“Mihing tanghou kia in a hingkei ding, Pathian kam a thupawtte in a hingzaw ding” (Matt 4:4)

Laisiangthou i chih Pathian kam a thupawtte laibu a kibawl ahi. Gendan tuamtuam leh sutdan tuamtuam tampite’n hon hamhaih sak baih mahmah a, adiak in naupang leh sinsaktute’n mawltak lah chiangtak a i pom ding dan hiai bang hizaw hi. Etsakna in, i gamsung a Chief Minister in gamsung mite thu chah hon bawl henla; tua toh kizui thuchiam bawl sawn leh, a thuchiam semkhetu ding amahmah ahi a, a thuchah zuitu ding ei, a gammite i hi hi. Tua dan pian in, Laisiangthou i chih Pathian thuchah ahi a, a sung a thuchiamte Ama’ sepkhiat zel ahi. A thuchiam a amuanhuai dan tua Laisiangthou sung mah a i muthei hi. Ahihleh, Pathian’ kam a thupawtte bangchi tuk a poimoh ahia? Toupa Jesu’ kampau apan a poimoh dan hibang in gentheih hi: Mihing’ hinna dia poimoh ahi. Tua bel, Pathian kam a thupawtte lou in mihing a hingzou kei ding. Taksa ading in ann (tanghou) a poimoh dan i theichiat hi. Nikhat in nihvei bek salam ann i ne teitei a, tua salam ann nek ahihtheihna ding in buaipih ding tampi a om a, nekding buaipih in innkuan a mikhat bek sun nitum in i buai gige uhi. Ahi a lah, Toupa Jesu in “Mihing tanghou kia in a hingkei ding” chi zel a!?! I hinna ding a i nek ahih ngal leh hinpih le hoih ding hi a; Toupa Jesu in salam ann kia a hinglou ding na hi uh hon chi ahihtak man in, I hinpih ding ann i zon a i buaipih uh poimoh mahmah hi. Tuni in simtute kiang ah hiai dotna ka bawl nuam hi, “Na salam ann ding na buaipih tuk in na khalam ann ding na buaipih zou hia?” Pathian’ kam a thupawtte lou in kuamah hinglou ding i hih man in, i hinna ding in Laisiangthou niteng a sim leh sut
ding in ka hon chial hi.

“Hiai Danbu (Laisiangthou) in na kam pawtsan hetkei hen. Hiai a thu kigelh tengteng na zuih chinten theihna ding in sun leh zan in na ngaihtuah zaw ding ahi. Huchi in na lampite na tuahpha sakdia, na hong lamzang ding hi.” 