Simtute, abiktak in, naupang sinsaktute’ ading in khuavannuai a sinsaktu thupipen toh kisai saulou kikum le i chi hi. Khristian Sinsakmi laibu a a kimu bang in, sinsaktu thupipen bel i Toupa Jesu Khrist ahi hi. Mangthangte ading a hotdamna lampi hon bawlsak kia hilou in, leitung a gingtute nuntak didan hon sinsak hi. Sinsaktu thupipen akipan in ei, tuhun a sinsaktute’n, bang ziltheih i nei ua le? Tua sang mah in, Amah akipan zil i neita hia? Ahi, khristian sinsaktu khenkhatte’n Toupa Jesu apan zil sawmlou in mihing’ pilna leh khovel pilna masuan khazel uhi. Tuabang ahihman in, naupang sinsaktute’n zong, i lampi zuih i velthak zel ua, Toupa Jesu’ lampi zuih toh a kituak hia chih chet zel poimoh hi. Hiai, i BCD column deihthohtak ah saupi gelhtheilou i hihman in, sinsaktu thupipen apan i kisin theih didan lampi saulou kikawkmuh le i chi hi.

Amasapen in, Toupa Jesu leitung a a omlai in, thugen konkon chih sang in sinsak ngitnget a chiingzaw hi. Tua ban ah, tampite lak ah sinsak hun neitham mahleh, a nungzui dia a teltuam 12-te lak ah sinsakna hun tamzaw a zang hi. Khovel in a theih ngeilouh leh tunitan a a pom theihlouh ding sinsakdan paizia thak hon luikhia hi. Tua bel, Amah a sinsaktu pen in a sinsak nungzuite’ khe a silsiang sak hi. Ahoihlouhna uh leh a chitlouhna te uh theivek mahleh; theihsiamna, zahngaihna, kiniamkhiatna, ngaihdamna bei ngeilou leh itna tak toh a sinsak zaw hi. Tuabang ahihman in, a nungzuite’n a it mahmah ua, a sinsak thute a sihtan dong un a zui uhi. Tuamah ahi i Toupa Jesu sinsaktu thupipen ahihna san.

Toupa Jesu bang-a sinsaktu thupipen hih ding sawm i hi hetkei, himahleh Amah hon nutsiat thute sinsak i hihman in, a lampi zuih sut ngitnget a, nungzuite a sinsak bang a i naupangte sinsak a chiil ding in i kihasuan hi.

Tu kha Sinsaktute’ Laisiangthou suut ding: Jesu tang tung thugen, Matthai bung 5 - 7.
Tu kha a BCD Sinsaktute’n “Khristian Sinsakmi” laibu apan sinchiat ding:
THUGENTU LEH SINSAKTU KIBATLOUHNA (Khenpi 3na, pek 10na)