Pathian in khathak meel hon musak nawn a kipak mahmah in Amin siangthou ka phat hi. Thukizakna a i tantuan Dorcas’ Corner ah thu kizaksak dingte i kizaksak theihzel ziak in leng i kipak hi. Simtute tengteng i Toupa Jesu Khrist min manpha in chibai kon buuk hi.

Dorced Tailoring Project (DOTPROJ) toh kisai tamlou theihtuak omte i taklang ding. Tulel a puankhui sinlel ten tukha a course khat zouta ding uhi. Amauten a sinna uh kisot in kuhkal thei mahmah uhi. Himahleh siamnal zou nailou uh a hihman un siamtak leh nektak zon theihna ding khop a a zilkhiak ding uh deihna in course khat sinzom touh saklai ding a geel ahi. Tua ban ah a thak (fresh) a sinding mi 3 (thum) lakbeh ding kisawm hi. Theihsakna leng Division teng a DSte tungtawn a hawmkhiak ahi a, lunglutna neiten ngaihven kul ding hi.

Dorced huhna honglut zelzel a i kipak petmah hi:
1. EBC Central Lamka Tualsung Baptist Dorca Fellowship a kipan in kumlui 2018, October kha in amau saptuam sung a dorced huhna dia a donkhiak uh Lamka North Division office tungtawn in Rs 31,910/- honpia uhi.
2. EBC Vengnuam Tualsung Baptist Dorcas Fellowship ten Rs 4000/- hon pia uhi.
3. Miss Liankhoman EBC Bethlehem in Rs 6000/- hon pia hi.
4. EBC Mualpheng Tualsung Baptist Dorcas Fellowship ten dorced huhna ding meh chi tuamtuam honkhak ua, tuate CDSC member Nu Zoukim leh Nu Sawmi ten phatuamngaih suah in Lamphelpat, Imphal ah hon zuak ua a sum in Rs 3300/- pha hi.
5. Miss Ngaibiakhoih EBC Shillong in Rs 2000/- hon pia hi.

Dorced huhna hon petute tengteng Toupan a leh tampi in hon vualzawl hen.

Dorced Award hawmna dt. 9/2/2019 (Kiginni) Ebenezer Academy a kaite 85% muzou mi nih kiang ah piakkhiakna kinei hi. Hiai school a kai Dorced in a chawm tengteng kisamkhawm a Director (SD) in amaute hanthawnna leh thumsakna nei hi.