BYF, BDF, BCD Corner | KTZ

    KTZ
    BYF, BDF, BCD Corner

    Dorcas Corner (Dec 2017)

    DORCED Project tungtawn a Naupang chawmna Dorka milip in antangpham i phamte lak a 15% ban-ah mimal, Local leh Division phatuamngai tuamtuamten i thohkhawmte ziak a tagah leh genthei naupang 147 chawmna pai zawm theihzel ahihman in panla tute tengteng tung ah kipahthu i gen hi. Pathian vualzawlna ziak in DORCED huhna khateng a pegigete ban-ah Pathian in huhtu ding i lak ah hon petou zel a khalui November 2017 in DORCED Support-na ding in Nu Ningzadim @Dimpi, EBCC Bungmual in Rs. 10,000/- hon pia a , Mr. Vumsuanlal Valte, NLBC in Rs. 500/- hon pia hi. Amaute tung ah i kipak mahmah hi. Pathian in amaute a tamsem in vualzawl leh chih i deihsak hi.

    Kum thak 2018 in DORCED Project nuai ah naupang 150 chiang chawm i sawm hi. Huan i chawm naupangte a poimoh bang a i hihtheih tan a a laizilna uh toh kisai huh sawm i hi. Huaiziak in, kuapeuhmah in antangpham leh DORCED Project support-na toh kisai a pan i na laksa ban-ah Pathian vualzawlna i donte tungtawn a tagah gentheite domkang seem ding a panla thak siausiau ding in i kingen hi.

    #Tonglon ‘P’ Dorcas Golden Jubilee Report – November 1-5, 2017 sung EBCC Tonglon P in Dorka kiphuhkhiak nung kum 50 chinna Golden Jubilee lopna leh Pathian tung ah kipahthu genna program lohchingtak in zang uhi. Hiai program ah Nov. 1-3 sung Miss Liankhoman, DC leh Rev N Pumsuanmung YC ten thu gen ua, Pastor Thangrousiam bialtu Pastor in Jubilee suang honna Nov. 2, 2017 in nei a, Rev N Pumsuanmung in Souvenir honna nei hi. Nov. 4 & 5 in Rev S Vung Minthang, GS in thu gen a Rev V Nenglian DS/ LSD in zingsang devotion hun zang hi. Program zat sungteng khozang in Field ah zing leh nitak annekhawm den uhi.

    Tonglon ‘P’ khua neuchik himahleh Tonglon ‘P’ khosuak EBC sung ah Pastor pensionta 1 leh Pastor a semlel 7 piang khia uhi. Hiai khua a ana teng masa nu leh pa, pi leh pute Pathian phawk leh Pathian lau mite tenna khua ahihziak uh ahi diam aw chih hon ngaihtuahsak hial hi. Tutung Dorcas Golden Jubilee zatna tungtawn in Tonglon ‘P’ Dorka Pawl in Jesu zintunna bang hihthak in, Antangpham leng pungsawt mahmah chi uhi. Kipahhuai mahmah; Pathian phat in om henla thupina teng Pathian in tang hen.