March issue ah Sinsaktu Thupipen chih pansan in thu saulou i taklang a, tukha in bel tua Sinsaktu Thupipen’ nasep leh sinsakna poimoh mahmah khat taklang le i chi hi:

I Toupa Jesu’n nasep a pat toh kiton in, a nungzui ding zongpah hi. Bang ziak a khovel a nasep poimoh pen semtu ding luidung a ngabengte lak ah vazong masa se ahia chih bel hundang adi’n i koih ding a, tuni in bel bang ziak a nungzui ding zong ahia chih leh tua tungtawn a eite’ sin ding bang om ahia chih i gennuam hi. Judate lak ah sinsaktu/heutu leh sintu/nungzui chih na omtou den hi; sinsaktu leh sintu’ dinmun kichiantak leh khekmawk theihlouh na nei uhi. Huchi ahihlai in, Toupa Jesu in paidan chituamtak hon pankhia a, kikhekna poimoh leh gingtute zuih ngeingei ding khat hon phutkhia hi. Pa Pathian’ tangtawn thilgeel, tatkhiakna’ na, hong semkhia ahih kawmkawm in, tatkhiat a om gingtute’ nuntak didan lampi thak hon sialsak hi. Tua lampi sialna a ahih masakpen bel nungzui ding zonkhiat ahi. Gingtu hihna ah khat leh khat kizopna aloutheilou ahihdan muhtheih in ompah hi. Pathian’ Tapa in zong a kizoppih ding mi zong masa hiven. Apil leh asiam, ahau leh athuneite lak ah a zongkei a; sinsak theih ding leh a thuzui ding mite a zong zaw hi. Bukim zaw leh suanhuai zaw tampi omte lak ah siamsinna taktak natawm neilou ngabengte a teel masa hi. Toupa Jesu’n anasep sunzomtu ding a zong a, a chil a, a thuam hi. Tuate ban ah, huchibang kizopna mah gingtute nuntak dingdan leh Tanchin hoih a kalsuan dingdan hon sinsakna ahi hi. Tuni in simtute, hiai sinsakna tungtawn in, athak in kivel le i chi hi. Toupa Jesu’n nuntak zia ding hon sinsak i zui na hia? Gingtu dangte toh kizopna i nei hia? Tua kizopna tungtawn in gingtu hinkhua hihhat leh sutzop touh in a omzel hia? Tuabang nuntakna in Tanchin hoih kal a suansak zel hia?

Gingtute tangkhat a nungta thei i hi kei uhi. Kizomtuah diudeu a nuntak ding ahizaw hi. Khat adia sinsaktu i hih kawmkawm in, adang apan i sin ding zong a om hi. Sikha leh Pu kikala kizopna dan hizawlou in, Toupa Jesu hon sinsak bang a kizopna dan ahihzawk ding ahi zawmah hi. I Toupa’n a nungzuite’ hatlouhna leh chitlouhnate athei mahmah a, Ama’ omlai mahmah in zong a khial zelzel uhi. Himahleh, itna toh a sinsak a, dohzohna toh a makaih gige hi. A vaihawm khum kei a, a mohpaih in a nung ngatsan kei hi. Tua kia hilou in, makaitu ahihna niamsak hetlou in kingainiam tak leh thunuailut tak in a pi hi. A sinsakna nial a, Amah zuaktu ding a theih ngoihngoih zong itna leh zahngaihna kibang a ngahsak veve hi. Tuabang a a chil leh a makaih nungzuite’n a Tanchin hoih leitung pumpi zelsuak in a puangkhia uhi. Huchibang in saptuam na paitou zel a, Barnaba in Paul na kizoppih a; Paul in Timothy leh gingtu makai masate na kizoppih hi. Kisinsakna khaugui tan ngeilou leh bei ngeilou a kizopna saptuam masate lak ah na om den hi. Tuabang kizopna bawl a hingsak ding in simtute ka hon chial hi. Toupa kiang a thum kawm a, i khalam dinmun chiantak a thei leh pom in, i makaih ding leh ei hon makaihtu ding gingtute i zon a i kizoppih ding poimoh hi.

Tu kha Sinsaktute’ Laisiangthou suut ding:
Matthai bung 10-11.
Tu kha a BCD Sinsaktute’n “Khristian Sinsakmi” laibu apan sinchiat ding:
MISSION FIELD LOHCHINGPEN (Khenpi 3na, Pek 15na)