Dorcas Corner simtute i Toupa Jesu Khrist min in chibai kon buk masa hi! KTZ Editorial Board in Dorka Pawl toh kisai kithuzakna ding in KTZ a Dorcas Corner column khat hon bawlsak ziak un Dorka Pawl toh kisai thu tuamtuam i kizaksak theihzel man in Editorial Boardte tung ah kipahthu i gen hi. Tutung in Dorcas Corner ah Dorcas Co-ordinator hihna apan pension ta ka hihna ah, ka gen ut tampi om mahleh tamlou chik hiai Dorcas Corner ah kon taklang masa ding hi. Tuazoh in DORCED vai toh kisai in tamlou i gen lai ding.
Seppat sung: Pathian leh heutute deihsakna ziak in April 1, 1991 apan in Dorcas Co-ordinator hihna i saptuam ah ka na len hi. Convention Saptuam paidan in December 27, 2018 in hiai mohpuakna apan ka pension ta hi. Pathian pina ziak leh heutute deihsakna ziak a pension tan semthei a ka om man in hiai tantan hon pitu Pa Pathian tung leh heutute tung ah kipahthu ka gen masa hi.
Dorcas Department toh kisai: Ka seppih Division, Field leh Khochih a Dorka Pawlte toh Toupa nasepkhawm nuam ka sa mahmah hi. Dorka Pawlten Toupa gam nasepna ah veina, itna leh vision hoihtak tak nei in siamtak leh feltak in hon kithuahpih ua, Dorka Pawl heutute leh makaite thusiamna ziak in EBC sung ah Nna poimoh leh manphataktak tampi kisemkhia ahihman in Pathian tung leh Dorka Pawl a ka seppihte tengteng tung ah kipahthu ka gen hi.
Dorka Pawl kiphuhkhiakna ziak & dinsan tagah genthei leh panpih ngaite panpih ahihdungzui in Dorka Pawl kiphuhna khua khempeuh ah theihtopsuah in hiai na kisem hi. Division khenkhat leh Local khenkhatte ah adeuhkhol in khopi lamdeuhte ah damlou a Hospital a omte thumna leh thilpiak toh a a na veh theizel pawl om ua, khamtheih hih zongsangte kepna (Rehab Centre) leh tagah kepna va veh theizel bang, genthei mahmahte amau leh amau a a nekzon theihna ding tanpha ua tundingna nasem a, a sum leh vanzat ding manpha taktak pia a sem khia leng om hi. DORCED Project adia pang gige leh mahni lemdan dan apangte ziak a genthei leh haksa diakten laizil thei ua, puankhui zilthei uhi. Dorka Pawl nasep tampi genkimlouh leng om hi. Hiai bangzah a Dorka Pawl nasep hoihte ziak in Pathian min phat in Dorka Pawlte tung ah kipahthu i gen thakthak hi. Pathian kia in thupina tang hen.
Hon makaih heutute: Dorcas Coordinator hihna ka sepsung in heutu tuamtuamte makaihna nuai a sem in, amaute apan tampi ka zilkhia a ka kipak mahmah hi. Huan, Central Dorcas Sub Committee, Division Dorcas Committee, Mission Field Dorcas Committee leh Khochih a Dorcas Committee feltaktakten ngainatak a hon kithuahpih a, hon sepkhawmpih ziak un kipahthu ka gen hi. Dorka Pawl toh sepkhawm leh kithuahkhawm nuam ka sa, ka kipak mahmah hi. Awlmohluat ziak leh deihsak luat ziak a ka seppih Dorka Pawlte lungsim natna ding ka genkhak leh sepkhak omleh tuate Pathian min a hon ngaihdam leh na mangngilhta ding in ka hon ngen hi.
Thukhitna: Ka tawpna di’n, heututen Dorcas Coordinator ding in heutunu Nemngaihmawi hon pia ua kipahhuai i sa hi. Pathian in amah tungtawn a Dorka Pawlte nasep dia poimoh taktakte hon sepkhiak pih ding in ka lam-en a, lungmuanhuai ka sa hi. I heutunu’n Dorka Pawl lak a manpha leh gahsuahtak a a hon sepkhiak theihna ding in Dorka Pawlten Sa le Kha leh Thumna toh pang a kithuahpih a, sepkhawmpih gige ding in ka hon ngen hi. Pathian gam nasepna a gahsuah leh lohchinna ding zaw a semtute kia hilou in saptuamte tung ah leng kinga lian mahmah ahi chih theithak ni. Munchih a om Dorka Pawlte Pathian in hon vualzawl chiat hen. Kipak e.
Toupa gam adia na seppih uh hon ngaina mahmah,
(Miss Liankhoman)
Former Dorcas Co-ordinator
DORCED HUHNA KIBEHLAP ZEL
• EBCC Aizawl Dorka Pawl in August 2018 in Rs.5,000/- DORCED huhna pia uhi.
• EBCC Palkhuang Dorka Pawl in DORCED huhna meh tuamtuam hon piakte uh sumsuah in Rs.1,350/- hon pia uhi
• EBCC Khajang Dorka Pawl apan a DORCED huhna meh tuamtuam hon piakkhawmte uh sumsuah nung Rs.1,350/-
• T Chiinzanem Zenhang Lamka in Rs.1,000/- hon thoh hi
• EBCC Pearsonmun Dorka Pawl in Rs. 3,000/- hon thoh uh.
• EBCC Behiangjang Dorka Pawl in Rs. 1,020/-
• Upa H Thiauzakhup EBCC Bungmual in EBC Kumsim Khawmpi 70na a upa pahtakna Cash Award a san Rs.10,000/- DORCED huhna ding in hon pia hi.
• Nu Siamngaihching w/o Liankholal Guite, Pethuel in a voknou man apan DORCED huhna Rs. 3500/- hon pia hi
• Miss Liani Hanghal & H Thawngkhenmung in December 12, 2017 a tangtawn mun ding a a na paisan anu (L) Dimzavung w/o H Vialzakham of Zenhang Lamka, min in a nu sihnung a kum khat chinni Dec 12, 2018 in DORCED huhna ding in a nu min in Rs. 5,000/- hon pia uhi.
DORCED huhna hon pete tengteng tung ah kipahthu i gen a, Pathian in amaute vualzawl zel hen.