Dorcas’ Co-ordinator hihna ana lensa i heutunu Miss Liankhoman in hun sawttak Dorka pawl hon makaih a i saptuam kum bikhiahtan semzou a hon pension sanna nung ah Pathian in heutute tungtawn a amah mun Dorcas’ Co-ordinator hihna mohpuakna hon piak dungzui in dt. 9/1/2019 in charge ka na lata hi. Hiai bang mohpuakna lathei ding a honpipa leh makaihpa Pathian min phat in Dorcas’ Corner simtute tengteng i Toupa Jesu Khrist min in Chibai kon buuk hi.

Awle heutu fel leh kizen taktakte makaihna nung a sep ding bawl ding omte sunzom thei ding a i om man in kipahhuai i sa hi. I pawlpi kiphuhkhiakna ziak leh dinsan tagah genthei leh panpih ngaite panpihna lam chituamtuam a khochih Dorca pawl hi in division level a dorca pawlte hitaleh theihtawp suah a i na sep zel bang in tu kum thak ah leng i khutte zakkhawm in pangkhawm ni aw. A hoih zaw ding, a manpha zaw ding leh a phatuam zaw ding a i theihte iim mang mailou a kituak tak-a kikum dialdial in munchih a om Dorka pawlte na khut taklam uh hon pe ding in kon ngen hi. Division leh local level a nna tampi sem a i pannate ban ah Head quarters level a i nasepna biik DORCED leh DOTPROJ (Puankhuina i theihsiamna din) ah avan leh asum a ana pangsate ziak in kipahthu i gen hi. Pathian in i lungsim a veina, awlmohna hon piak thu a hon gen dungzui zel a lam chi tuamtuam a pan theih gige ahi chih leng i kizasak hi.

Pathian vualzawlna dawngtute apan DORCED nasepna ding hong lutzel hi. Nu Goihman, EBCC Lamphel apan Rs. 2,000/- EBC Thanlon Division Dorka Pawl in DORCED nasepna ading in tukum thak apan khateng in Rs. 1,000/- a pan sawm uhi. EBCC Central Delhi Dorka Pawl in leng tukum thak apan amuh bangbang uh khateng a DORCED huhna dia piak sawm uhi. Sep ding omte amasa ananung ding theisiam a manpha leh gahsuah tak-a i septheihna ding in kithumpih chiat ni. Toupa’n na omna mun chiat uah hon pii in hon makaih hen. Ka kipak.