“Blue Whale Challenge” kichi online game Russia akipan hong thangkhia khat om in kigen hi. Hiai game bel internet tungtawn a kimawl hi a, a kimawl tute’ hih ding nna (task) 50 luikhiak in om a, a nna tawpna pen ah mahni hinna kilak (suicide) ding hidan in kigen hi. Russia gam sung ah hiai game ziak in khangnou bangzah hiam mahni hinna la omta a, a kigen ban ah, gamdang tuamtuam ah leng police-te’n hiai game toh kisai suizui lellel uh hi’n zong kigen hi.

Hiai game i tate leh naupangte a kimawl kha ding uh chih lauhthawnna ziak a ka hon taklat hipah zawlou in, tulai khangnoute internet in a thuzoh dan taklat uthuai ka sakziak hizaw hi. Genthei leh haksa i kichih lailai in khovel khantouhna in hon bing phut a, naungek pauthei tung tanphate’n “download” “youtube” chihte khawng kammal a theih masakte uh hong suakta hi. Pahtak huai mahmah a bat lailai un, a tunung hun uah hiai “internet” kichi Pathian mai a “pathian dang” bang a a neihkhak ding uh lauhuai lua hiin ka mu hi. Tulel inleng naupang tamtakte’n “pathian” (idol) a neikha ta uh ahi diam?

Internet a hoih kei chih zuak sawm ka hi kei hi. Mi tamtakte, Pathian thugen leh khovel nasemtute’n phatuam tak in zang thei uhi. Phatuam tak a zattheih ahihlai in, i naupangte suse tu leh Pathian huangsung apan pimangtu in zong pang thei hi. Tuabang ahihman in, nu-le-pa leh sinsaktute’n i tate leh naupangte “internet” toh kisai in etkai kiphamoh hi. Internet a khoih chiang un bangchi bang lamte a en ua, bangchi bang game-te a kimawl ua chih i theihpih a thanuam tak a i etkai poimoh hi. Naupang in bawngnawi vui a vuak a a bak leh a kitai a himahleh singpi/ bawngnawitui bel kidawnsak veve hi. Tuabang deuh in, nu-le-pa’n poimoh a sakte bel etsak tham ding ahi himahleh etkai louh a khoihsak pilvan huailou kha thei hi.