Jakob 1:2-3 “Ka sanggamte aw, lam tuamtuam tampitaka ze-etna na tuah chiang un lungnopna siang ahi chi in ngaihsun un. Ahang bel, hiai na thei uhi: Na upna uh ze-et a a om chiang in, tua in lungduaina a gahsuah hi.

Ze-etna i gen chiang in khemna hipah lou a, Pathian in a tate’ pichinna ding a etkhiakna lampi a bawl hizaw hi. Tamtakte’n ze-etna i tuah chiang un lungngaihna leh vangsiatna bang in kingai kha pahpah hi. Tuabang lungsim i neih chiang in ze-etna in a sepdi bang semkha theilou in, hatzawk sang in kibahloh kha zel hi. Laisiangthou in kiteltak in hon sinsak khin hi: lam khatpeuh ah ze-etna i tuak zong in, lungnopna siang a ngaih ding a chi hi. A omdan bel, lungngaihna leh vangsiatna a i ngaihsutte, Toupa’n i ginna hih hatna ding leh khalam pichinna ding a, itna toh, hon bawlsak hizaw hi. Tuabang ahihleh, ei gingtute’n hibang ze-etna i tuah chiang un, lungngai mailou a, thanuam leh pilvang tak a i ginna uh kalsuan sak zel ding ahi hi.

Nu-leh-pate leh sinsaktute’n leng, naupang i chiilna ah, ze-etna nam tuamtuam i tuak zelzel uhi. Khatveivei tuabang ze-etna te’n hon thadah sak mahmah a, khatveivei hon thangpai sak a, pahtak ngahlou kia hiloua gensiat a i om hun bang leng a omzel hi. Tuabang hun chiang in, hih Laisiangthou chang ngaihtuah khe zel ding in ka hon ngen hi. Pathian’ gam na sem a, a belamnoute enkol dia hamphatna tangte i hi uh a, ze-et a i om ei adi’n thilhoih ahi hi. Hunteng in i vualzou kholkei maithei, himahleh i thiltuah lellel te Toupa apan ahi chih chiang phot peuhmah lehang, mihing’ hatna leh theihsiamna in a zohlouh hun in zong, hon ze-et Pa Pathian in tuabang thilte theihsiamna (Jakob 1:3-5) ahon pe ngei ding chih i muang ngam hi. Tua kia hilou in, ze-et a i omchiang in Toupa i nasep ah a lunglut chih a hon theisak a, tuamah in tha hon guan zel hi.

Huchi teng ahihlai in, ze-etna douzoulou a lohsam a i omchiang in ei kia hilou in i chin naupangte’n leng thuakloh uh ahihdan leng mangngilh louh a poimoh mahmah hi.