiai ka unau neupente lak a mi khat tung a na hih uh ka tung a hih na hi uh”, chi hi. Huai ziak in i puan inn uh keklian thak in panla thak laile ahoih diam i chi hi.
I project khat nawn a hihleh DOTPROJ i chi a, puankhui zilna kumpaita 2017 in i na pan ua kipahhuai in lunglut huai mahmah hi. I thumnate uh Pathian in hon dawng a, i pankhawmna ziak un nna thupi taktak leh manpha pipi hon semkhesak zel hi. Toupa ei din hoih na e … taang a miten a muhphak louh uh tuniin eiten i muta a, ei liangkou ah hong kingata, nang leh kei sep ding in Toupa’n mohpuakna muang mahmah in hon pia hi.
Awle, i pawl khandan leh Toupa honpi dan kipahhuai mahmah te i muh chiang in kithalawphuai a lungsim a hongsuak bangzah hiam i gelh khiakte tungtawn in Pathian kiang ah kipahthu gen in thumna in delhzui zel lai ni aw. Hiai bang nasepte Pathian i biakna kilatna hong hi a hihman in, ginomna toh semthei zel ding, pethei zel ding in ki hanchiam thak ni. Toupa’n hon ompih in THUPINA tengteng tangta hen!
***
DORCED HUHNA HONGLUT ZEL
1. EBC Bukpi BDF in dorced huhna ding a sum in Rs 1210/- a honkhak ban uah munphiah toh meh tuamtuam maipuang, maisan, bal, sing leh malta ip guk tak honkhak ua, tuate sum suah in Rs 4560/- man pha hi. A vek a kigawm in Rs 5770/ dorced huhna din pia uhi. Toupa’n vualzawl zel hen.
2. EBC Gilgal BDF, Mimbung in Rs 3000/- dorced huhna din hon pia uhi. Toupa’n vualzawl zel hen.