BYF GOLDEN JUBILEE YOUTH COUNSELING CENTRE HONKHIAK HITA THUMASA:
Hun sawtpi apan i na ngaklah leh lunggulh mahmah EBC in Youth Counseling Centre neih ding chih toh kisai in Pathian vualzawlna toh November 08, 2016 in HONKHIAK hi ta. Halleluiah! Hiai BYF GOLDEN JUBILEE | YOUTH COUNSELING CENTRE ahih leh Heutupa Rev Paukhanmang Guite, Director (MN) in pulakna a neih zoh in Heutupa Rev S Vung Minthang, General Secretary EBC in Honna leh Latna a nei hi. Hiai inn toh kisai theihtuak tamlou anuai a bang in ka hon taklang hi. POIMOH SAKNA ZIAK LEH A HONG PIANDAN:
Khovel khantouhna hat mahmah lak a khangthak tuailaite ading in chouna tampi lam chi tuamtuam ah a om hi. Tua chounate tuailai tamtak ten theikhial in thupukna tamveitak a na lakhialta uhi. Tuma kum tamlou paita apan in gamsung ah mahni kithahna (suicide) a hong uang mahmah a, hiai tawh kisai lam chi tuamtuam a suina neih ahih nung in a tamzaw thamte mahni kingaihsiatna ziak ahi tangpi pen hi. Kingaihsiatna ziak leng tampi a om a, khamtheih zatkhelh ziak kia hilou in khamtheih hih hetlou mihoih mahmah tampi’n leng thupukna ana lakhial ta uhi. Tuabang dinmun a i omlai in amaute panpih theihna bang om diam chih ngaihtuahna in Youth Centre khat bawlkhiat ding poimoh sakna leh lunggulhna a hong lian mahmah hi. Huchiin CBYF Sub-Committee in ngetna bang in EBC Kumsim Khawmpi Lian 67na in a poimohna theihpih in abaih theilam a patkhiat ding in khawmpi palaiten thupukna bawl hi. TUP LEH NGIM:
Laisiangthou pansan a khalam leh salam a buaina neite Jesu Khrist a lamdik kawkmuh ding.
Mimal buaina neite zonkhiakna ding a Tualsung Saptuamte toh kizopna hoihtak neih ding.
Counseling Centre ahihmah bang in mimal thuguk/thusimte koimah a genkhiaklouh bikbek ahiding hi.
Amin ding in Youth Centre chih himahleh, naupang, nupi leh papi buaina neite’n zottheih vek ding hi. ETKOL DINGDAN:
Youth Counseling Centre pen Director of Ministries EBC nuai a Ministry khat bang a ngaih ahi.
Sum leh pai senna dingte ah a kul leh poimoh bang in Director of Ministries, EBC in budget a bawl zel ding hi.
A semtu ding leh infrastructure bang kim EBC Headquarters in a hun leh amun dungzui in a ngaihtuah zel ding hi. SEPSUAH DING DAN
Hiai Counseling Centre Director of Ministries, EBC in a enkol ding a, Youth Coordinator in a huh ding.
Buaina neite’n amau case (khalam, psychological, moral, legal, family, etc.) zil in counselor sehsak ahi ding hi.
Buaina nei mi’n counselor a teel thei ding a, ahun sep in counseling Centre a naih theih gige ding hi.
Thil deihhuailou leh kilawmlou a omlouhna ding in counselor/referral person in pilvang tak in a enkol ding. CENTRE HON HUN SUNG DING
Thuthak omma a poimoh bang a EBC Office Hour sung a naihtheih ding a hon ahiphot ding hi.
Maban ah poimoh sakna a om leh 24 Hours a naihtheih ding a lemgel ahi ding hi. Note:
Mimal/ Innkuan leh Pawl kuahiam hiai centre zat utna nei I om zenzen leh Local Saptuam tungtawn hiam ahih kei leh hiai anuai a Mobile No. kipiate ah chik lai peuh in akan theih ding hi. # Rev. Paukhanmang Guite (08014133846)
# Rev. N Pumsuanmung (08575614047)
# Mr. Lianding Guite (08974882534)
# Evan. T Damkhothang (09862738447)