Pathian’ zahngaihna ziak in, 2018 Dorca’s day leh Nute’ Nipi zangthei nawn dia i om ziak in, Pathian’ tung ah kipahthu genkawm in, gamchih, munchih a EBC Dorka tengteng i Toupa Jesu Khrist’ min in Dorca’s day chibai k’on buk hi!

Hiai hunpi manphatak i zatna uah, i thupi uh, “Nang vualzawlna hi in” chih zang in, Toupa’ Kha in hon houpih chiat leh chih ka thumna ahi. Dorca’s day i zatna tungtawn in, Jesu Khrist neiloute’ neihna hong hi henla. Nute’ lak ah, innsung mohpuakna a i tanvou uh chiantak a muhtheihna di’n khalam mitvakna hon tut ban ah, mohpuakna bulpat dikna leh innkuanpihte adia vualzawlna, innsak-innkhang, innkim-innkiang, khua-le-vengte adia vualzawlna, salam khalam a gentheite leh, khotang, gam leh namte adia vualzawlna hithei chiat diing in, Dorka-te’ lak ah Kha Siangthou vehna thupitak, Toupa’n hon tungsak henla. Toupa’ gam nasepna a khut kilenkawm a kilawptak a pangkhawm semsem di’n Pathian in hon vualzawl chiat leh, chi’n, deihsakna sangpen k’on puak/laan hi.