Tulai khovel khang hat leh changkang tak a i dinlai in, Pathian in heutute tungtawn in Youth Coordinator mohpuakna poimohtak a hon guan a, hamphat huai mahmah ahih lailai in challenging mahmah mohpuakna leng ahi. Hiai mohpuakna thak piak a ka om na toh kisai in kingaihtuahna tampi ka lungsim ah hong kilang hi. Pathian in Mosi hinkhua tungtawn in a hon hanthawn a, kipahhuai sa in Pathian min ka phat hi. Tuin tua Pathian ompihna lamen kawm in hiai na ka hon len a, EBC khangthu ading in Full time Youth Coordinator a 11na ka hong hikha hi. Saptuamte leh a bik in ka tuailai pihten na hon kithuahpihna uh hon ngen kawm in A na sem ding a hon sampa Jesu Khrist min in CHIBAI ka hon buk hi.

Tukum in BYF in leng kum dang a bang in thupi khennenna hawmkhiak ding a hoihlua himahleh tua bang hong lemtang theilou phot ding a bat ziak in Saptuam pumpi thupi “PATHIAN POMTAK BIAKNA” Romte 12:1 tukum thupi in nei leng chi i hi. Pathian Pomtak Biakna kichi bang hi a koimun a kipan a kuan a na patkhiak hiam chih te ei mi malmal in sui chiat in theih chet sawm ding in panla thak ding in i kingen hi. Biakin a lapawl sak leh kikhopna teng a Biakna leh Phatna chia la makaihna chauh a Pathian Pomtak Biakna pia dan a kingai i hih khak leh huai khenlam a Pathian lungtuak a pomtak biakna om pen muhsuah sawm ding in kisa leng i chi hi. Pathian pomtak biakna kichi Biakin sung kia ah hilou in koi mun peuh ah, laizilna leh sepna mun chiat a Pathian biakna neih theih ahihdan theisuah thak in eimah mimal hinkhua ah, koi mun peuh a om le hangle Pathian adia lungtuah huai leh siangthouna toh hinkhua zang a i hinna a Pathian pomtak hinkhua leh biakna kilang sak ding in panla thak ding in i kingen hi.

Toupa’n Tuailaite Amah pomtak biakna ei mimal ah midangte muhtheih hinkhua nei thei a kibulphuh thak thei ding in hon ompih chiat hen aw.