Doctrine chih thumal i zak chiang in a theih haksapi leh giltak a sut ngai sese didan in i koihkha nak-khem hi. Tua ziak mah in naupangte’ theih di’n i koih khol kei a, sinsak le i tum kholkei uhi. Ahihleh, “Doctrine” i chih bang ahia? A thumal in a gen ut tak bel hiai ahi - pansan hoihtak nei a zuihding a hoih leh “adik ahi” chi a kipom gindan leh thu-upte kisinsakna ahi. Tuaban ah, Laisiangthou kia pansan leh kingakna a nei doctrine te Evangelical Doctrine a kichi sese hi. Tuabang ahih man in, doctrine chih i gen chiang in a huamkhak lian mahmah hi. “Doctrine Kisinsakna” chih min nei sese kei leh leng Sandeskul a naupangte kisinsaknate khempeuh zong doctrine sinsakna hivek hi. Saptuam (other denominations) khenkhat in naupang neu chikchikte leng a doctrine uh sinsak pah ua, a gindan uleh a saptuam uah kip mahmah uh ahi chih ngaihdan kinei kha zel hi in muhtheih hi. Ahi a, EBC in naupangte doctrine sinsak louh ding chih dan (bye-law) bangmah i nei kei a, tuakia hilou in, EBC saptuam sung a om naupangte lak ah Evangelical Doctrine neuchik ahih ua pan sinsak ahizaw hi. Sinsak i hihlam i theihlouh man un naupangte’n doctrine theilou sak in om kha zel hizaw hi. Huchi ahihlai in, Naupang Sinsaktute’n zong i sinlai te doctrine ahihlam i theihlouh khak ding lauhuai mahmah hi. Beginner A leh B te Sinlai Bu na et uleh “Bible Knowledge” hunkhop a om kawmkawm in “Evangelical Doctrine” poimoh taktakte om hi. Hotdamna thu i genteng in, vangam leh meidil thu i genteng in, evangelical doctrine kisinsak ahi chih i theih poimoh hi. Adang, atuam deuh, lam-et leh lunggulh a i neih khak ding lauhuai mahmah hizaw hi. Tuabang ahih man in, Naupang Sinsaktute hi in Nu-le-Pate hitaleh, EBC in Thu-up genkhiatna i bawlte (a Laibu a le sutkhiat) hoihtak leh nguntak a i vel a i sinsaknate toh kituak mah ahi, naupangte leng kisinsak mah i hi chih i chet uh poimoh mahmah hi. Tua hileh, “naupangte’n doctrine theilou” chih ngaihdan diklou pen hong bei thei ding in lamet huai hi.

Bangteng i genhang in, a poimoh pen zaw doctrine theih ahi zaw kei a, tua doctrine in hon sinsak Khrist Jesu a hinna thak neih ahi zaw hi. I naupangte’n tua hinna thak a ngah ngei nading un thanuam tak in kalsuan tou zel ni hang!