Issue masa ah naupangte singnou toh i tehkhin a, tua mah zang in gen beh nop ka nei hi: Singnou suankhiat tungte piching tak leh taksa tak hong suah theih nading un kum bangzah hiam sung siam neel tak a tha-le-zung ban ah sum-le-pai tampi seng a zuun ngai ahihdan horticulturist/ silviculturist te’n thei mahmah uhi. Tuamah bang in, Saptuam heutu leh makaite’n zong mailam hun a i tha hon dawntu di te i kepna ah kisiit lou a, mailam muhna kichiantak neikawm a panlak lunggulh huai hi.

Tuni a heutute; Pastor, Upa leh Saptuam makaite tengteng, kum bangzah hiam paisa a naupangte ahi uhi. Tuamah bang in, tuni a naupangte zong kum bangzah hiam hong paikhit nungchiang in saptuam sung a heutu leh makai dingte ahi uhi. Naupang maimai leh naupang vai i chihte denchiang a Saptuam vai hong suak ding chihna ahi. Tuni a naupangte’ lungtang a chi i tuhte; kisinsakna leh thuhilhnate tengteng denchiang a Saptuam in a gah lou ding ahihman in naupangte lak a i chi tuh leh sinsakna i piak te pilvang tak a etkai leh limsak poimoh lua hi.

I Toupa Jesu in Mark 10:14; Matt 19:14; Luka 18:16 ah “Naupang neute ka kiang ah hon paisak unla, kham kei un” a chih mah bang in Saptuam kemtu leh makaite’n zong naupangte i kiang a hongpai d’u kham louh ding ahi. Tua bel, naupang kepna ngaih poimoh ding chih nopna ahi.

Saptuam adia mission field nai pen leh poimoh pen zaw “Naupang Field” ahi chih ngaihtuahna toh tu kha column ka khin ahi. 