Tua bang mah in, singkung hoih peuhmah gah hoih in a gah a, singkung hoihlou bel gah hoihlouin a gah nak hi. Singkung hoih gah hoihlouin a gah theikei a, singkung hoihlou zong gah hoih in a gah thei kei hi.
(Matthai 7:17-18, BI version)

Hih Laisiangthou chang in a gennop i thei chiat hi. Etdan dang khat in enzual le - singkung hoih in hoihkei taleh, gah a suang hi. Singkung khatpeuh singnou a hong kipan ahi; singnou leuleu bel a tang (seed) a hong kipan ahi. Tua haichi tang omkei leh singnou omtheilou dia, singnou om kei leh singkung omtheilou dia, singkung omkei leh a gah om theilou ding hi. April Issue ah naupang leh singnou i tehkhin a, tuni in bel haichi tang pansan in naupangte saptuam adia a poimoh dan leh saptuam in naupangte ngaih poimoh luat ding ahihdan saulou chik in i taklang nawn ding.

Haichi tang pauthei hileh hibang gen di’n gintak huai hi, “singkung ka suahna dia a poimoh teng kei sung ah omkhinta ahi, tua ka poimoh bel leihoih, tui, leh bouruak hoih ahi.” Naupangte’n zong piching ahong suah theihna ding un a poimoh bangkim amau sung ah neikhin uhi. Himahleh, bangchi bang piching ahong suak di ua? chih dotna toh kisai in a kemtute’n mohpuakna kinei hi.

Saptuam in haichi tang i pawina mun chiat ua i panlak dan uh leh tha-le-zung, lungtang, sum-le-pai i piakzah uh lungtun huai i sa chiat na uhia? I singnou te gahhoih suang di’n a khang hoih zel na uhia? Haichi tang hoihtak a hong sel khiat theihna ding in theihtawp i suahna uhia?

Toupa Jesu’n “singkung hoih peuhmah a gah hoih hi” a chih a dik mah ahi i chih leh Saptuam in, theihtawp suah in, singkung hoih suang ngeingei ding in i haichi tangte pawi lehang, Toupa’n hon vualzawl ngei di’n i lamen hi. 